Discourse on the Method

Et en la derniere, quelles choses il croit estre requises pour aller plus auant en la recherche de la Nature qu’il n’a esté, & quelles raisons l’ont fait escrire.*

En quoy il n’est pas vraysemblable que tous se trompent ; mais plutost cela tesmoigne que la puissance de bien iuger, & distinguer le vray d’auec le faux, qui est proprement ce qu’on nomme le bon sens ou la raison, est naturellement esgale en tous les hommes ; et ainsi que la diuersité de nos opinions ne vient pas de ce que les vns sont plus raisonnables que les autres, mais seulement de ce que nous conduisons nos pensées par diuerses voyes, & ne considerons pas les mesmes choses. Car ce n’est pas assez d’auoir l’esprit bon, mais le principal est de l’appliquer bien.

Les plus grandes ames sont capables des plus grans vices, aussy bien que des plus grandes vertus ; et ceux qui ne marchent que fort lentement, peuuent auancer beaucoup dauantage, s’ils suiuent tousiours le droit chemin, que ne font ceux qui courent, & qui s’en esloignent.

Et ie ne sçache point de qualitez que celles cy, qui seruent a la perfection de l’esprit : car pour la raison, ou le sens, d’autant qu’elle est la seule chose qui nous rend hommes, & nous distingue des bestes, ie veux croyre qu’elle est toute entiere en vn chascun, & suiure en cecy l’opinion commune des Philosophes, qui disent qu’il n’y a du plus & du moins qu’entre les 3 accidens, & non point entre les formes, ou natures, des indiuidus d’vne mesme espece.

Car i’en ay desia recueilly de tels fruits, qu’encore qu’aux iugemens que ie fais de moymesme, ie tasche tousiours de pencher vers le costé de la defiance, plutost que vers celuy de la presomption ; & que, regardant d’vn œil de Philosophe les diuerses actions & entreprises de tous les hommes, il n’y en ait quasi aucune qui ne me semble vaine & inutile ; ie ne laisse pas de receuoir vne extreme satisfaction du progrés que ie pense auoir desia fait en la recherche de la verité, & de conceuoir de telles esperances pour l’auenir, que si, entre les occupations des hommes purement hommes, il y en a quelqu’vne qui soit solidement bonne & importante, i’ose croyre que c’est celle que i’ay choisie.

Et neanmoins 5 i’estois en l’vne des plus celebres escholes de l’Europe, où ie pensois qu’il deuoit y auoir de sçauans hommes, s’il y en auoit en aucun endroit de la terre. I’y auois appris tout ce que les autres y apprenoient ; & mesme, ne m’estant pas contenté des sciences qu’on nous enseignoit, i’auois parcouru tous les liures, traitans de celles qu’on estime les plus curieuses & les plus rares, qui auoient pû tomber entre mes mains. Auec cela, ie sçauois les iugemens que les autres faisoient de moy ; & ie ne voyois point qu’on m’estimast inferieur a mes condisciples, bien qu’il y en eust desia entre eux quelques vns, qu’on destinoit a remplir les places de nos maistres.

Et enfin nostre siecle me sembloit aussy fleurissant, & aussy fertile en bons esprits, qu’ait esté aucun des precedens. Ce qui me faisoit prendre la liberté de iuger par moy de tous les autres, & de penser qu’il n’y auoit aucune doctrine dans le monde, qui fust telle qu’on m’auoit auparauant fait esperer.

que les Mathematiques ont des inuentions tres subtiles, & qui peuuent beaucoup seruir, tant a contenter les curieux, qu’a faciliter tous les arts, & diminuer le trauail des hommes ; que les escris qui traitent des meurs contienent plusieurs enseignemens, & plusieurs exhortations a la vertu qui sont fort vtiles ; que la Theologie enseigne a gaigner le ciel ; que la Philosophie donne moyen de parler vraysemblablement de toutes choses, & se faire admirer des moins sçauans ; que la Iurisprudence, la Medecine & les autres sciences apportent des honneurs & des richesses a ceux qui les cultiuent ; et enfin, qu’il est bon de les auoir toutes examinées, mesme les plus superstitieuses & les plus fausses, affin de connoistre leur iuste valeur, & se garder d’en estre trompé.

Mais lorsqu’on employe trop de tems a voyasger, on deuient enfin estranger en son païs ; & lorsqu’on est trop curieux des choses qui se pratiquoient aux siecles passez, on demeure ordinairement fort ignorant de celles qui se pratiquent en cetuycy.

Outre que les fables font imaginer plusieurs 7 euenemens comme possibles qui ne le sont point ; et que mesme les histoires les plus fideles, si elles ne changent ny n’augmentent la valeur des choses, pour les rendre plus dignes d’estre leuës, au moins en omettent elles presque tousiours les plus basses & moins illustres circonstances : d’où vient que le reste ne paroist pas tel qu’il est, & que ceux qui reglent leurs meurs par les exemples qu’ils en tirent, sont suiets a tomber dans les extrauagances des Paladins de nos romans, & a conceuoir des desseins qui passent leurs forces.

Ils esleuent fort haut les vertus, & les font paroistre estimables par dessus toutes les choses qui sont au monde ; mais ils n’enseignent pas assez a les connoistre, & souuent ce qu’ils appelent d’vn si beau nom, n’est qu’vne insensibilité, ou vn orgueil, ou vn desespoir, ou vn parricide.

Et enfin, pour les mauuaises doctrines, ie pensois desia connoistre assés ce qu’elles valoient, pour n’estre plus suiet a estre trompé, ny par les promesses d’vn Alchemiste, ni par les predictions d’vn Astrologue, ny par les impostures d’vn Magicien, ny par les artifices ou la venterie d’aucun de ceux qui font profession de sçauoir plus qu’ils ne sçauent.

Car il me sembloit que ie pourrois rencontrer beaucoup plus de verité, dans les raisonnemens que chascun fait touchant les affaires qui luy importent, & dont l’euenement 10 le doit punir bientost aprés, s’il a mal iugé, que dans ceux que fait vn homme de lettres dans son cabinet, touchant des speculations qui ne produisent aucun effect, & qui ne luy sont d’autre consequence, sinon que peutestre il en tirera d’autant plus de vanité qu’elles seront plus eslolgnées du sens commun, a cause qu’il aura deu employer d’autant plus d’esprit & d’artifice a tascher de les rendre vraysemblables. Et i’auois tousiours vn extreme desir d’apprendre a distinguer le vray d’auec le faux, pour voir clair en mes actions, & marcher auec assurance en cete vie.

Mais aprés que i’eu employé quelques années a estudier ainsi dans le liure du monde, & a tascher d’acquerir quelque experience, ie pris vn iour resolution d’estudier aussy en moymesme, & d’employer toutes les forces de mon esprit a choysir les chemins que ie deuois suiure. Ce qui me reussit beaucoup 11 mieux, ce me semble, que si ie ne me fusse iamais esloigné, ny de mon païs, ny de mes liures.

Ainsi voit on que les bastimens qu’vn seul Architecte a entrepris & acheuez, ont coustume d’estre plus beaux & mieux ordonnez, que ceux que plusieurs ont tasché de racommoder, en faisant seruir de vieilles murailles qui auoient esté basties a d’autres fins.

Ainsi ces ancienes citez, qui, n’ayant esté au commencement que des bourgades, sont deuenuës, par succession de tems, de grandes villes, sont ordinairement si mal compassées, au pris de ces places regulieres qu’vn Ingenieur trace a sa fantaisie dans vne plaine, qu’encore que, considerant leurs edifices chascun a part, on y trouue souuent autant ou plus d’art qu’en ceux des autres, toutefois, a voir comme ils sont arrangez, icy vn grand, là vn petit, & comme ils rendent les rues courbées & inesgales, on 12 diroit que c’est plutost la fortune, que la volonté de quelques hommes vsans de raison, qui les a ainsi disposez.

Et si on considere qu’il y a eu neanmoins de tout tems quelques officiers, qui ont eu charge de prendre garde aux bastimens des particuliers, pour les faire seruir a l’ornement du public, on connoistra bien qu’il est malaysé, en ne trauaillant que sur les ouurages d’autruy, de faire des choses fort accomplies. Ainsi ie m’imaginay que les peuples qui, ayant esté autrefois [à demi non civilisés], & ne s’estant ciuilisez que peu a peu, n’ont fait leurs loix qu’a mesure que l’incommodité des crimes & des querelles les y a contrains, ne sçauroient estre si bien policez que ceux qui, dés le commencement qu’ils se sont assemblez, ont obserué les constitutions de quelque prudent Legislateur.

Comme il est bien certain que l’estat de la vraye Religion, dont Dieu seul a fait les ordonnances, doit estre incomparablement mieux réglé que tous les autres. Et pour parler des choses humaines, ie croy que, si Sparte a esté autrefois tres florissante, ce n’a pas esté a cause de la bonté de chascune de ses loix en particulier, vû que plusieurs estoient fort estranges, & mesme contraires aux bonnes meurs, mais a cause que, n’ayant esté inuentées que par vn seul, elles tendoient toutes a mesme fin.

Et ainsi ie pensay que les sciences des liures, au moins celles dont les raisons ne sont que probables, & qui n’ont aucunes demonstrations, s’estant composées & grossies peu a peu des opinions de plusieurs diuerses personnes, ne sont point si approchantes de la verité, que les simples raisonnemens que peut faire naturellement vn homme 13 de bon sens touchant les choses qui se présentent.

Et ainsi encore ie pensay que, pource que nous auons tous esté enfans auant que d’estre hommes, & qu’il nous a fallu long tems estre gouuernez par nos appetis & nos Precepteurs, qui estoient souuent contraires les vns aux autres, & qui, ny les vns ny les autres, ne nous conseilloient peutestre pas tousiours le meilleur, il est presqu’impossible que nos iugemens soient si purs, ny si solides qu’ils auroient esté, si nous auions eu l’vsage entier de nostre raison dés le point de nostre naissance, & que nous n’eussions iamais esté conduits que par elle.

A l’exemple de quoy ie me persuaday, qu’il n’y auroit veritablement point d’apparence qu’vn particulier fist dessein de reformer vn Estat, en y changeant tout dés les fondemens, & en le renuersant pour le redresser ; ny mesme aussy de reformer le cors des sciences, ou l’ordre establi dans les escholes pour les enseigner ; mais que, pour toutes les opinions que i’auois receuës iusques alors en ma creance, ie ne pouuois mieux faire que d’entreprendre, vne bonne fois, de les en oster, affin d’y en remettre par aprés, ou d’autres meilleures, ou bien les mesmes, lorsque ie les aurois 14 aiustées au niueau de la raison.

Et ie creu fermement que, par ce moyen, ie reussirois a conduire ma vie beaucoup mieux que si ie ne bastissois que sur de vieux fondemens, & que ie ne m’appuiasse que sur les principes que ie m’estois laissé persuader en ma ieunesse, sans auoir iamais examiné s’ils estoient vrais. Car, bien que ie remarquasse en cecy diuerses difficultez, elles n’estoient point toutefois sans remede, ny comparables a celles qui se trouuent en la reformation des moindres choses qui touchent le public. Ces grans cors sont trop malaysez a releuer, estant abatus, ou mesme a retenir, estant esbranslez, & leurs cheutes ne peuuent estre que tres rudes.

Puis, pour leurs imperfections, s’ils en ont, comme la seule diuersité qui est entre eux suffit pour assurer que plusieurs en ont, l’vsage les a sans doute fort adoucies ; & mesme il en a euité ou corrigé insensiblement quantité, ausquelles on ne pourroit si bien pouruoir par prudence. Et enfin, elles sont quasi tousiours plus supportables que ne seroit leur changement : en mesme façon que les grans chemins, qui tournoyent entre des montaignes, deuienent peu a peu si vnis & si commodes, a force d’estre frequentez, qu’il est beaucoup meilleur de les suiure, que d’entreprendre d’aller plus droit, en grimpant au dessus des rochers, & descendant iusques au bas des precipices.

Que si, mon ouurage m’ayant assez pleu, ie vous en fais voir icy le modelle, ce n’est pas, pour cela, que ie veuille conseiller a personne de l’imiter. Ceux que Dieu a mieux partagez de ses graces, auront peutestre des desseins plus releuez ; mais ie crains bien que cetuy-cy ne soit desia que trop hardi pour plusieurs. La seule resolution de se défaire de toutes les opinions qu’on a receuës auparauant en sa creance, n’est pas vn exemple que chascun doiue suiure ; et le monde n’est quasi composé que de deux sortes d’espris ausquels il ne conuient aucunement.

A sçauoir, de ceux qui, se croyans plus habiles qu’ils ne sont, ne se peuuent empescher de precipiter leurs iugemens, ny auoir assez de patience pour conduire par ordre toutes leurs pensées : d’où vient que, s’ils auoient vne fois pris la liberté de douter des principes qu’ils ont receus, & de s’escarter du chemin commun, iamais ils ne pourroient tenir le sentier qu’il faut prendre pour aller plus droit, & demeureroient esgarez toute leur vie.

Puis, de ceux qui, ayant assez de raison, ou de modestie, pour iuger qu’ils sont moins capables de distinguer le vray d’auec le faux, que quelques autres par lesquels ils peuuent estre instruits, doiuent bien plutost se contenter de suiure les opinions de ces autres, qu’en chercher eux mesmes de meilleures.

Mais ayant appris, dés le College, qu’on ne sçauroit rien imaginer de si estrange & si peu croyable, qu’il n’ait esté dit par quelqu’vn des Philosophes ; et depuis, en voyasgeant, ayant reconnu que tous ceux qui ont des sentimens fort contraires aux nostres, ne sont pas, pour cela, barbares ny [non civilisés], mais que plusieurs vsent, autant ou plus que nous, de raison ; et ayant consideré combien vn mesme homme, auec son mesme esprit, estant norri dés son enfance entre des François ou des Allemans, deuient different de ce qu’il seroit, s’il auoit tousiours vescu entre des Chinois ou des Canibales ;

et comment, iusques aux modes de nos habits, la mesme chose qui nous a plû il a dix ans, & qui nous plaira peutestre encore auant dix ans, nous semble maintenant extrauagante & ridicule : en sorte que c’est bien plus la coustume & l’exemple qui nous persuade, qu’aucune connoissance certaine, & que neanmoins la pluralité des voix n’est pas vne preuue qui vaille rien, pour les veritez vn peu malaysées a découurir, a cause qu’il est bien plus vraysemblable qu’vn homme seul les ait rencontrées que tout vn peuple : ie ne pouuois choisir personne dont les opinions me semblassent deuoir estre preferées a celles des autres, & ie me trouuay comme contraint d’entreprendre moymesme de me conduire.

Et bien que elle contiene, en effect, beaucoup de preceptes tres vrais & tres bons, il y en a toutefois tant d’autres, meslez parmi, qui sont ou nuisibles ou superflus, qu’il est presque aussy malaysé de les en separer, que de tirer vne Diane ou vne Minerue hors d’vn bloc de marbre qui n’est point encore esbauché.

Puis, pour l’Analyse des anciens & l’Algebre des modernes, outre qu’elles ne s’estendent qu’a des matieres fort abstractes, & qui ne semblent d’aucun vsage, la premiere est tousiours si astrainte a la consideration des figures, qu’elle ne peut exercer 18 l’entendement sans fatiguer beaucoup l’imagination ; et on s’est tellement assuieti, en la derniere, a certaines reigles & a certains chiffres, qu’on en a fait vn art confus & obscur, qui embarrasse l’esprit, au lieu d’vne science qui le cultiue. Ce qui fut cause que ie pensay qu’il falloit chercher quelque autre Methode, qui, comprenant les auantages de ces trois, fust exempte de leurs defaux.

Et ie ne fus pas beaucoup en peine de chercher par lesquelles il estoit besoin de commencer : car ie sçauois desia que c’estoit par les plus simples & les plus aysées a connoistre ; & considerant qu’entre tous ceux qui ont cy deuant recherché la verité dans les sciences, il n’y a eu que les seuls Mathematiciens qui ont pû trouuer quelques demonstrations, c’est a dire quelques raisons certaines & euidentes, ie ne doutois point que ce ne fust par les mesmes qu’ils ont examinées ; bien que ie n’en esperasse aucune autre vtilité, sinon qu’elles accoustumeroient mon esprit a se repaistre de veritez, & ne se contenter point de fausses raisons.

Mais ie n’eu pas dessein, pour cela, de tascher d’apprendre toutes ces sciences particulieres, qu’on nomme communement Mathematiques ; & 20 voyant qu’encore que leurs obiets soient differens, elles ne laissent pas de s’accorder toutes, en ce qu’elles n’y considerent autre chose que les diuers rappors ou proportions qui s’y trouuent, ie pensay qu’il valoit mieux que i’examinasse seulement ces proportions en general, & sans les supposer que dans les suiets qui seruiroient a m’en rendre la connoissance plus aysée ; mesme aussy sans les y astreindre aucunement, affin de les pouuoir d’autant mieux appliquer aprés a tous les autres ausquels elles conuiendroient.

Puis, ayant pris garde que, pour les connoistre, i’aurois quelquefois besoin de les considerer chascune en particulier, & quelquefois seulement de les retenir, ou de les comprendre plusieurs ensemble, ie pensay que, pour les considerer mieux en particulier, ie les deuois supposer en des lignes, a cause que ie ne trouuois rien de plus simple, ny que ie pûsse plus distinctement representer a mon imagination & a mes sens ; mais que, pour les retenir, ou les comprendre plusieurs ensemble, il falloit que ie les expliquasse par quelques chiffres, les plus courts qu’il seroit possible ; et que, par ce moyen, i’emprunterois tout le meilleur de l’Analyse Geometrique & de l’Algebre, & corrigerois tous les defaus de l’vne par l’autre.

En quoy ie ne vous paroistray peutestre pas estre fort vain, si vous considerez que, n’y ayant qu’vne verité de chasque chose, quiconque la trouue en sçait autant qu’on en peut sçauoir ; et que, par exemple, vn enfant instruit en l’Arithmetique, ayant fait vne addition suiuant ses reigles, se peut assurer d’auoir trouué, touchant la somme qu’il examinoit, tout ce que l’esprit humain sçauroit trouuer. Car enfin la Methode qui enseigne a suiure le vray ordre, & a denombrer exactement toutes les circonstances de ce qu’on cherche, contient tout ce qui donne de la certitude aux reigles d’Arithmetique.

Mais, ayant pris garde que leurs principes deuoient tous estre empruntez de 22 la Philosophie, en laquelle ie n’en trouuois point encore de certains, ie pensay qu’il faloit, auant tout, que ie taschasse d’y en establir ; & que, cela estant la chose du monde la plus importante, & où la Precipitation & la Preuention estoient le plus a craindre, ie ne deuois point entreprendre d’en venir a bout, que ie n’eusse attaint vn aage bien plus meur que celuy de vingt trois ans, que i’auois alors ; et que ie n’eusse, auparauant, employé beaucoup de tems a m’y preparer, tant en deracinant de mon esprit toutes les mauuaises opinions que i’y auois receuës auant ce tems là, qu’en faisant amas de plusieurs experiences, pour estre aprés la matiere de mes raisonnemens, & en m’exerçant tousiours en la Methode que ie m’estois prescrite, affin de m’y affermir de plus en plus.

Et encore qu’il y en ait peutestre d’aussy bien sensez, parmi les Perses ou les Chinois, que parmi nous, il me sembloit que le plus vtile estoit de me regler selon ceux auec lesquels i’aurois a viure ; et que, pour sçauoir quelles estoient veritablement leurs opinions, ie deuois plutost prendre garde a ce qu’ils prattiquoient qu’a ce qu’ils disoient ; non seulement a cause qu’en la corruption de nos mœurs il y a peu de gens qui veuillent dire tout ce qu’ils croyent, mais aussy a cause que plusieurs l’ignorent eux mesmes ; car l’action de la pensée par laquelle on croit vne chose, estant differente de celle par laquelle on connoist qu’on la croit, elles sont souuent l’vne sans l’autre.

Et entre plusieurs opinions esgalement receuës, ie ne choisissois que les plus moderées : tant a cause que ce sont tousiours les plus commodes pour la prattique, & vraysemblablement les meilleures, tous excés ayant coustume d’estre mauuais ; comme aussy affin de me détourner moins du vray chemin, en cas que ie faillisse, que si, ayant choisi l’vn des extremes, c’eust esté l’autre qu’il eust fallu suiure. Et, 24 particulierement, ie mettois entre les excés toutes les promesses par lesquelles on retranche quelque chose de sa liberté.

Non que ie desaprouuasse les lois qui, pour remedier a l’inconstance des esprits foibles, permettent, lorsqu’on a quelque bon dessein, ou mesme, pour la seureté du commerce, quelque dessein qui n’est qu’indifferent, qu’on face des vœux ou des contrats qui obligent a y perseuerer ; mais a cause que ie ne voyois au monde aucune chose qui demeurast tousiours en mesme estat, & que, pour mon particulier, ie me promettois de perfectionner de plus en plus mes iugemens, & non point de les rendre pires, i’eusse pensé commettre vne grande faute contre le bon sens, si, pour ce que i’approuuois alors quelque chose, ie me fusse obligé de la prendre pour bonne encore aprés, lorsqu’elle auroit peutestre cessé de l’estre, ou que i’aurois cessé de l’estimer telle.

Imitant en cecy les voyasgeurs qui, se trouuant esgarez en quelque forest, ne doiuent pas errer en tournoyant, tantost d’vn costé, tantost d’vn autre, ny encore moins s’arester en vne place, mais marcher tousiours le plus droit qu’ils peuuent vers vn mesme costé, & ne le changer point pour de foibles raisons, encore que ce n’ait peutestre esté au commencement que le hasard seul qui les ait determinez a le choisir : car, par ce moyen, s’ils ne vont iustement où ils desirent, ils arriueront 25 au moins a la fin quelque part, où vraysemblablement ils seront mieux que dans le milieu d’vne forest.

Et ainsi, les actions de la vie ne souffrant souuent aucun delay, c’est vne verité tres certaine que, lorsqu’il n’est pas en nostre pouuoir de discerner les plus vrayes opinions, nous deuons suiure les plus probables ; et mesme, qu’encore que nous ne remarquions point dauantage de probabilité aux vnes qu’aux autres, nous deuons neanmoins nous determiner a quelques vnes, & les considerer aprés, non plus comme douteuses, en tant qu’elles se rapportent a la prattique, mais comme tres vrayes & tres certaines, a cause que la raison qui nous y a fait determiner, se trouue telle.

Et cecy fut capable dés lors de me deliurer de tous les repentirs & les remors, qui ont coustume d’agiter les consciences de ces espris foibles & chancelans, qui se laissent aller inconstanment a prattiquer, comme bonnes, les choses qu’ils iugent aprés estre mauuaises.

Car nostre volonté ne se portant naturellement a 26 desirer que les choses que nostre entendement luy represente en quelque façon comme possibles, il est certain que, si nous considerons tous les biens qui sont hors de nous comme esgalement esloignez de nostre pouuoir, nous n’aurons pas plus de regret de manquer de ceux qui semblent estre deus a nostre naissance, lorsque nous en serons priuez sans nostre faute, que nous auons de ne posseder pas les royaumes de la Chine ou de Mexique ; & que faisant, comme on dit, de necessité vertu, nous ne desirerons pas dauantage d’estre sains, estant malades, ou d’estre libres, estant en prison, que nous faisons maintenant d’auoir des cors d’vne matiere aussy peu corruptible que les diamans, ou des ailes pour voler comme les oiseaux.

Mais i’auouë qu’il est besoin d’vn long exercice, & d’vne meditation souuent reïterée, pour s’accoustumer a regarder de ce biais toutes les choses ; et ie croy que c’est principalement en cecy que consistoit le secret de ces Philosophes, qui ont pû autrefois se soustraire de l’empire de la Fortune, & malgré les douleurs & la pauureté, disputer de la felicité auec leurs Dieux.

Car s’occupant sans cesse a considerer les bornes qui leur estoient prescrites par la Nature, ils se persuadoient si parfaitement que rien n’estoit en leur pouuoir que leurs pensées, que cela seul estoit suffisant pour les empescher d’auoir aucune affection pour d’autres choses ; & ils disposoient d’elles si absolument, qu’ils auoient en cela quelque raison de s’estimer plus riches, & plus puissans, & plus libres, & plus hureux, qu’aucun des autres hommes, qui n’ayant point cete Philosophie, tant 27 fauorisez de la Nature & de la Fortune qu’ils puissent estre, ne disposent iamais ainsi de tout ce qu’ils veulent.

I’auois esprouué de si extremes contentemens, depuis que i’auois commencé a me seruir de cete Methode, que ie ne croyois pas qu’on en pust receuoir de plus doux, ny de plus innocens, en cete vie ; et descouurant tous les iours par son moyen quelques veritez, qui me sembloient assez importantes, & communement ignorées des autres hommes, la satisfaction que i’en auois remplissoit tellement mon esprit que tout le reste ne me touchoit point.

Outre que les trois maximes precedentes n’estoient fondées que sur le dessein que i’auois de continuer a m’instruire : car Dieu nous ayant donné a chascun quelque lumiere pour discerner le vray d’auec le faux, ie n’eusse pas creu me deuoir contenter des opinions d’autruy vn seul moment, si ie ne me fusse proposé d’employer mon propre iugement a les examiner, lorsqu’il seroit tems ; et ie n’eusse sceu m’exemter de scrupule, en les suiuant, si ie n’eusse esperé de ne perdre pour cela aucune occasion d’en trouuer de meilleures, en cas qu’il 28 y en eust.

Et enfin ie n’eusse sceu borner mes desirs, ny estre content, si ie n’eusse suiui vn chemin par lequel, pensant estre assuré de l’acquisition de toutes les connoissances dont ie serois capable, ie le pensois estre, par mesme moyen, de celle de tous les vrais biens qui seroient iamais en mon pouuoir ; d’autant que, nostre volonté ne se portant a suiure ny a fuir aucune chose, que selon que nostre entendement la luy represente bonne ou mauuaise, il suffit de bien iuger, pour bien faire, & de iuger le mieux qu’on puisse, pour faire aussy tout son mieux, c’est a dire, pour acquerir toutes les vertus, & ensemble tous les autres biens, qu’on puisse acquerir ; & lorsqu’on est certain que cela est, on ne sçauroit manquer d’estre content.

Et en toutes les neuf années suiuantes, ie ne fi autre chose que rouler çà & là dans le monde, taschant d’y estre spectateur plutost qu’acteur en toutes les Comedies qui s’y iouent ; et faisant particulierement reflexion, en chasque matiere, sur ce qui la pouuoit rendre suspecte, & nous donner occasion de nous mesprendre, ie déracinois cependant de mon esprit toutes les erreurs qui s’y estoient pû 29 glisser auparauant. Non que i’imitasse pour cela les Sceptiques, qui ne doutent que pour douter, & affectent d’estre tousiours irresolus : car, au contraire, tout mon dessein ne tendoit qu’a m’assurer, & a reietter la terre mouuante & le sable, pour trouuer le roc ou l’argile.

Ce qui me reussissoit, ce me semble, assez bien, d’autant que, taschant a descouurir la fausseté ou l’incertitude des propositions que i’examinois, non par de foibles coniectures, mais par des raisonnemens clairs & assurez, ie n’en rencontrois point de si douteuses, que ie n’en tirasse tousiours quelque conclusion assez certaine, quand ce n’eust esté que cela mesme qu’elle ne contenoit rien de certain. Et comme en abatant vn vieux logis, on en reserue ordinairement les demolitions, pour seruir a en bastir vn nouueau ; ainsi, en détruisant toutes celles de mes opinions que ie iugeois estre mal fondées, ie faisois diuerses obseruations, & acquerois plusieurs experiences, qui m’ont serui depuis a en establir de plus certaines.

Et de plus, ie continuois a m’exercer en la Methode que ie m’estois prescrite ; car, outre que i’auois soin de conduire generalement toutes mes pensées selon ses reigles, ie me reseruois de tems en tems quelques heures, que i’employois particulierement a la prattiquer en des difficultez de Mathematique, ou mesme aussy en quelques autres que ie pouuois rendre quasi semblables a celles des Mathematiques, en les détachant de tous les principes des autres sciences, que ie ne trouuois pas assez fermes, comme vous verrés que i’ay fait en plusieurs qui sont expliquées en ce volume.

Et ainsi, sans viure d’autre 30 façon, en apparence, que ceux qui, n’ayant aucun employ qu’a passer vne vie douce & innocente, s’estudient a separer les plaisirs des vices, & qui, pour iouir de leur loysir sans s’ennuyer, vsent de tous les diuertissemens qui sont honnestes, ie ne laissois pas de poursuiure en mon dessein, & de profiter en la connoissance de la verité, peutestre plus que si ie n’eusse fait que lire des liures, ou frequenter des gens de lettres.

Ie ne sçaurois pas dire sur quoy ils fondoient cete opinion ; & si i’y ay contribué quelque chose par mes discours, ce doit auoir esté en confessant plus ingenuëment ce que i’ignorois, que n’ont coustume de faire ceux qui ont vn peu estudié, & peutestre aussy en faisant voir les raisons que i’auois de douter de beaucoup de choses que les autres estiment certaines, plutost qu’en me vantant d’aucune doctrine.

Mais ayant le cœur assez bon pour ne vouloir point qu’on me prist pour autre que ie n’estois, ie pensay qu’il faloit que ie taschasse, par tous moyens, a me rendre digne de la reputation 31 qu’on me donnoit ; et il y a iustement huit ans, que ce desir me fit resoudre a m’esloigner de tous les lieux ou ie pouuois auoir des connoissances, & a me retirer icy, en vn païs où la longue durée de la guerre a fait establir de tels ordres, que les armées qu’on y entretient ne semblent seruir qu’a faire qu’on y iouisse des fruits de la paix auec d’autant plus de seureté, & où parmi la foule d’vn grand peuple fort actif, & plus soigneux de ses propres affaires, que curieux de celles d’autruy, sans manquer d’aucune des commoditez qui sont dans les villes les plus frequentées, i’ay pû viure aussy solitaire & retiré que dans les desers les plus escartez.

I’auois dés long temps remarqué que, pour les meurs, il est besoin quelquefois de suiure des opinions qu’on sçait estre fort incertaines, tout de mesme que si elles estoient indubitables, ainsi qu’il a esté dit cy-dessus ; mais, pourcequ’alors ie desirois vacquer seulement a la recherche de la verité, ie pensay qu’il faloit que ie fisse tout le contraire, & que ie reiettasse, comme absolument faux, tout ce en quoy ie pourrois imaginer le moindre doute, affin de voir s’il ne resteroit point, apres cela, quelque chose en ma creance, qui fust entierement indubitable. Ainsi, a 32 cause que nos sens nous trompent quelquefois, ie voulû supposer qu’il n’y auoit aucune chose qui fust telle qu’ils nous la font imaginer.

Et pourcequ’il y a des hommes qui se méprenent en raisonnant, mesme touchant les plus simples matieres de Geometrie, & y font des Paralogismes, iugeant que i’estois suiet a faillir, autant qu’aucun autre, ie reiettay comme fausses toutes les raisons que i’auois prises auparauant pour Demonstrations. Et enfin, considerant que toutes les mesmes pensées, que nous auons estant esueillez, nous peuuent aussy venir, quand nous dormons, sans qu’il y en ait aucune, pour lors, qui soit vraye, ie me resolu de feindre que toutes les choses qui m’estoient iamais entrées en l’esprit, n’estoient non plus vrayes que les illusions de mes songes.

En sorte que ce Moy, c’est a dire, l’Ame par laquelle ie suis ce que ie suis, est entierement distincte du cors, & mesme qu’elle est plus aisée a connoistre que luy, & qu’encore qu’il ne fust point, elle ne lairroit pas d’estre tout ce qu’elle est.

Pour ce qui est des pensées que i’auois de plusieurs autres choses hors de moy, comme du ciel, de la terre, de la lumiere, de la chaleur, & de milles autres, ie n’estois point tant en peine de sçauoir d’où elles venoient, a cause que, ne remarquant rien en elles qui me semblast les rendre superieures a moy, ie pouuois croyre que, si elles estoient vrayes, c’estoient des dependances de ma nature, en tant qu’elle auoit quelque perfection ; & si elles ne l’estoient pas, que ie les tenois du neant, c’est a dire, qu’elles estoient en moy, pourceque i’auois du defaut.

Mais ce ne pouuoit estre le mesme de l’idée d’vn estre plus parfait que le mien : car, de la tenir du neant, c’estoit chose manifestement impossible ; et pourcequ’il n’y a pas moins de repugnance que le plus parfait soit vne suite & vne dependance du moins parfait, qu’il y en a que de rien procede quelque chose, ie ne la pouuois tenir non plus de moy mesme. De façon qu’il restoit qu’elle eust esté mise en moy par vne nature qui fust veritablement plus parfaite que ie n’estois, & mesme qui eust en soy toutes les perfections dont ie pouuois auoir quelque idée, c’est a dire, pour m’expliquer en vn mot, qui fust Dieu.

A quoy i’adioustay que, puisque ie connoissois quelques perfections que ie n’auois point, ie n’estois pas le seul estre qui existast (i’vseray, s’il vous plaist, icy librement des mots de l’Eschole), mais qu’il falloit, de necessité, qu’il y en eust quelque autre plus parfait, duquel ie dependisse, & duquel i’eusse acquis tout ce que i’auois. Car, si i’eusse esté seul & independant de tout autre, en sorte que i’eusse eu, 35 de moy mesme, tout ce peu que ie participois de l’estre parfait, i’eusse pû auoir de moy, par mesme raison, tout le surplus que ie connoissois me manquer, & ainsi estre moy mesme infini, eternel, immuable, tout connoissant, tout puissant, & enfin auoir toutes les perfections que ie pouuois remarquer estre en Dieu.

Car, suiuant les raisonnemens que ie viens de faire, pour connoistre la nature de Dieu, autant que la miene en estoit capable, ie n’auois qu’a considerer de toutes les choses dont ie trouuois en moy quelque idée, si c’estoit perfection, ou non, de les posseder, & i’estois assuré qu’aucune de celles qui marquoient quelque imperfection, n’estoit en luy, mais que toutes les autres y estoient. Comme ie voyois que le doute, l’inconstance, la tristesse, & choses semblables, n’y pouuoient estre, vû que i’eusse esté moy mesme bien ayse d’en estre exempt.

Puis, outre cela, i’auois des idées de plusieurs choses sensibles & corporelles : car, quoy que ie supposasse que ie resuois, & que tout ce que ie voyois ou imaginois estoit faux, ie ne pouuois nier toutefois que les idées n’en fussent veritablement en ma pensée ; mais pourceque i’auois desia connu en moy tres clairement que la nature intelligente est distincte de la corporelle, considerant que toute composition tesmoigne de la dependance, & que la dependance est manifestement vn defaut, ie iugeois de la, que ce ne pouuoit estre vne perfection en Dieu d’estre composé de ces deux natures, & que, par consequent, il ne l’estoit pas ; mais que, s’il y auoit quelques cors dans le monde, ou bien quelques intelligences, ou autres natures, qui ne fussent point toutes 36 parfaites, leur estre deuoit dependre de sa puissance, en telle sorte qu’elles ne pouuoient subsister sans luy vn seul moment.

Car, par exemple, ie voyois bien que, supposant vn triangle, il falloit que ses trois angles fussent esgaux a deux droits ; mais ie ne voyois rien pour cela qui m’assurast qu’il y eust au monde aucun triangle. Au lieu que, reuenant a examiner l’idée que i’auois d’vn Estre parfait, ie trouuois que l’existence y estoit comprise, en mesme façon qu’il est compris en celle d’vn triangle que ses trois angles sont esgaux a deux droits, ou en celle d’vne sphere que toutes ses parties sont esgalement distantes de son centre, ou mesme encore plus euidenment ; et que, par consequent, il est pour le moins aussy certain, que Dieu, qui est cet Estre parfait, est ou existe, qu’aucune demonstration de Geometrie le sçauroit estre.

Et il me semble que ceux qui veulent vser de leur imagination, pour les comprendre, font tout de mesme que si, pour ouïr les sons, ou sentir les odeurs, ils se vouloient seruir de leurs yeux : sinon qu’il y a encore cete difference, que le sens de la veuë ne nous assure pas moins de la verité de ses obiets, que font ceux de l’odorat ou de l’ouye ; au lieu que ny nostre imagination ny nos sens ne nous sçauroient iamais assurer d’aucune chose, si nostre entendement n’y interuient.

Car, encore qu’on ait vne assurance morale de ces choses, qui est telle, qu’il semble 38 qu’a moins que d’estre extrauagant, on n’en peut douter, toutefois aussy, a moins que d’estre déraisonnable, lorsqu’il est question d’vne certitude metaphysique, on ne peut nier que ce ne soit assés de suiet, pour n’en estre pas entierement assuré, que d’auoir pris garde qu’on peut, en mesme façon, s’imaginer, estant endormi, qu’on a vn autre cors, & qu’on voit d’autres astres, & vne autre terre, sans qu’il en soit rien. Car d’où sçait on que les pensées qui vienent en songe sont plutost fausses que les autres, vû que souuent elles ne sont pas moins viues & expresses ?

Et que les meilleurs esprits y estudient, tant qu’il leur plaira, ie ne croy pas qu’ils puissent donner aucune raison qui soit suffisante pour oster ce doute, s’ils ne presupposent l’existence de Dieu. Car, premierement, cela mesme que i’ay tantost pris pour vne reigle, a sçauoir que les choses que nous conceuons tres clairement & tres distinctement, sont toutes vrayes, n’est assuré qu’a cause que Dieu est ou existe, & qu’il est vn estre parfait, & que tout ce qui est en nous vient de luy. D’où il suit que nos idées ou notions, estant des choses reelles, & qui vienent de Dieu, en tout ce en quoy elles sont claires & distinctes, ne peuuent en cela estre que vrayes.

En sorte que, si nous en auons assez souuent qui contienent de la fausseté, ce ne peut estre que de celles, qui ont quelque chose de confus & obscur, a cause qu’en cela elles participent du neant, c’est a dire, qu’elles ne sont en nous ainsi confuses, qu’a cause que nous ne sommes pas tous parfaits. Et il est euident qu’il n’y a pas moins de repugnance que la fausseté ou 39 l’imperfection procede de Dieu, en tant que telle, qu’il y en a, que la verité ou la perfection procede du neant.

Mais si nous ne sçauions point que tout ce qui est en nous de reel & de vray, vient d’vn estre parfait & infini, pour claires & distinctes que fussent nos idées, nous n’aurions aucune raison qui nous assurast, qu’elles eussent la perfection d’estre vrayes.

Et pour l’erreur la plus ordinaire de nos songes, qui consiste en ce qu’ils nous representent diuers obiets en mesme façon que font nos sens exterieurs, n’importe pas qu’elle nous donne occasion de nous desfier de la verité de telles idées, a cause qu’elles peuuent aussy nous tromper assez souuent, sans que nous dormions : comme lorsque ceux qui ont la iaunisse voyent tout de couleur iaune, ou que les astres ou autres cors fort esloignez nous paroissent beaucoup plus petits qu’ils ne sont. Car enfin, soit que nous veillions, soit que nous dormions, nous ne nous deuons iamais laisser persuader qu’a l’euidence de nostre raison.

Et il est a remarquer que ie dis, de nostre raison, & non point, de nostre imagination ny de nos sens. Comme, encore que nous voyons le 40 soleil tres clairement, nous ne deuons pas iuger pour cela qu’il ne soit que de la grandeur que nous le voyons ; et nous pouuons bien imaginer distinctement vne teste de lion entée sur le cors d’vne cheure, sans qu’il faille conclure, pour cela, qu’il y ait au monde vne Chimere : car la raison ne nous dicte point que ce que nous voyons ou imaginons ainsi soit veritable.

Mais elle nous dicte bien que toutes nos idées ou notions doiuent auoir quelque fondement de verité ; car il ne seroit pas possible que Dieu, qui est tout parfait & tout veritable les eust mises en nous sans cela. Et pourceque nos raisonnemens ne sont iamais si euidens ny si entiers pendant le sommeil que pendant la veille, bien que quelquefois nos imaginations soient alors autant ou plus viues & expresses, elle nous dicte aussy que nos pensées ne pouuant estre toutes vrayes, a cause que nous ne sommes pas tous-parfaits, ce qu’elles ont de verité doit infalliblement se rencontrer en celles que nous auons estant esueillez, plutost qu’en nos songes.

Ie suis 41 tousiours demeuré ferme en la resolution que i’auois prise, de ne supposer aucun autre principe, que celuy dont ie vien de me seruir pour demonstrer l’existence de Dieu & de lame, & de ne receuoir aucune chose pour vraye, qui ne me semblast plus claire & plus certaine que n’auoient fait auparauant les demonstrations des Geometres.

Et neantmoins, i’ose dire que, non seulement i’ay trouué moyen de me satisfaire en peu de tems, touchant toutes les principales difficultez dont on a coustume de traiter en la Philosophie, mais aussy, que i’ay remarqué certaines loix, que Dieu a tellement establies en la nature, & dont il a imprimé de telles notions en nos ames, qu’aprés y auoir fait assez de reflexion, nous ne sçaurions douter qu’elles ne soient exactement obseruées, en tout ce qui est ou qui se fait dans le monde. Puis en considerant la suite de ces loix, il me semble auoir descouuert plusieurs veritez plus vtiles & plus importantes, que tout ce que i’auois appris auparauant, ou mesme esperé d’apprendre.

Mais, tout de mesme que les peintres, ne pouuant esgalement bien representer dans vn tableau plat toutes les diuerses faces d’vn cors solide, en choisissent vne des principales qu’ils mettent seule vers le iour, & ombrageant les 42 autres, ne les font paroistre, qu’en tant qu’on les peut voir en la regardant : ainsi, craignant de ne pouuoir mettre en mon discours tout ce que i’auois en la pensée, i’entrepris seulement d’y exposer bien amplement ce que ie conceuois de la Lumiere ; puis, a son occasion, d’y adiouster quelque chose du Soleil & des Estoiles fixes, a cause qu’elle en procede presque toute ; des Cieux, a cause qu’ils la transmettent ; des Planetes, des Cometes, & de la Terre, a cause qu’elles la font refleschir ; & en particulier de tous les Cors qui sont sur la terre, a cause qu’ils sont ou colorez, ou transparens, ou lumineux ; & enfin de l’Homme, a cause qu’il en est le spectateur.

Mesme, pour ombrager vn peu toutes ces choses, & pouuoir dire plus librement ce que i’en iugeois, sans estre obligé de suiure ny de refuter les opinions qui sont receuës entre les doctes, ie me resolu de laisser tout ce Monde icy a leurs disputes, & de parler seulement de ce qui arriueroit dans vn nouueau, si Dieu creoit maintenant quelque part, dans les Espaces Imaginaires, assez de matiere pour le composer, & qu’il agitast diuersement & sans ordre les diuerses parties de cete matiere, en sorte qu’il en composast vn Chaos aussy confus que les Poetes en puissent feindre, & que, par apres, il ne fist autre chose que prester son concours ordinaire a la Nature, & la laisser agir suiuant les Loix qu’il a establies.

Ainsi, premierement, ie descriuis cete Matiere, & taschay de la representer telle qu’il n’y a rien au monde, ce me semble, de plus clair ny plus intelligible, excepté ce qui a tantost esté dit de Dieu & de lame : car mesme ie supposay, expressement, qu’il 43 n’y auoit en elle aucune de ces Formes ou Qualitez dont on dispute dans les Escholes, ny generalement aucune chose, dont la connoissance ne fust si naturelle a nos ames, qu’on ne pust pas mesme feindre de l’ignorer.

De plus, ie fis voir quelles estoient les Loix de la Nature ; et sans appuier mes raisons sur aucun autre principe, que sur les perfections infinies de Dieu, ie taschay a demonstrer toutes celles dont on eust pu auoir quelque doute, & a faire voir qu’elles sont telles, qu’encore que Dieu auroit creé plusieurs mondes, il n’y en sçauroit auoir aucun, où elles manquassent d’estre obseruées.

Apres cela, ie monstray comment la plus grande part de la matiere de ce Chaos deuoit, en suite de ces loix, se disposer & s’arrenger d’vne certaine façon qui la rendoit semblable a nos Cieux ; comment, cependant, quelques vnes de ses parties deuoient composer vne Terre, & quelques vnes des Planetes & des Cometes, & quelques autres vn Soleil & des Estoiles fixes. Et icy, m’estendant sur le suiet de la lumiere, i’expliquay bien au long quelle estoit celle qui se deuoit trouuer dans le Soleil & les Estoiles, & comment de la elle trauersoit en vn instant les immenses espaces des cieux, & comment elle se refleschissoit des Planetes & des Cometes vers la Terre.

I’y adioustay aussy plusieurs choses, touchant la substance, la situation, les mouuemens & toutes les diuerses qualitez de ces Cieux & de ces Astres ; en sorte que ie pensois en dire assez, pour faire connoistre qu’il ne se remarque rien en ceux de ce monde, qui ne deust, ou du moins qui ne pûst, paroistre tout semblable en ceux du monde 44 que ie descriuois.

De là ie vins a parler particulierement de la Terre : comment, encore que i’eusse expressement supposé que Dieu n’auoit mis aucune pesanteur en la matiere dont elle estoit composée, toutes ses parties ne laissoient pas de tendre exactement vers son centre ; comment, y ayant de l’eau & de l’air sur sa superficie, la disposition des cieux & des astres, principalement de la Lune, y deuoit causer vn flus & reflus, qui fust semblable, en toutes ses circonstances, a celuy qui se remarque dans nos mers ; & outre cela vn certain cours, tant de l’eau que de l’air, du leuant vers le couchant, tel qu’on le remarque aussy entre les Tropiques ; comment les montaignes, les mers, les fontaines & les riuieres pouuoient naturellement s’y former, & les metaux y venir dans les mines, & les plantes y croistre dans les campaignes, & generalement tous les cors qu’on nomme meslez ou composez s’y engendrer.

Et entre autres choses, a cause qu’aprés les astres ie ne connois rien au monde que le feu qui produise de la lumiere, ie m’estudiay a faire entendre bien clairement tout ce qui appartient a sa nature, comment il se fait, comment il se nourrit ; comment il n’a quelquefois que de la chaleur sans lumiere, & quelquefois que de la lumiere sans chaleur ; comment il peut introduire diuerses couleurs en diuers cors, & diuerses autres qualitez ; comment il en fond quelques vns, & en durcit d’autres ; comment il les peut consumer presque tous, ou conuertir en cendres & en fumée ; et enfin, comment de ces cendres, par la seule violence de son action, il forme du verre : car cete transmutation de 45 cendres en verre me semblant estre aussy admirable qu’aucune autre qui se face en la nature, ie pris particulierement plaisir a la descrire.

Mais il est certain, & c’est vne opinion communement receuë entre les Theologiens, que l’action, par laquelle maintenant il le conserue, est toute la mesme que celle par laquelle il l’a creé ; de façon qu’encore qu’il ne lui auroit point donné, au commencement, d’autre forme que celle du Chaos, pouruû qu’ayant establi les Loix de la Nature, il luy prestast son concours, pour agir ainsi qu’elle a de coustume, on peut croyre, sans faire tort au miracle de la creation, que par cela seul toutes les choses qui sont purement materielles auroient pû, auec le tems, s’y rendre telles que nous les voyons a present.

Et leur nature est bien plus aysée a conceuoir, lorsqu’on les voit naistre peu a peu en cete sorte, que lorsqu’on ne les considere que toutes faites.

sans le composer d’autre matiere que de celle que i’auois descrite, & sans mettre en luy, au commencement, aucune ame raisonnable, ny aucune autre chose pour y seruir d’ame vegetante ou sensitiue, sinon qu’il excitast en son cœur vn de ces feux sans lumiere, que i’auois desia expliquez, & que ie ne conceuois point d’autre nature que celuy qui échaufe le foin, lorsqu’on l’a renfermé auant qu’il fust sec, ou qui fait bouillir les vins nouueaux, lorsqu’on les laisse cuuer sur la rape.

Car examinant les fonctions, qui pouuoient en suite de cela estre en ce cors, i’y trouuois exactement toutes celles qui peuuent estre en nous sans que nous y pensions, ny par consequent que nostre ame, c’est a dire, cete partie distincte du cors dont il a esté dit cy dessus que la nature n’est que de penser, y contribuë, & qui sont toutes les mesmes en quoy on peut dire que les animaux sans raison nous resemblent : sans que i’y en pûsse pour cela trouuer aucune, de celles qui, estant dependantes de la pensée, sont les seules qui nous apartienent en tant qu’hommes, au lieu que ie les y trouuois toutes par aprés, ayant supposé que Dieu creast vne ame raisonnable, & qu’il la ioignist a ce cors en certaine façon que ie descriuois.

Premierement, celle qui est dans son costé droit, a laquelle respondent deux tuyaux fort larges : a sçauoir la vene caue, qui est le principal receptacle du sang, & comme le tronc de l’arbre dont toutes les autres venes du cors sont les branches, & la vene arterieuse, qui a esté ainsi mal nommée, pourceque c’est en effect vne artere, laquelle prenant son origine du cœur, se diuise, aprés en estre sortie, en plusieurs branches qui se vont respandre partout dans les poumons.

Puis, celle qui est dans son costé gauche, a laquelle respondent en mesme façon deux tuyaux, qui sont autant ou plus larges que les precedens : a sçauoir l’artere veneuse, qui a esté aussy mal nommée, a cause qu’elle n’est autre chose qu’vne vene, laquelle vient des poumons, ou elle est diuisée en plusieurs branches, entrelacées auec celles de la vene arterieuse, & celles de ce conduit qu’on nomme le sifflet, par où entre l’air de la respiration ; & la grande artere, qui, sortant du cœur, enuoye ses branches par tout le cors.

Ie voudrois aussy qu’on leur montrast soigneusement les onze petites peaux, qui, comme autant de petites portes, ouurent & ferment les quatre ouuertures qui sont en ces deux concauitez : a 48 sçauoir, trois a l’entrée de la vene caue, où elles sont tellement disposées, qu’elles ne peuuent aucunement empescher que le sang qu’elle contient ne coule dans la concauité droite du cœur, & toutefois empeschent exactement qu’il n’en puisse sortir ; trois a l’entrée de la vene arterieuse, qui, estant disposées tout au contraire, permetent bien au sang, qui est dans cete concauité, de passer dans les poumons, mais non pas a celuy qui est dans les poumons d’y retourner ; & ainsi deux autres a l’entrée de l’artere veneuse, qui laissent couler le sang des poumons vers la concauité gauche du cœur, mais s’opposent a son retour ; & trois a l’entrée de la grande artere, qui luy permetent de sortir du cœur, mais l’empeschent d’y retourner.

Et il n’est point besoin de chercher d’autre raison du nombre de ces peaux, sinon que l’ouuerture de l’artere veneuse, estant en ouale a cause du lieu ou elle se rencontre, peut estre commodement fermée auec deux, au lieu que les autres, estant rondes, le peuuent mieux estre auec trois.

De plus, ie voudrois qu’on leur fist considerer que la grande artere & la vene arterieuse sont d’vne composition beaucoup plus dure & plus ferme, que ne sont l’artere veneuse & la vene caue ; & que ces deux derniers s’eslargissent auant que d’entrer dans le cœur, & y font comme deux bourses, nommées les oreilles du cœur, qui sont composées d’vne chair semblable à la siene ; et qu’il y a tousiours plus de chaleur dans le cœur, qu’en aucun autre endroit du cors ; et enfin, que cete chaleur est capable de faire que, s’il entre quelque goutte de sang en ses concauitez, elle s’enfle promtement & se 49 dilate, ainsi que font generalement toutes les liqueurs, lorsqu’on les laisse tomber goutte a goutte en quelque vaisseau qui est fort chaud.

et continuant a se rarefier de plus en plus, elles poussent & ouurent les six autres petites portes, qui sont aux entrées des deux autres vaisseaux par où elles sortent, faisant enfler par ce moyen toutes les branches de la vene arterieuse & de la grande artere, quasi au mesme instant que le cœur ; lequel, incontinent aprés, se desenfle, comme font aussy ces arteres, a cause que le sang qui y est entré s’y refroidist, & leurs six petites portes se referment, & les cinq de la vene caue & de l’artere veneuse se rouurent, & donnent passage a 50 deux autres gouttes de sang, qui font derechef enfler le cœur & les arteres, tout de mesme que les precedentes.

Et pourceque le sang, qui entre ainsi dans le cœur, passe par ces deux bourses qu’on nomme ses oreilles, de là vient que leur mouuement est contraire au sien, & qu’elles se desenflent, lorsqu’il s’enfle. Au reste, affin que ceux qui ne connoissent pas la force des demonstrations Mathematiques, & ne sont pas accoutumez a distinguer les vrayes raisons des vraysemblables, ne se hasardent pas de nier cecy sans l’examiner, ie les veux auertir que ce mouuement, que ie vien d’expliquer, suit aussy necessairement de la seule disposition des organes qu’on peut voir a l’œil dans le cœur, & de la chaleur qu’on y peut sentir auec les doigts, & de la nature du sang qu’on peut connoistre par experience, que fait celuy d’vn horologe, de la force, de la situation, & de la figure de ses contrepois & de ses rouës.

Ce qu’il prouue fort bien, par l’experience ordinaire des chirurgiens, qui ayant lié le bras mediocrement fort, au dessus de l’endroit où ils ouurent la vene, font que le sang en sort plus abondamment que s’ils ne l’auoient point lié. Et il arriueroit tout le contraire, s’ils le lioient au dessous, entre la main & l’ouuerture, ou bien, qu’ils le liassent tres fort au-dessus.

Car il est manifeste que le lien mediocrement serré, pouuant empescher que le sang qui est desia dans le bras ne retourne vers le cœur par les venes, n’empesche pas pour cela qu’il n’y en viene tousiours de nouueau par les arteres, a cause qu’elles sont situées au dessous des venes, & que leurs peaux, estant plus dures, sont moins aysées a presser, & aussy que le sang qui vient du cœur tend auec plus de force a passer par elles vers la main, qu’il ne fait a retourner de là vers le cœur par les venes.

Et puisque ce sang sort du bras par l’ouuerture qui est en l’vne des venes, il doit necessairement y auoir quelques passages au-dessous du lien, c’est a dire vers les extremitez du bras, par où il y puisse venir des arteres.

Il prouue aussy fort bien ce qu’il dit du cours du sang, par certaines petites peaux, qui sont tellement disposées en diuers lieux le long des venes, qu’elles ne luy permetent point d’y passer du milieu du cors vers les extremitez, mais seulement de retourner des extremitez vers le cœur ; et de plus, par l’experience qui monstre que tout celuy qui est dans le cors en peut sortir en fort peu de tems par vne seule artere, lorsqu’elle est coupée, encore mesme qu’elle fust estroitement liée fort proche du cœur, & coupée entre luy & le lien, en sorte qu’on 52 n’eust aucun suiet d’imaginer que le sang qui en sortiroit vint d’ailleurs.

Puis la dureté des peaux, dont la vene arterieuse & la grande artere sont composées, monstre assez que le sang bat contre elles auec plus de force que contre les venes. Et pourquoy la concauité gauche du cœur & la grande artere seroient elles plus amples & plus larges, que la concauité droite & la vene arterieuse ? Si ce n’estoit que le sang de l’artere veneuse, n’ayant esté que dans les poumons depuis qu’il a passé par le cœur, est plus subtil & se rarefie plus fort & plus aysement, que celuy qui vient immediatement de la vene caue.

Et qu’est-ce que les medecins peuuent deuiner, en tastant le pouls, s’ils ne sçauent que, selon que le sang change de nature, il peut estre rarefié par la chaleur du cœur plus ou moins fort, & plus ou moins viste qu’auparauant ? Et si on examine comment cette chaleur se communique aux autres membres, ne faut-il pas auouër que c’est 53 par le moyen du sang, qui passant par le cœur s’y reschauffe, & se respand de là par tout le cors.

D’où vient que, si on oste le sang de quelque partie, on en oste par mesme moyen la chaleur ; et encore que le cœur fust aussy ardent qu’vn fer embrasé, il ne suffiroit pas pour reschauffer les pieds & les mains tant qu’il fait, s’il n’y enuoyoit continuellement de nouueau sang.

Puis aussy on connoist de là, que le vray vsage de la respiration est d’apporter assez d’air frais dans le poumon, pour faire que le sang, qui y vient de la concauité droite du cœur, où il a esté rarefié & comme changé en vapeurs, s’y espaississe, & conuertisse en sang derechef, auant que de retomber dans la gauche, sans quoy il ne pourroit estre propre a seruir de nouriture au feu qui y est.

Ce qui se confirme, parce qu’on void que les animaux qui n’ont point de poumons, n’ont aussy qu’vne seule concauité dans le cœur, & que les enfans, qui n’en peuuent vser pendant qu’ils sont renfermez au ventre de leurs meres, ont vne ouuerture par où il coule du sang de la vene caue en la concauité gauche du cœur, & vn conduit par où il en vient de la vene arterieuse en la grande artere, sans passer par le poumon. Puis la coction, comment se feroit-elle en l’estomac, si le cœur n’y enuoyoit de la chaleur par les arteres, & auec cela quelques vnes des plus coulantes parties du sang, qui aydent a dissoudre les viandes qu’on y a mises ?

Et l’action qui conuertist le suc de ces viandes en sang, n’est elle pas aysée a connoistre, si on considere qu’il se distile, en passant & repassant par le cœur, peutestre par plus de cent ou deux cent fois en chasque iour ?

Et qu’a-t-on besoin d’autre chose, 54 pour expliquer la nutrition, & la production des diuerses humeurs qui sont dans le cors, sinon de dire que la force, dont le sang en se rarefiant passe du cœur vers les extremitez des arteres, fait que quelques vnes de ses parties s’arestent entre celles des membres où elles se trouuent, & y prenent la place de quelques autres quelles en chassent ; et que, selon la situation, ou la figure, ou la petitesse des pores qu’elles rencontrent, les vnes se vont rendre en certains lieux plutost que les autres, en mesme façon que chascun peut auoir vû diuers cribles, qui estant diuersement percez seruent a separer diuers grains les vns des autres ?

Et enfin ce qu’il y a de plus remarquable en tout cecy, c’est la generation des esprits animaux, qui sont comme vn vent tres subtil, ou plutost comme vne flame tres pure & tres viue, qui, montant continuellement en grande abondance du cœur dans le cerueau, se va rendre de là par les nerfs dans les muscles, & donne le mouuement a tous les membres ; sans qu’il faille imaginer d’autre cause, qui face que les parties du sang, qui, estant les plus agitées & les plus penetrantes, sont les plus propres a composer ces esprits, se vont rendre plutost vers le cerueau que vers ailleurs ;

sinon que les arteres, qui les y portent, sont celles qui vienent du cœur le plus en ligne droite de toutes, & que, selon les regles des Mechaniques, qui sont les mesmes que celles de la nature, lorsque plusieurs choses tendent ensemble a se mouuoir vers vn mesme costé, où il n’y a pas assez de place pour toutes, ainsi que les parties du sang qui sortent de la concauité gauche du cœur tendent vers le cerueau, 55 les plus foibles & moins agitées en doiuent estre détournées par les plus fortes, qui par ce moyen s’y vont rendre seules.

comment la faim, la soif, & les autres passions interieures, y peuuent aussy enuoyer les leurs ; ce qui doit y estre pris pour le sens commun, où ces idées sont receuës ; pour la memoire, qui les conserue ; & pour la fantaisie, qui les peut diuersement changer, & en composer de nouuelles, & par mesme moyen, distribuant les espris animaux dans les muscles, faire mouuoir les membres de ce cors, en autant de diuerses façons, & autant a propos des obiets qui se presentent a ses sens, & des passions interieures qui sont en luy, que les nostres se puissent mouuoir, sans que la volonté les conduise.

Ce qui ne semblera nullement estrange a ceux qui, sçachant combien de diuers automates, ou machines mouuantes, l’industrie des hommes peut 56 faire, sans y employer que fort peu de pieces, a comparaison de la grande multitude des os, des muscles, des nerfs, des arteres, des venes, & de toutes les autres parties, qui sont dans le cors de chasque animal, considereront ce cors comme vne machine, qui, ayant esté faite des mains de Dieu, est incomparablement mieux ordonnée, & a en soy des mouuemens plus admirables, qu’aucune de celles qui peuuent estre inuentées par les hommes.

Car on peut bien conceuoir qu’vne machine soit tellement faite qu’elle profere des paroles, & mesme qu’elle en profere quelques vnes a propos des actions corporelles qui causeront quelque changement en ses organes : comme, si on la touche en quelque endroit, qu’elle demande ce qu’on luy veut dire ; si en vn autre, qu’elle crie qu’on luy fait mal, & choses semblables ; mais non pas qu’elle les arrenge diuersement, pour 57 respondre au sens de tout ce qui se dira en sa presence, ainsi que les hommes les plus hebetez peuuent faire.

Et le second est que, bien qu’elles fissent plusieurs choses aussy bien, ou peutestre mieux qu’aucun de nous, elles manqueroient infalliblement en quelques autres, par lesquelles on découuriroit quelles n’agiroient pas par connoissance, mais seulement par la disposition de leurs organes. Car, au lieu que la raison est vn instrument vniuersel, qui peut seruir en toutes sortes de rencontres, ces organes ont besoin de quelque particuliere disposition pour chaque action particuliere ; d’où vient qu’il est moralement impossible qu’il y en ait assez de diuers en vne machine, pour la faire agir en toutes les occurrences de la vie, de mesme façon que nostre raison nous fait agir.

Ce qui n’arriue pas de ce qu’ils ont faute d’organes, car on voit que les pies & les perroquets peuuent proferer des paroles ainsi que nous, & toutefois ne peuuent parler ainsi que nous, c’est a dire, en tesmoignant qu’ils pensent ce qu’ils disent ; au lieu que les hommes qui, estans nés sours & muets, sont priuez des organes qui seruent aux 58 autres pour parler, autant ou plus que les bestes, ont coustume d’inuenter d’eux mesmes quelques signes, par lesquels ils se font entendre a ceux qui, estans ordinairement auec eux, ont loysir d’apprendre leur langue. Et cecy ne tesmoigne pas seulement que les bestes ont moins de raison que les hommes, mais qu’elles n’en ont point du tout.

Car on voit qu’il n’en faut que fort peu, pour sçauoir parler ; & d’autant qu’on remarque de l’inesgalité entre les animaux d’vne mesme espece, aussy bien qu’entre les hommes, & que les vns sont plus aysez a dresser que les autres, il n’est pas croyable qu’vn singe ou vn perroquet, qui seroit des plus parfaits de son espece, n’égalast en cela vn enfant des plus stupides, ou du moins vn enfant qui auroit le cerueau troublé, si leur ame n’estoit d’vne nature du tout differente de la nostre.

Et on ne doit pas confondre les paroles auec les mouuemens naturels, qui tesmoignent les passions, & peuuent estre imitez par des machines aussy bien que par les animaux ; ny penser, comme quelques Anciens, que les bestes parlent, bien que nous n’entendions pas leur langage : car s’il estoit vray, puisqu’elles ont plusieurs organes qui se rapportent aux nostres, elles pourroient aussy bien se faire entendre a nous qu’a leurs semblables.

C’est aussy vne chose fort remarquable que, bien qu’il y ait plusieurs animaux qui tesmoignent plus d’industrie que nous en quelques vnes de leurs actions, on voit toutefois que les mesmes n’en tesmoignent point du tout en beaucoup d’autres : de façon que ce qu’ils font mieux que nous, ne prouue pas qu’ils ont de l’esprit ; car, a ce conte, ils en auroient plus qu’aucun de nous, & 59 feroient mieux en toute chose ; mais plutost qu’ils n’en ont point, & que c’est la Nature qui agist en eux, selon la disposition de leurs organes : ainsi qu’on voit qu’vn horologe, qui n’est composé que de rouës & de ressors, peut conter les heures, & mesurer le tems, plus iustement que nous auec toute nostre prudence.

Au reste, ie me suis icy vn peu estendu sur le suiet de l’ame, a cause qu’il est des plus importans ; car, aprés l’erreur de ceux qui nient Dieu, laquelle ie pense auoir cy dessus assez refutée, il n’y en a point qui esloigne plutost les esprits foibles du droit chemin de la vertu, que d’imaginer que l’ame des bestes soit de mesme nature que la nostre, & que, par consequent, nous n’auons rien a craindre, ny a esperer, aprés cete vie, non plus que les mousches & les fourmis ; au lieu que, lorsqu’on sçait combien elles different, on comprent beaucoup mieux les raisons, qui prouuent que la nostre est d’vne nature entierement independante du cors, & par consequent, qu’elle n’est point suiette a mourir auec luy ; puis, d’autant 60 qu’on ne voit point d’autres causes qui la destruisent, on est naturellement porté a iuger de là qu’elle est immortelle.

auant leur censure, que ie pusse imaginer estre preiudiciable ny a la Religion ny a l’Estat, ny, par consequent, qui m’eust empesché de l’escrire, si la raison me l’eust persuadée, & que cela me fit craindre qu’il ne s’en trouuast tout de mesme quelqu’vne entre les mienes, en laquelle ie me fusse mépris, nonobstant le grand soin que i’ay tousiours eu de n’en point receuoir de nouuelles en ma creance, dont ie n’eusse des demonstrations tres certaines, & de n’en point escrire, qui pussent tourner au desauantage de personne.

Ce qui a esté suffisant, pour m’obliger a changer la resolution que i’auois euë de les publier. Car, encore que les raisons, pour lesquelles ie l’auois prise auparauant, fussent tres fortes, mon inclination, qui m’a tousiours fait haïr le mestier de faire des liures, m’en fit incontinent trouuer assez d’autres, pour m’en excuser. Et ces raisons de part & d’autre sont telles, que non 61 seulement i’ay icy quelque interest de les dire, mais peut-estre aussy que le public en a de les sçauoir.

Car, pour ce qui touche les meurs, chascun abonde si fort en son sens, qu’il se pourroit trouuer autant de reformateurs que de testes, s’il estoit permis a d’autres qu’a ceux que Dieu a establis pour souuerains sur ses peuples, ou bien ausquels il a donné assez de grace & de zele pour estre prophetes, d’entreprendre d’y rien changer ; et bien que mes speculations me pleussent fort, i’ay creu que les autres en auoient aussy, qui leur plaisoient peut-estre dauantage.

Mais, sitost que i’ay eu acquis quelques notions generales touchant la Physique, & que, commençant a les esprouuer en diuerses difficultez particulieres, i’ay remarqué iusques où elles peuuent conduire, & combien elles different des principes dont on s’est serui iusques a present, i’ay creu que ie ne pouuois les tenir cachées, sans pecher grandement contre la loy qui nous oblige a procurer, autant qu’il est en nous, le bien general de tous les hommes.

Ce qui n’est pas seulement a desirer pour l’inuention d’vne infinité d’artifices, qui feroient qu’on iouiroit, sans aucune peine, des fruits de la terre & de toutes les commoditez qui s’y trouuent, mais principalement aussy pour la conseruation de la santé, laquelle est sans doute le premier bien, & le fondement de tous les autres biens de cete vie ; car mesme l’esprit depend si fort du temperament, & de la disposition des organes du cors, que s’il est possible de trouuer quelque moyen, qui rende communement les hommes plus sages & plus habiles qu’ils n’ont esté iusques icy, ie croy que c’est dans la Medecine qu’on doit le chercher.

Il est vray que celle qui est maintenant en vsage, contient peu de choses dont l’vtilité soit si remarquable ; mais, sans que i’aye aucun dessein de la mespriser, ie m’assure qu’il n’y a personne, mesme de ceux qui en font profession, qui n’auouë que tout ce qu’on y sçait n’est presque rien, a comparaison de ce qui reste a y sçauoir, & qu’on se pourroit exemter d’vne infinité de maladies, tant du cors que de l’esprit, & mesme aussy peutestre de l’affoiblissement de la vieillesse, si on auoit assez de connoissance de leurs causes, & de tous les remedes dont la Nature nous a pourueus.

Or, ayant dessein 63 d’employer toute ma vie a la recherche d’vne science si necessaire, & ayant rencontré vn chemin qui me semble tel qu’on doit infalliblement la trouuer, en le suiuant, si ce n’est qu’on en soit empesché, ou par la brieueté de la vie, ou par le defaut des experiences, ie iugeois qu’il n’y auoit point de meilleur remede contre ces deux empeschemens, que de communiquer fidellement au public tout le peu que i’aurois trouué, & de conuier les bons esprits a tascher de passer plus outre, en contribuant, chascun selon son inclination & son pouuoir, aux experiences qu’il faudroit faire, & communiquant aussy au public toutes les choses qu’ils apprendroient, affin que les derniers commençant ou les precedens auroient acheué, & ainsi ioignant les vies & les trauaux de plusieurs, nous allassions tous ensemble beaucoup plus loin, que chascun en particulier ne sçauroit faire.

Premierement, i’ay tasché de trouuer en general les 64 Principes, ou Premieres Causes, de tout ce qui est, ou qui peut estre, dans le monde, sans rien considerer, pour cet effect, que Dieu seul, qui l’a creé, ny les tirer d’ailleurs que de certaines semences de Veritez qui sont naturellement en nos ames. Aprés cela, i’ay examiné quels estoient les premiers & plus ordinaires effets qu’on pouuoit deduire de ces causes : et il me semble que, par la, i’ay trouué des Cieux, des Astres, vne Terre, & mesme, sur la terre, de l’Eau, de l’Air, du Feu, des Mineraux, & quelques autres telles choses, qui sont les plus communes de toutes & les plus simples, & par consequent les plus aysées a connoistre.

Puis, lorsque i’ay voulu descendre a celles qui estoient plus particulieres, il s’en est tant presenté a moy de diuerses, que ie n’ay pas creu qu’il fust possible a l’esprit humain de distinguer les Formes ou Especes de cors qui sont sur la terre, d’vne infinité d’autres qui pourroient y estre, si c’eust esté le vouloir de Dieu de les y mettre, ny, par consequent, de les rapporter a nostre vsage, si ce n’est qu’on viene au deuant des causes par les effets, & qu’on se serue de plusieurs experiences particulieres.

En suite de quoy, repassant mon esprit sur tous les obiets qui s’estoient iamais presentez a mes sens, i’ose bien dire que ie n’y ay remarqué aucune chose que ie ne peusse assez commodement expliquer par les Principes que i’auois trouuez. Mais il faut aussy que i’auouë, que la puissance de la Nature est si ample & si vaste, & que ces Principes sont si simples & si generaux, que ie ne remarque quasi plus aucun effect particulier, que d’abord ie ne connoisse qu’il peut en 65 estre deduit en plusieurs diuerses façons, & que ma plus grande difficulté est d’ordinaire de trouuer en laquelle de ces façons il en depend.

Car a cela ie ne sçay point d’autre expedient, que de chercher derechef quelques experiences, qui soient telles, que leur euenement ne soit pas le mesme, si c’est en l’vne de ces façons qu’on doit l’expliquer, que si c’est en l’autre.

Au reste, i’en suis maintenant la, que ie voy, ce me semble, assez bien de quel biaiz on se doit prendre a faire la plus part de celles qui peuuent seruir a cet effect ; mais ie voy aussy qu’elles sont telles, & en si grand nombre, que ny mes mains, ny mon reuenu, bien que i’en eusse mille fois plus que ie n’en ay, ne sçauroient suffire pour toutes ; en sorte que, selon que i’auray desormais la commodité d’en faire plus ou moins, i’auanceray aussy plus ou moins en la connoissance de la Nature.

Ce que ie me prometois de faire connoistre, par le traité que i’auois escrit, & d’y monstrer si clairement l’vtilité que le public en peut receuoir, que i’obligerois tous ceux qui desirent en general le bien des hommes, c’est a dire, tous ceux qui sont en effect vertueux, & non point par faux semblant, ny seulement par opinion, tant a me communiquer celles qu’ils ont desia faites, qu’a m’ayder en la recherche de celles qui restent a faire.

qu’affin de ne perdre aucune occasion de profiter au public, si i’en suis capable, & que, si mes escrits valent quelque chose, ceux qui les auront aprés ma mort, en puissent vser, ainsi qu’il sera le plus a propos ; mais que ie ne deuois aucunement consentir qu’ils fussent publiez pendant ma vie, affin que ny les oppositions & controuerses, ausquelles ils seroient peutestre suiets, ny mesme la reputation telle quelle, qu’ils me pourroient acquerir, ne me donnassent aucune occasion de perdre le tems que i’ay dessein d’employer a m’instruire.

Car, bien que il soit vray que chasque homme est obligé de procurer, autant qu’il est en luy, le bien des autres, & que c’est proprement ne valoir rien que de n’estre vtile a personne, toutefois il est vray aussy que nos soins se doiuent estendre plus loin que le tems present, & qu’il est bon d’omettre les choses qui apporteroient peutestre quelque profit a ceux qui viuent, lorsque c’est a dessein d’en faire d’autres qui en apportent dauantage a nos neueux.

Comme, en effect, ie veux bien qu’on sçache que le peu que i’ay appris iusques icy, n’est presque rien, a comparaison de ce que i’ignore, & que ie ne desespere pas de pouuoir apprendre ; car c’est quasi le mesme de ceux qui découurent peu a peu la verité dans les 67 sciences, que de ceux qui, commençant a deuenir riches, ont moins de peine a faire de grandes acquisitions, qu’ils n’ont eu auparauant, estant plus pauures, a en faire de beaucoup moindres.

Ou bien on peut les comparer aux chefs d’armée, dont les forces ont coustume de croistre a proportion de leurs victoires, & qui ont besoin de plus de conduite, pour se maintenir aprés la perte d’vne bataille, qu’ils n’ont, aprés l’auoir gaignée, a prendre des villes & des prouinces.

Car c’est veritablement donner des batailles, que de tascher a vaincre toutes les difficultez & les erreurs, qui nous empeschent de paruenir a la connoissance de la verité, & c’est en perdre vne, que de receuoir quelque fausse opinion, touchant vne matiere vn peu generale & importante ; il faut, aprés, beaucoup plus d’adresse, pour se remettre au mesme estat qu’on estoit auparauant, qu’il ne faut a faire de grans progrés, lorsqu’on a desia des principes qui sont assurez.

Pour moy, si i’ay cy deuant trouué quelques veritez dans les sciences (& i’espere que les choses qui sont contenuës en ce volume feront iuger que i’en ay trouué quelques vnes), ie puis dire que ce ne sont que des suites & des dependances de cinq ou six principales difficultez que i’ay surmontées, & que ie conte pour autant de batailles où i’ay eu l’heur de mon costé. Mesme ie ne craindray pas de dire, que ie pense n’auoir plus besoin d’en gaigner que deux ou trois autres semblables, pour venir entierement a bout de mes desseins ; et que mon aage n’est point si auancé que, selon le cours ordinaire de la Nature, ie ne puisse encore auoir assez de loysir pour cet effect.

Mais ie croy estre d’autant plus obligé a ménager le tems qui me reste, que i’ay plus d’esperance de le pouuoir bien employer ; et i’aurois sans doute plusieurs occasions de le perdre, si ie publiois les fondemens de ma Physique. Car, encore qu’ils soient presque tous si euidens, qu’il ne faut que les entendre pour les croire, & qu’il n’y en ait aucun, dont ie ne pense pouuoir donner des demonstrations, toutefois, a cause qu’il est impossible qu’ils soient accordans auec toutes les diuerses opinions des autres hommes, ie preuoy que ie serois souuent diuerti par les oppositions qu’ils feroient naistre.

Mais, encore que ie me reconnoisse extremement suiet a faillir, & que ie ne me fie quasi iamais aux premieres pensées qui me vienent, toutefois l’experience que i’ay des obiections qu’on me peut faire, m’empesche d’en esperer aucun profit : car i’ay desia souuent esprouué les iugemens, tant de ceux que i’ay tenus pour mes amis, que de quelques autres a qui ie pensois estre indifferent, & mesme aussy de quelques vns dont ie sçauois que la malignité & l’enuie tascheroit assez a découurir ce que l’affection cacheroit a mes amis ; mais il est rarement arriué qu’on m’ayt obiecté quelque chose que ie n’eusse point du tout preueuë, si ce n’est qu’elle fust 69 fort éloignée de mon suiet ; en sorte que ie n’ay quasi iamais rencontré aucun censeur de mes opinions, qui ne me semblast ou moins rigoureux, ou moins equitable, que moy mesme.

Et ie n’ay iamais remarqué non plus, que, par le moyen des disputes qui se pratiquent dans les escholes, on ait découuert aucune verité qu’on ignorast auparauant ; car, pendant que chascun tasche de vaincre, on s’exerce bien plus a faire valoir la vraysemblance, qu’a peser les raisons de part & d’autre ; & ceux qui ont esté long tems bons auocats, ne sont pas pour cela, par aprés, meilleurs iuges.

Ce qui est si veritable, en cete matiere, que, bien que i’aye souuent expliqué quelques vnes de mes opinions a des personnes de tres bon esprit, & qui, pendant que ie leur parlois, sembloient les entendre fort distinctement, toutefois, lorsqu’ils les ont redites, i’ay remarqué qu’ils les ont changées presque tousiours en telle sorte que ie ne les pouuois plus auouër pour mienes. A l’occasion de quoy ie suis 70 bien ayse de prier icy nos neueux, de ne croire iamais que les choses qu’on leur dira vienent de moy, lorsque ie ne les auray point moy mesme diuulguées.

Et ie ne m’estonne aucunement des extrauagances qu’on attribue a tous ces anciens Philosophes, dont nous n’auons point les escrits, ny ne iuge pas, pour cela, que leurs pensées ayent esté fort deraisonnables, veu qu’ils estoient des meilleurs esprits de leurs tems, mais seulement qu’on nous les a mal rapportées. Comme on voit aussy que presque iamais il n’est arriué qu’aucun de leurs sectateurs les ait surpassez ; et ie m’assure que les plus passionnez de ceux qui suiuent maintenant Aristote, se croyroient hureux, s’ils auoient autant de connoissance de la Nature qu’il en a eu, encore mesme que ce fust a condition qu’ils n’en auroient iamais dauantage.

Ils sont comme le lierre, qui ne tend point a monter plus haut que les arbres qui le soutienent, & mesme souuent qui redescend, aprés qu’il est paruenu iusques a leur faiste ; car il me semble aussy que ceux la redescendent, c’est-a-dire, se rendent en quelque façon moins sçauans que s’ils s’abstenoient d’estudier, lesquels, non contens de sçauoir tout ce qui est intelligiblement expliqué dans leur autheur, veulent, outre cela, y trouuer la solution de plusieurs difficultez, dont il ne dit rien & ausquelles il n’a peutestre iamais pensé.

Toutefois, leur façon de philosopher est fort commode, pour ceux qui n’ont que des esprits fort mediocres ; car l’obscurité des distinctions & des principes dont ils se seruent, est cause qu’ils peuuent parler de toutes choses aussy hardiment que s’ils les sçauoient, & soustenir tout ce qu’ils 71 en disent contre les plus subtils & les plus habiles, sans qu’on ait moyen de les conuaincre.

En quoy ils me semblent pareils a vn aueugle, qui, pour se battre sans desauantage contre vn qui voit, l’auroit fait venir dans le fonds de quelque caue fort obscure ; et ie puis dire que ceux cy ont interest que ie m’abstiene de publier les principes de la Philosophie dont ie me sers : car estans tres simples & tres euidens, comme ils sont, ie ferois quasi le mesme, en les publiant, que si i’ouurois quelques fenestres, & faisois entrer du iour dans cete caue, ou ils sont descendus pour se battre.

Mais mesme les meilleurs esprits n’ont pas occasion de souhaiter de les connoistre : car, s’ils veulent sçauoir parler de toutes choses, & acquerir la reputation d’estre doctes, ils y paruiendront plus aysement en se contentant de la vraysemblance, qui peut estre trouuée sans grande peine en toutes sortes de matieres, qu’en cherchant la verité, qui ne se découure que peu a peu en quelques vnes, & qui, lorsqu’il est question de parler des autres, oblige a confesser franchement qu’on les ignore.

Que s’ils preferent la connoissance de quelque peu de veritez a la vanité de paroistre n’ignorer rien, comme sans doute elle est bien preferable, & qu’il vueillent suiure vn dessein semblable au mien, ils n’ont pas besoin, pour cela, que ie leur die rien dauantage que ce que i’ay desia dit en ce discours. Car, s’ils sont capables de passer plus outre que ie n’ay fait, ils le seront aussy, a plus forte raison, de trouuer d’eux mesmes tout ce que ie pense auoir trouué.

D’autant que, n’ayant iamais rien examiné que par ordre, il est certain que ce qui me reste encore a découurir, est 72 de soy plus difficile & plus caché, que ce que i’ay pû cy deuant rencontrer, & ils auroient bien moins de plaisir a l’apprendre de moy que d’eux mesmes ; outre que l’habitude qu’ils acquerront, en cherchant premierement des choses faciles, & passant peu a peu par degrez a d’autres plus difficiles, leur seruira plus que toutes mes instructions ne sçauroient faire.

Comme, pour moy, ie me persuade que, si on m’eust enseigné, dés ma ieunesse, toutes les veritez dont i’ay cherché depuis les demonstrations, & que ie n’eusse eu aucune peine a les apprendre, ie n’en aurois peutestre iamais sceu aucunes autres, & du moins que iamais ie n’aurois acquis l’habitude & la facilité, que ie pense auoir, d’en trouuer tousiours de nouuelles, a mesure que ie m’applique a les chercher. Et en vn mot, s’il y a au monde quelque ouurage, qui ne puisse estre si bien acheué par aucun autre que par le mesme qui l’a commencé, c’est celuy auquel ie trauaille.

Car, pour les volontaires, qui, par curiosité ou desir d’apprendre, s’offriroient peutestre de luy ayder, outre qu’ils ont pour l’ordinaire plus de promesses que d’effect, & qu’ils ne font que de belles propositions dont aucune iamais ne reüssit, ils 73 voudroient infalliblement estre payez par l’explication de quelques difficultez, ou du moins par des complimens & des entretiens inutiles, qui ne luy sçauroient couster si peu de son tems qu’il n’y perdist.

Et pour les experiences que les autres ont desia faites, quand bien mesme ils les luy voudroient communiquer, ce que ceux qui les nomment des secrets ne feroient iamais, elles sont, pour la pluspart, composées de tant de circonstances, ou d’ingrediens superflus, qu’il luy seroit tres malaysé d’en déchiffrer la verité ; outre qu’il les trouueroit presque toutes si mal expliquées, ou mesme si fausses, a cause que ceux qui les ont faites se sont efforcez de les faire paroistre conformes a leurs principes, que, s’il y en auoit quelques vnes qui luy seruissent, elles ne pourroient derechef valoir le tems qu’il luy faudroit employer a les choisir.

De façon que, s’il y auoit au monde quelqu’vn, qu’on sceust assurement estre capable de trouuer les plus grandes choses, & les plus vtiles au public qui puissent estre, & que, pour cete cause, les autres hommes s’efforçassent, par tous moyens, de l’ayder a venir a bout de ses desseins, ie ne voy pas qu’ils peussent autre chose pour luy, sinon fournir aux frais des experiences dont il auroit besoin, & du reste empescher que son loisir ne luy fust osté par l’importunité de personne.

Mais, outre que ie ne presume pas tant de moy mesme, que de vouloir rien promettre d’extraordinaire, ny ne me repais point de pensées si vaines, que de m’imaginer que le public se doiue beaucoup interesser en mes desseins, ie n’ay pas aussy l’ame si basse, que ie voulusse accepter de qui que ce fust 74 aucune faueur, qu’on pust croyre que ie n’aurois pas meritée.

La premiere est que, si i’y manquois, plusieurs, qui ont sceu l’intention que i’auois euë cy deuant de faire imprimer quelques escrits, pourroient s’imaginer que les causes pour lesquelles ie m’en abstiens, seroient plus a mon desauantage qu’elles ne sont.

Car, bien que ie n’ayme pas la gloire par excés, ou mesme, si ie l’ose dire, que ie la haïsse, en tant que ie la iuge contraire au repos, lequel i’estime sur toutes choses, toutefois aussy ie n’ay iamais tasché de cacher mes actions comme des crimes, ny n’ay vsé de beaucoup de precautions pour estre inconnu ; tant a cause que i’eusse creu me faire tort, qu’a cause que cela m’auroit donné quelque espece d’inquietude, qui eust derechef esté contraire au parfait repos d’esprit que ie cherche.

Et pourceque, m’estant tousiours ainsi tenu indifferent entre le soin d’estre connu ou ne l’estre pas, ie n’ay pû empescher que ie n’acquisse quelque sorte de reputation, i’ay pensé que ie deuois faire mon mieux pour m’exempter au moins de l’auoir mauuaise.

L’autre raison, qui m’a obligé a escrire 75 cecy, est que, voyant tous les iours de plus en plus le retardement que souffre le dessein que i’ay de m’instruire, a cause d’vne infinité d’experiences dont i’ay besoin, & qu’il est impossible que ie face sans l’ayde d’autruy, bien que ie ne me flatte pas tant que d’esperer que le public prene grande part en mes interests, toutefois ie ne veux pas aussy me defaillir tant a moy-mesme, que de donner suiet a ceux qui me suruiuront, de me reprocher quelque iour, que i’eusse pû leur laisser plusieurs choses beaucoup meilleures que ie n’auray fait, si ie n’eusse point trop negligé de leur faire entendre en quoy ils pouuoient contribuer a mes desseins.

En quoy ie ne sçaurois dire si i’ay reussi, & ie ne veux point preuenir les iugemens de personne, en parlant moy-mesme de mes escrits ; mais ie seray bien ayse qu’on les examine, & affin qu’on en ait d’autant plus d’occasion, ie supplie tous ceux qui auront quelques obiections a y faire, de prendre la peine de les enuoyer a mon libraire, par lequel en estant auerti, ie tascheray d’y ioindre ma response en mesme tems ; & par ce moyen les lecteurs, voyant ensemble l’vn & l’autre, iugeront d’autant plus aysement de la verité.

Car ie ne promets pas d’y faire iamais de longues responses, mais seulement d’auouër mes fautes fort franchement, si ie les connois, ou 76 bien, si ie ne les puis aperceuoir, de dire simplement ce que ie croyray estre requis, pour la defence des choses que i’ay escrites, sans y adiouster l’explication d’aucune nouuelle matiere, affin de ne me pas engager sans fin de l’vne en l’autre.

Et on ne doit pas imaginer que ie commette en cecy la faute que les Logiciens nomment vn cercle ; car l’experience rendant la plus part de ces effets tres certains, les causes dont ie les deduits ne seruent pas tant a les prouuer qu’a les expliquer ; mais, tout au contraire, ce sont elles qui sont prouuées par eux.

Et ie ne les ay nommées des suppositions, qu’affin qu’on sçache que ie pense les pouuoir deduire de ces premieres veritez que i’ay cy dessus expliquées, mais que i’ay voulu expressement ne le pas faire, pour empescher que certains esprits, qui s’imaginent qu’ils sçauent en vn iour tout ce qu’vn autre a pensé en vingt années, si tost qu’il leur en a seulement dit deux ou trois mots, & qui sont d’autant plus suiets a faillir, & moins capables de la verité, qu’ils sont plus penetrans & plus vifs, ne puissent de 77 la prendre occasion de bastir quelque Philosophie extrauagante sur ce qu’ils croyront estre mes principes, & qu’on m’en attribue la faute.

Car, pour les opinions qui sont toutes mienes, ie ne les excuse point comme nouuelles, d’autant que, si on en considere bien les raisons, ie m’assure qu’on les trouuera si simples, & si conformes au sens commun, qu’elles sembleront moins extraordinaires, & moins estranges, qu’aucunes autres qu’on puisse auoir sur mesmes suiets. Et ie ne me vante point aussy d’estre le premier Inuenteur d’aucunes, mais bien, que ie ne les ay iamais receuës, ny pource qu’elles auoient esté dites par d’autres, ny pource qu’elles ne l’auoient point esté, mais seulement pource que la raison me les a persuadées.

Et si i’escris en François, qui est la langue de mon païs, plutost qu’en Latin, qui est celle de mes Precepteurs, c’est a cause que i’espere que ceux qui ne se seruent que de leur raison naturelle toute pure, iugeront mieux de mes opinions, que ceux qui ne croyent qu’aux liures anciens. Et pour ceux qui ioignent le bon sens auec l’estude, lesquels seuls ie souhaite pour 78 mes iuges, ils ne seront point, ie m’asseure, si partiaux pour le Latin, qu’ils refusent d’entendre mes raisons, pourceque ie les explique en langue vulgaire.

De quoy ie fais icy vne declaration, que ie sçay bien ne pouuoir seruir a me rendre considerable dans le monde, mais aussy n’ay ie aucunement enuie de l’estre ; et ie me tiendray tousiours plus obligé a ceux, par la faueur desquels ie iouiray sans empeschement de mon loisir, que ie ne serois a ceux qui m’offriroient les plus honorables emplois de la terre.