Correspondence with Descartes

ElisabethI’ay appris, auec beaucoup de ioye & de regret, l’intention que vous auez eu de me voir, passé quelques iours, touchée également de vostre charité de vous vouloir communiquer a vne personne ignorante & indocile, & du malheur qui m’a detourbé vne conuersation si profitable. M. Pallotti a fort augmenté cette dernière passion, en me répétant les solutions que vous lui auez donné des obscurités contenues dans la physique de M. Rhegius, desquelles i’aurois esté mieux instruite de vostre bouche, comme aussi d’vne question que ie proposay audit professeur, III 661 lorsqu’il fut en cette ville, dont il me renuoya a vous pour en receuoir la satisfaction requise.

Vous cognoissant le meilleur medecin pour la mienne, ie vous descouure si librement les foiblesses de ses speculations, & espere qu’obseruant le serment d’Hipocrates vous y apporterez des remedes, sans les publier ; ce que vous prie de faire, comme de souffrir ces importunités de

Vostre affectionee amie a vous seruir, Élisabeth. Monsieur Descartes. Ce 6 de May.

DescartesMadame,

La faueur dont vostre Altesse m’a honoré, en me faisant receuoir ses commandemens par escrit, est plus grande que ie n’eusse iamais osé esperer ; & elle soulage mieux mes defauts que celle que i’auois souhaitée auec passion, qui estoit de les receuoir de bouche, III 664 si i’eusse pû estre admis à l’honneur de vous faire la reuerence, & de vous offrir mes tres-humbles seruices, lors que i’estois dernierement à la Haye.

Et ie puis dire, auec verité, que la question que vostre Altesse propose, me semble estre celle qu’on me peut demander auec le plus de raison, en suite des escrits que i’ay publiez. Car, y ayant deux choses en l’ame humaine, desquelles depend toute la connoissance que nous pouuons auoir de sa nature, l’vne desquelles est qu’elle pense, l’autre, qu’estant vnie au cors, elle peut agir & patir auec luy ; ie n’ay quasi rien dit de cette derniere, & me suis seulement estudié III 665 à faire bien entendre la premiere, à cause que mon principal dessein estoit de prouuer la distinction qui est entre l’ame & le corps ; à quoy celle-cy seulement a pû seruir, & l’autre y auroit esté nuisible.

Premierement, ie considere qu’il y a en nous certaines notions primitiues, qui sont comme des originaux, sur le patron desquels nous formons toutes nos autres connoissances. Et il n’y a que fort peu de telles notions ; car, apres les plus generales, de l’estre, du nombre, de la durée &c., qui conuiennent à tout ce que nous pouuons conceuoir, nous n’auons, pour le corps en particulier, que la notion de l’extension, de laquelle suiuent celles de la figure & du mouuement ; & pour l’ame seule, nous n’auons que celle de la pensée, en laquelle sont comprises les perceptions de l’entendement & les inclinations de la volonté ; enfin, pour l’ame & le corps ensemble, nous n’auons que celle de leur vnion, de laquelle depend celle de la force qu’a l’ame de mouuoir le corps, & le corps d’agir sur l’ame, en causant ses sentimens & ses passions.

Ie considere aussi que toute la science des hommes ne consiste qu’à bien distinguer ces notions, & à n’attribuer chacune d’elles qu’aux choses ausquelles elles appartiennent. Car, lors que nous voulons expliquer III 666 quelque difficulté par le moyen d’vne notion qui ne luy appartient pas, nous ne pouuons manquer de nous mesprendre ; comme aussi lors que nous voulons expliquer vne de ces notions par vne autre ; car, estant primitiues, chacune d’elles ne peut estre entenduë que par elle mesme.

C’est pourquoy, puis que, dans les Meditations que vostre Altesse a daigné lire, i’ay tasché de faire conceuoir les notions qui appartiennent à l’ame seule, les distinguant de celles qui appartiennent au corps seul, la premiere chose que ie dois expliquer en suite, est la façon de conceuoir celles qui appartiennent à l’vnion de l’ame auec le corps, sans celles qui appartiennent au corps seul, ou à l’ame seule.

Ainsi ie croy que nous auons cy-deuant confondu la notion de la force dont l’ame agit dans le corps, auec celle dont vn corps agit dans vn autre ; & que nous auons attribué l’vne & l’autre, non pas à l’ame, car nous ne la connoissions pas encore, mais aux diuerses qualitez des corps, comme à la pesanteur, à la chaleur, & aux autres, que nous auons imaginé estre reelles, c’est à dire auoir vne existance distincte de celle du corps, & par consequent estre des substances, bien que nous les ayons nommées des qualitez.

Ie tesmoignerois ne pas assez connoistre l’incomparable esprit de vostre Altesse, si i’employois dauantage de paroles à m’expliquer, & ie serois trop presomptueux, si i’osois penser que ma response la doiue entierement satisfaire ; mais ie tascheray d’euiter l’vn & l’autre, en n’adioustant rien icy de plus, sinon que, si ie suis capable d’escrire ou de dire quelque chose qui luy puisse agreer, ie tiendray tousiours à tres grande faueur de prendre la plume, ou d’aller à la Haye, pour ce suiet, & qu’il n’y a rien au monde qui me soit si cher que de pouuoir obeïr à ses commandemens.

ElisabethMonsieur Descartes,

Votre bonté ne paroist pas seulement en me montrant & corrigeant les defauts de mon raisonnement, comme ie l’auois entendu, mais aussi que, pour me rendre leur cognoissance moins fascheuse, vous taschez de m’en consoler, au preiudice de vostre iugement, par de fausses louanges qui auroient esté necessaires, pour m’encourager de trauailler au remede, si ma nourriture, en vn lieu où la fasson ordinaire de conuerser m’a accoutumé d’en entendre des personnes incapables d’en donner de veritables, ne m’auoit fait presumer ne pouuoir faillir en croyant le contraire de leur discours, & par la rendre la consideration de mes imperfections si familiere, qu’elle ne me donne plus qu’autant d’emotion qu’il m’en faut pour le desir de m’en defaire.

Cela me fait confesser, sans honte, d’auoir trouué en III 684 moy toutes les causes d’erreur que vous remarquez en vostre lettre, & de ne les pouuoir encore bannir entierement, puisque la vie que ie suis contrainte de mener, ne me laisse la disposition d’assez de tems pour acquerir vne habitude de meditation selon vos regles.

Mais, depuis que vous auez entrepris de m’instruire, ie n’entretiens ces sentimens que comme des amis que ie ne crois point conseruer, m’asseurant que vous m’expliquerez aussi bien la nature d’vne substance immaterielle & la maniere de ses actions & passions dans le corps, que toutes les autres choses que vous auez voulu enseigner. Ie vous prie aussi de croire que vous ne pouuez faire cette charité a personne, qui soit plus sensible de l’obligation qu’elle vous en a, que

Vostre tres affectionnée amie, Élisabeth. Ce 10me de Iuin. Monsieur Descartes.

DescartesMadame,

I’ay tres-grande obligation à vostre Altesse de ce que, apres auoir éprouué que ie me suis mal expliqué en mes precedentes, touchant la question qu’il luy a plû me proposer, elle daigne encore auoir la patience III 691 de m’entendre sur le mesme suiet, & me donner occasion de remarquer les choses que l’auois obmises.

Premierement, donc, ie remarque vne grande difference entre ces trois sortes de notions, en ce que l’ame ne se conçoit que par l’entendement pur ; le corps, c’est à dire l’extention, les figures & les mouuemens, se peuuent aussi connoistre par l’entendement seul, mais beaucoup mieux par l’entendement aidé de l’imagination ; et enfin, les choses qui appartiennent à l’vnion de l’ame & du corps, ne se connois III 692 sent qu’obscurement par l’entendement seul, ny mesme par l’entendement aidé de l’imagination ; mais elles se connoissent tres-clairement par les sens.

I’ay quasi peur que vostre Altesse ne pense que ie ne parle pas icy serieusement ; mais cela seroit contraire au respect que ie luy dois, & que ie ne manqueray iamais de lui rendre. Et ie puis dire, auec verité, que la principale regle que i’ay tousiours obseruée en mes études, & celle que ie croy m’auoir le plus seruy pour acquerir quelque connoissance, a esté que ie n’ay iamais employé que fort peu d’heures, par iour, aux pensées qui occupent l’imagination, & fort peu d’heures, par an, à celles qui occupent l’entendement III 693 seul, & que i’ay donné tout le reste de mon temps au relasche des sens & au repos de l’esprit ; mesme ie conte, entre les exercices de l’imagination, toutes les conuersations serieuses, & tout ce à quoy il faut auoir de l’attention.

Mais, puis que vostre Altesse remarque qu’il est plus facile d’attribuer de la matiere & de l’extension à l’ame, que de luy attribuer la capacité de mouuoir vn corps & d’en estre muë, sans auoir de matiere, ie la supplie de vouloir librement attribuer cette matiere & cette extension à l’ame ; car cela n’est autre chose que la conceuoir vnie au corps.

Enfin, comme ie croy qu’il est tres-necessaire d’auoir bien compris, vne fois en sa vie, les principes de la Metaphysique, à cause que ce sont eux qui nous donnent la connoissance de Dieu & de nostre ame, ie croy aussi qu’il seroit tres-nuisible d’occuper souuent son entendement à les mediter, à cause qu’il ne pourroit si bien vacquer aux fonctions de l’imagination & des sens ; mais que le meilleur est de se contenter de retenir en sa memoire & en sa creance les conclusions qu’on en a vne fois tirées, puis employer le reste du temps qu’on a pour l’étude, aux pensées où l’entendement agit auec l’imagination & les sens.

L’extreme deuotion que l’ay au seruice de vostre Altesse, me fait esperer que ma franchise ne luy sera pas desagreable, & elle n’auroit engage icy en vn plus long discours, où l’eusse tasché d’éclaircir à cette fois toutes les difficultez de la question proposée ; mais vne fascheuse nouuelle que ie viens d’aprendre d’Vtrech, où le Magistrat me cite, pour verifier ce que i’ay écrit d’vn de leurs Ministres, combien que ce soit vn homme qui m’a calomnié tres indignement, & que ce que i’ay écrit de luy, pour ma iuste défene, ne soit que trop notoire à tout le monde, me contraint de finir icy, pour aller consulter les moyens de me tirer, le plutost que ie pourray, de ces chicaneries. Ie suis, &c.

ElisabethMonsieur Descartes,

I’aprehende que vous ne receuiez autant d’incommodité, par mon estime de vos instructions & le desir de m’en preualoir, que par l’ingratitude de ceux qui s’en priuent eux-mesmes & en voudroient priuer le genre humain ; & ne vous aurois enuoyé vn nouuel effet de mon IV 2 ignorance, auant que ie vous seusse dechargé de ceux de leur opiniastreté, si le sieur Van Bergen ne m’y eust obligé plus tost, par sa ciuilité de vouloir demeurer en cette ville, iusqu’a ce que ie luy donnerais vne response a vostre lettre du 28e de iuin, qui me fait voir clairement les trois sortes de notions que nous auons, leurs obiets, & comment on s’en doit seruir.

Ie trouue aussi que les sens me montrent que l’ame meut le corps, mais ne m’enseignent point (non plus que l’Entendement & l’Imagination) la fasson dont elle le fait. Et, pour cela, ie pense qu’il y a des proprietés de l’ame, qui nous sont inconnues, qui pourront peut estre renuerser ce que vos Meditations Metaphysiques m’ont persuadée, par de si bonnes raisons, de l’inextention de l’ame. Et ce doute semble estre fondé sur la regle que vous y donnez en parlant du vray & du faux, & que toute l’erreur nous vient de former des iugements de ce que nous ne perceuons assez.

Encore que ie vous doiue cette confession, pour vous en rendre grace, ie la croirois fort imprudente, si ie ne connoissois vostre bonté & generosité, esgale au resre de vos merites, autant par l’experience que i’en ay desia eue, que par reputation. Vous ne la pouuez tesmoigner d’vne fasson plus obligeante que par les esclaircissements & conseils dont vous me faites part, que ie prise au-dessus des plus grands tresors que pourroit posseder

Vostre tres-affectionnée amie a vous seruir, Élisabeth. Ce Ier de Iuillet. Monsieur Descartes.

DescartesMadame,

Ayant sceu de Monsieur de Pollot que Vostre Altesse a pris la peine de chercher la question des trois cercles, & qu’elle a trouué le moyen de la soudre, en ne supposant qu’une quantité inconnuë, i’ai pensé que mon deuoir m’obligeoit de mettre ici la raison pourquoi i’en avois proposé plusieurs, et de quelle façon ie les démesle.

I’obserue tousiours, en cherchant vne question de Geometrie, que les lignes, dont ie me sers pour la trouuer, soient paralleles, ou s’entrecouppent à angles droits, le plus qu’il est possible ; & ie ne considere point d’autres Theoremes, sinon que les costez des triangles semblables ont semblable proportion entr’eux, & que, dans les triangles rectangles, le quarré de la base est égal aux deux quarrez des costez. Et ie ne crains point de supposer plusieurs quantitez inconnuës, pour reduire la question à tels termes, qu’elle ne depende que de ces deux Theoremes ; au contraire, i’aime mieux en supposer plus que moins.

Par exemple, si on veut chercher cette question des trois cercles, par l’aide d’vn Theoreme qui enseigne à trouuer l’aire d’vn triangle par ses trois costez, on n’a besoin de supposer qu’vne quantité inconnuë.

Car si A, B, C sont les centres des trois cercles donnez, & D le centre du cherché, les trois costez du triangle ABC sont donnez, & les trois lignes AD, BD, CD sont composées des trois rayons des cercles donnez, ioints au rayon du cercle cherché, si bien que, supposant x pour ce rayon, on a tous les costez des triangles ABD, ACD, BCD ; & par consequent on peut auoir leurs aires, qui, iointes ensemble, sont égales à l’aire du triangle donné ABC ; & on peut, par cette équation, venir à la connoisance du rayon x, qui seul est requis pour la solution de la question.

Apres auoir ainsi fait autant d’équations que i’ay supposé de quantitez inconnuës, ie considere si, par chaque équation, i’en puis trouuer vne en termes assez simples ; & si ie ne le puis, ie tasche d’en venir à bout, en ioignant deux ou plusieurs équations par l’addition ou soustraction ; & enfin, lors que cela ne suffit pas, i’examine seulement s’il ne sera point mieux de changer les termes en quelque façon. Car, en faisant cét examen auec addresse, on rencontre aisément les plus courts chemins, & on en peut essayer vne infinité en fort peu de temps.

Ainsi, en cét exemple, ie suppose que les trois bases des triangles rectangles sont

AD = a + x, BD = b + x, CD = c + x ; et, faisant AE = d, BE = e, CF = f, DF ou GE = y, DG = FE = z, AF = d — z et FD = y, BG = e — y et DG = z, CF = f + z et FD = y.

Puis, faisant le quarré de chacune de ces bases égal au quarré des deux costez, i’ay les trois équations suiuantes :

aa + 2ax + xx = dd — 2dz + zz + yy,

bb + 2bx + xx = ee — 2ey + yy + zz,

cc + 2cx + xx = ff + 2fz + zz + yy,

& ie voy que, par l’vne d’elles toute seule, ie ne puis trouuer aucune des quantitez inconnuës, sans en tirer la racine quarrée, ce qui embarrasseroit trop la question. C’est pourquoy ie viens au second moyen, qui est de ioindre deux équations ensemble, & i’apperçois incontinent que, les termes xx, yy & zz estant semblables en toutes trois, si i’en oste vne d’vne autre, laquelle ie voudray, ils s’effaceront, & ainsi ie n'auray plus de termes inconnus que x, y & z tous simples. Ie voy aussi que, si i’oste la seconde de la premiere ou de la troisiéme, i’auray tous ces trois termes x, y & z ; mais que, si i’oste la premiere de la troisiéme, ie n’auray que x & z.

cc + 2cx — aa — 2ax = ff + 2fz — dd + 2dz,

ou bien z = (cc − aa + dd − ff + 2cx − 2ax)/(2d + 2f),

ou bien 1/2d − 1/2f + (cc − aa + 2cx − 2ax)/(2d + 2f).

Puis, ostant la seconde équation de la premiere ou de la troisiéme (car l’vn reuient à l’autre), & au lieu de z mettant les termes que ie viens de trouuer, i’ay par la premiere & la seconde :

aa + 2ax — bb — 2bx = dd — 2dz — ee + 2ey,

ou bien 2ey = ee + aa + 2ax − bb − 2bx − dd +

dd − df + (ccd − aad + 2cdx − 2adx)/(d + f)

ou bien y = 1/2e − bb/2e − bx/e − df/2e + (ccd + aaf + 2cdx + 2afx)/(2ed + 2ef).

Enfin, retournant à l’vne des trois premieres équations, & au lieu d’y ou de z mettant les quantitez qui leur sont égales, & les quarrez de ces quantitez pour yy & zz, on trouue vne équation où il n’y a que x & xx inconnus ; de façon que le Probleme est plan, & il n’est plus besoin de passer outre. Car le reste ne sert point pour cultiuer ou recréer l’esprit, mais seulement pour exercer la patience de quelque calculateur laborieux. Mesme i’ay peur de m’estre rendu icy ennuyeux à Vostre Altesse, pour ce que ie me suis arresté à écrire des choses qu’elle sçauoit sans doute mieux que moy, & qui sont faciles, mais qui sont neantmoins les clefs de mon Algebre.

Madame, De V. A. Le tres-humble & tres-obeïssant seruiteur, Descartes.

ElisabethMonsieur Descartes,

Si i’auois autant d’habileté a suiure vos auis, que d’enuie, vous trouueriez désià les effets de votre charité aux progrès que i’aurois fait dans le raisonnement & dans l’Algèbre, desquels, a cette heure, ie ne vous puis montrer que les fautes. Mais ie suis si accoustumée de vous en faire voir, qu’il m’arriue, comme aux vieux pescheurs, d’en perdre tout a fait la honte. Pourquoy i’auois fait dessein de vous enuoyer la solution de la question que vous m’auez donnée, par la méthode qu’on m’a enseignée autrefois tant pour vous obliger de m’en dire les manquements, que parce que ie ne suis pas si bien versée en la vostre.

Vostre tres-affectionnée amie a vous seruir, Élisabeth. Ce 21 de 9bre. Monsieur Descartes.

DescartesMadame,

La solution qu’il a plû à Vostre Altesse me faire l’honneur de m’enuoyer, est si iuste, qu’il ne s’y peut IV 46 rien desirer dauantage ; et ie n’ay pas seulement esté surpris d’estonnement, en la voyant, mais ie ne puis m’abstenir d’adiouster que i’ay esté aussi rauy de ioye, & ay pris de la vanité de voir que le calcul, dont se sert Vostre Altesse, est entierement semblable à celuy que i’ay proposé dans ma Geometrie.

Maintenant que cette difficulté est surmontée, elle aura beaucoup plus de plaisir au reste ; & en substituant vne seule lettre au lieu de plusieurs, ainsi qu’elle a fait icy fort souuent, le calcul ne luy sera pas ennuyeux. C’est vne chose qu’on peut quasi tousiours faire, lors qu’on veut seulement voir de quelle nature est vne question, c’est à dire si elle se peut soudre auec la regle & le compas, ou s’il y faut employer quelques autres lignes courbes du premier ou du 2(d) genre &c., & quel est le chemin pour la trouuer ; qui est ce de quoy ie me contente ordinairement, touchant les IV 47 questions particulieres.

Ainsi, pour trouuer vn Theoreme qui enseigne quel est le rayon du cercle, qui touche les trois donnez par position, il ne faudroit pas, en cét exemple, poser les trois lettres a, b, c, pour les lignes AD, DC, DB, mais pour les lignes AB, AC & BC, pour ce que ces dernieres ont mesme rapport l’vne que l’autre aux IV 48 trois AH, BH & CH, ce que n’ont pas les premieres. Et en suiuant le calcul auec ces six lettres, sans les changer ny en adjoûter d’autres, par le chemin qu’a

pris Vostre Altesse (car il est meilleur, pour cela, que celuy que i’auois proposé), on doit venir à vne équation fort reguliere, & qui fournira vn Theoreme assez court. Car les trois lettres a, b, c, y sont disposées en mesme façon, & aussi les trois d, e, f.

Mais, pour ce que le calcul en est ennuyeux, si Vostre Altesse a desir d’en faire l’essay, il luy sera plus aisé, en supposant que les trois cercles donnez s’entre-touchent, & n’employant, en tout le calcul, que les quatre lettres d, e, f, x, qui estant les rayons des quatre cercles, ont semblable rapport l’vne à l’autre. Et, en premier lieu, elle trouuera

AK = (dd + df + dx − fx)/(d + f), & AD = (dd + df + de − fe)/(d + f),

où elle peut desia remarquer que x est dans la ligne AK, comme e dans la ligne AD, pour ce qu’elle se IV 49 trouue par le triangle AHC, comme l’autre par le triangle ABC. Puis enfin, elle aura cette équation,

de laquelle on tire, pour Theoreme, que les quatre sommes, qui se produisent en multipliant ensemble les quarrez de trois de ces rayons, font le double de six, qui se produisent en multipliant deux de ces rayons l’vn par l’autre, & par les quarrez des deux autres ; ce qui suffit pour seruir de regle à trouuer le rayon du plus grand cercle qui puisse estre décrit entre les trois donnez qui s’entretouchent. Car, si les rayons de ces trois donnez sont, par exemple, d/2 e/3 f/4. i’auray 576 pour ddeeff, & 36xx pour ddeexx, & ainsi des autres. D’où ie trouueray

x = − 156/47 + √(31104/2209)

si ie ne me suis trompé au calcul que ie viens de faire. Et Votre Altesse peut voir icy deux procedures fort differentes dans vne mesme question, selon les differens desseins qu’on se propose. Car, voulant sçauoir de quelle nature est la question, & par quel biais on la peut soudre, ie prens pour données les lignes perpendiculaires ou paralleles, & suppose plusieurs autres quantitez inconnuës, afin de ne faire aucune multiplication superfluë, & voir mieux les plus courts chemins ; au lieu que, la voulant acheuer, ie prens IV 50 pour donnez les costez du triangle, & ne suppose qu’vne lettre inconnuë.

Madame, De V. A. Le tres-humble & tres-obeïssant seruiteur, Descartes.

Madame,

Mon voyage ne pouuoit estre accompagné d’aucun malheur, puis que i’ay esté si heureux, en le faisant, que d’estre en la souuenance de vostre Altesse ; la tres-fauorable lettre, qui m’en donne des marques, est la V 65 chose la plus precieuse que ie pûsse receuoir en ce païs. Elle m’auroit entierement rendu heureux, si elle ne m’auoit appris que la maladie qu’auoit vostre Altesse, auparauant que ie partisse de la Haye, luy a encore laissé quelques restes d’indisposition en l’estomac.

Ie me propose de partir d’icy, dans quatre ou cinq iours, pour passer en Poitou & en Bretagne, où sont les affaires qui m’ont amené ; mais si-tost que ie les auray pû mettre vn peu en ordre, ie ne souhaite rien tant que de retourner vers les lieux où i’ay esté si heureux que d’auoir l’honneur de parler quelquefois à vostre Altesse. Car, bien qu’il y ait icy beaucoup de personnes que i’honore & estime, ie n’y ay toutesfois encore rien vû qui me puisse arrester. Et ie suis, au delà de tout ce que ie puis dire, &c.

ElisabethMonsieur Descartes,

Le present que M. Van Bergen m’a fait, de vostre part, m’oblige de vous en rendre grace, & ma conscience m’accuse de ne le pouuoir faire selon ses merites. Quand ie n’y aurois reçeu que le bien qui en reuient a nostre siecle, celuy cy vous deuant tout ce que les precedents ont payé aux inuenteurs des sciences, puisque vous auez seul demonstré qu’il y en a, iusqu’a quelle proportion montera ma dette, a qui vous donnez, auec l’instruction, vne partie de vostre gloire, dans le tesmoignage public que vous me faites de vostre amitié & de vostre approbation ? Les pedants diront que vous estes contraint de bastir vne nouuelle morale, pour m’en rendre digne.

Mais ie crains que vous retracterez, auec iustice, l’opinion que vous eustes de ma comprehension, quand vous saurez que ie n’entens pas comment l’argent vif se forme, si plein d’agitation & si pesant tout ensemble, contraire a la definition que vous auez fait de la pesenteur ; &, encore que le corps E, dans la figure de la 225e page, le presse, quand il est dessous, pourquoy se ressentiroit-il de cette contrainte, lorsqu’il est au dessus, plus que ne fait l’air en sortant d’vn vaisseau ou il a esté pressé ?

La seconde difficulté que i’aye trouuée est celle de faire passer ces particules, tournées en coquilles, par le centre de la terre, sans estre pliées ou defigurées par le feu qui s’y trouue, comme ils le furent du commencement pour former le corps M. Il n’y a que leur vitesse qui les en peut sauuer, & vous dites, dans la page 133 & 134, qu’elle ne leur est point necessaire pour aller en ligne droite, &, par consequent, que ce sont les parties les moins agitées du premier element qui s’ecoulent ainsi par les globules du second.

Ie ne vous represente icy que les raisons de mes doutes dans votre liure ; celles de mon admiration estant innumerables, comme aussi celles de mon obligation, entre lesquelles ie conte encore la bonté que vous auez eu de m’informer de vos nouuelles & me donner des preceptes pour la conseruation de ma santé. Celles-la m’apportoient beaucoup de ioye par le bon succes de vostre voyage & la continuation du dessein que vous auiez de reuenir, & celles-cy beaucoup de profit, puisque i’en experimente desia la bonté en moy-mesme. Vous n’auez pas montré a M.

Vostre tres-affectionnée amie a vous rendre seruice, Élisabeth. Ce 1er d’Aoust. Monsieur Descartes.

DescartesMadame,

La faueur que me fait vostre Altesse de n’auoir pas desagreable que l’aye osé témoigner en public combien ie l’estime & ie l’honore, est plus grande, & m’oblige plus qu’aucune que ie pourois receuoir d’ailleurs. Et ie ne crains pas qu’on m’acuse d’auoir rien changé en la Morale, pour faire entendre mon sentiment sur ce suiet ; car ce que l’en ay écrit est si veritable & si clair, que ie m’assure qu’il n’y aura point d’homme raisonnable qui ne l’auouë. Mais ie crains que ce que i’ay mis, au reste du liure, ne soit plus douteux & plus obscur, puisque V. A. y trouue des difficultez.

Celle qui regarde la pesanteur de l’argent vif, est fort considerable, & i’eusse tasché de l’éclaircir, sinon que, n’ayant pas encore assez examiné la nature de ce metal, i’ay eu peur de faire quelque chose contraire à ce que ie pouray aprendre cy-apres. Tout ce que i’en puis maintenant dire, est que ie me persuade que les petites parties de l’air, de l’eau, & de tous les autres cors terrestres, ont plusieurs pores, par où la matiere tres-subtile peut passer ; & cela suit assez de la façon dont i’ay dit qu’elles sont formées. Or il sufit de dire IV 137 que les parties du vif argent & des autres metaux ont moins de tels pores, pour faire entendre pourquoy ces metaux sont plus pesans.

Pour les petites parties tournées en coquille, ce n’est pas merueille qu’elles ne soient point détruites par le feu qui est au centre de la terre. Car ce feu-là n’estant composé que de la matiere tres-subtile toute seule, il peut bien les emporter fort viste, mais non pas les faire choquer contre quelques autres cors durs ; ce qui seroit requis pour les rompre ou diuiser.

Au reste, ces parties en coquille ne prennent point vn trop grand tour pour retourner d’vn pole à l’autre. Car ie suppose que la pluspart passe par le dedans de la terre ; en sorte qu’il n’y a que celles qui ne trouuent point de passage plus bas, qui retournent par nostre air. Et c’est la raison que ie donne, pourquoy la vertu de l’aimant ne nous paroist pas si forte en toute la masse de la terre, qu’en de petites pierres d’aimant.

Mais ie supplie tres-humblement vostre Altesse de me pardonner, si ie n’écris rien icy que fort confusement. Ie n’ay point encore le liure dont elle a daigné marquer les pages, & ie suis en vn voyage continu ; mais i’espere, dans deux ou trois mois, auoir l’honneur de luy faire la reuerence à la Haye. Ie suis, &c.

DescartesMadame,

I’ay esté extremement surpris d’aprendre, par les lettres de Monsieur de P(ollot), que V. A. a esté longtemps malade, & ie veux mal à ma solitude, pour ce qu’elle est cause que ie ne l’ay point sceu plutost.

La cause la plus ordinaire de la fiévre lente est la tristesse ; & l’opiniastreté de la Fortune à persecuter vostre maison, vous donne continuellement des suiets de fascherie, qui sont si publics & si éclatans, qu’il n’est pas besoin d’vser beaucoup de coniectures, ny estre fort dans les affaires, pour iuger que c’est en cela que consiste la principale cause de vostre indisposition. Et il est à craindre que vous n’en puissiez estre du tout déliurée, si ce n’est que, par la force de vostre vertu, vous rendiez vostre ame contente, malgré les disgraces de la Fortune.

Ie craindrois que ce stile ne fust ridicule, si ie m’en seruois en écriuant à quelqu’autre ; mais, pour ce que ie considere vostre Altesse comme ayant l’ame la plus noble & la plus releuée que ie connoisse, ie croy qu’elle doit aussi estre la plus heureuse, & qu’elle le sera veritablement, pourueu qu’il luy plaise ietter les yeux sur ce qui est au dessous d’elle, & comparer la valeur des biens qu’elle possede, & qui ne luy sçauroient iamais estre ostez, auec ceux dont la Fortune l’a dépouillée, & les disgraces dont elle la persecute en la personne IV 204 de ses proches ; car alors elle verra le grand suiet qu’elle a d’estre contente de ses propres biens.

ElisabethMonsieur Descartes,

Ie vois que les charmes de la vie solitaire ne vous ostent point les vertus requises a la societé. Ces bontés genereuses que vous auez pour vos amis & me tesmoignez aux soins que vous auez de ma santé, ie serois faschée qu’ils vous eussent engagé a faire vn voyage iusqu’icy, depuis que M. de Palotti m’a dit que vous iugiez le repos necessaire a vostre conseruation. Et ie vous asseure que les medecins, qui me virent tous les iours & examinerent tous les symptomes de mon mal, n’en ont pas trouué la IV 208 cause, ni ordonné de remedes si salutaires que vous auez fait de loin.

Sachez donc que i’ay le corps imbu d’vne grande partie des foiblesses de mon sexe, qu’il se ressent tres facilement des afflictions de l’ame, & n’a point la force de se remettre auec elle, estant d’vn temperament suiet aux obstructions & demeurant en vn air qui y contribue fort ; aux personnes qui ne peuuent point faire beaucoup d’exercice, il ne faut point vne longue oppression de cœur par la tristesse, pour opiler la rate & infecter le reste du corps par ses vapeurs. Ie m’imagine que la fieure lente & la toux seiche, qui ne me quitte pas encore, quoy que la chaleur de la saison & les promenades que ie fais rappellent vn peu mes forces, vient de la.

Ie continueray aussi de vous confesser qu’encore que ie ne pose point ma felicité en chose qui depende de la fortune ou de la volonté des hommes, & que ie ne m’estimeray absolument malheureuse, quand ie ne verrois iamais ma maison restituée, ou mes proches hors de misere, ie ne saurois considerer les accidents nuisibles qui leur arriuent, sous autre notion que celle du mal, ni les efforts inutiles que ie fais pour leur seruice, sans quelque sorte d’inquietude, qui n’est pas sitost calmée par le raisonnement, qu’vn nouueau desastre n’en produit d’autre.

I’ay employé tout l’hyuer passé en des affaires si fascheuses, qu’elles m’empescherent de me seruir de la liberté que vous m’auez octroyée, de vous proposer les difficultés que ie trouueray en mes estudes, & m’en donnerent d’autres, dont il me faloit encore plus de stupidité que ie n’ay, pour m’en desembarrasser. Ie ne trouuay qu’vn peu deuant mon indisposition le loisir de lire la philosophie de M.

Vostre tres-affectionnée amie a vous seruir, Élisabeth. Ce 24eme de May. Monsieur Descartes.

En relisant ce que ie vous mande de moy mesme, IV 211 que i’oublie vne de vos maximes, qui est de ne mettre iamais rien par escrit, qui puisse estre mal interpreté de lecteurs peu charitables. Mais ie me fie tant au soin de M. de Palotti, que ie say que ma lettre vous sera bien rendue, & a votre discretion, que vous l’osterez, par le feu, du hazard de tomber en mauuaises mains.

DescartesMadame,

Ie n’ay pû lire la lettre que vostre Altesse m’a fait l’honneur de m’écrire, sans auoir des ressentimens extrémes, de voir qu’vne vertu si rare & si accomplie ne soit pas accompagnée de la santé, ny des prosperitez qu’elle merite, & ie conçoy aysement la multitude des déplaisirs qui se presentent continuellement à elle, & qui sont d’autant plus difficiles à surmonter, que souuent ils sont de telle nature, que la vraye raison n’ordonne pas qu’on s’opose directement à eux & qu’on tasche de les chasser.

On peut, ce me semble, aysement remarquer icy la difference qui est entre l’entendement & l’imagination ou le sens ; car elle est telle, que ie croy qu’vne personne, qui auroit d’ailleurs toute sorte de suiet d’estre contente, mais qui verroit continuellement representer deuant soy des Tragedies dont tous les actes fussent funestes, & qui ne s’ocuperoit qu’à considerer des obiets de tristesse & de pitié, qu’elle sceust estre feints & fabuleux, en sorte qu’ils ne fissent que tirer des larmes de ses yeux, & émouuoir son imagination, sans toucher son entendement, ie croy, dis-ie, que cela seul suffiroit pour acoutumer son cœur à se resserrer & à ietter des soupirs, en suite de quoy la circulation du sang estant retardée & allentie, les plus grossieres parties de ce sang, s’attachant les vnes aux autres, pourroient facilement luy opiler la rate, en s’embarassant & s’arrestant dans ses pores ;

Ie sçay bien que ie n’écris rien icy que vostre Altesse ne sçache mieux que moy, & que ce n’est pas tant la theorie, que la pratique, qui est difficile en cecy ; mais la faueur extréme qu’elle me fait de témoigner qu’elle n’a pas desagreable d’entendre mes sentimens, me fait prendre la liberté de les écrire tels qu’ils sont, & me donne encore celle d’adiouter icy, que i’ay experimenté en moy-mesme, qu’vn mal presque semblable, & mesme plus dangereux, s’est guery par le remede que ie viens de dire.

I’ay beaucoup d’obligation à vostre Altesse, de ce qu’il luy a plû me mander son sentiment du liure de Monsieur le Cheualier d’Igby, lequel ie ne seray point capable de lire, iusqu’à ce qu’on l’ait traduit en Latin ; ce que Monsieur Ioufon, qui estoit hier icy, m’a dit que quelques-vns veulent faire. Il m’a dit aussi que ie pouuois adresser mes lettres pour vostre Altesse par les Messagers ordinaires, ce que ie n’eusse osé faire sans luy, & l’auois differé d’écrire celle-cy, pour ce que i’attendois qu’vn de mes amis allast à la Haye pour la luy donner.

ElisabethMonsieur Descartes,

Vos lettres me seruent tousiours d’antidote contre la melancolie, quand elles ne m’enseigneroient pas, detournant mon esprit des obiets desagreables qui luy suruiennent tous les iours, pour lui faire contempler le bonheur que ie possede dans l’amitié d’vne personne de vostre merite, au conseil duquel ie puis commettre la conduite de ma vie. Si ie la pouuois encore conformer a vos derniers preceptes, il n’y a point de doute que ie me guerirois promtement des maladies du corps & des foiblesses de l’esprit. Mais auoue que ie trouue de la difficulté a separer des sens & de l’imagination des choses qui y sont continuellement representées par discours & par lettres, que ie ne saurois euiter sans pecher contre mon deuoir.

Vostre tres-affectionnée amie a vous seruir, Élisabeth. Ce 12/22 de Iuin. Monsieur Descartes.

I’ay appris auec beaucoup de ioye que l’Académie de Groningen vous a fait iustice.

DescartesMadame,

Ie supplie tres-humblement vostre Altesse de me pardonner, si ie ne puis plaindre son indisposition, lors que i’ay l’honneur de receuoir de ses lettres. Car i’y remarque tousiours des pensées si nettes & des raisonnemens si fermes, qu’il ne m’est pas possible de me persuader qu’vn esprit capable de les conceuoir soit logé dans vn corps foible & malade. Quoy qu’il en soit, la connoissance que vostre Altesse témoigne auoir du mal & des remedes qui le peuuent surmonter, m’assure qu’elle ne manquera pas d’auoir aussi l’adresse qui est requise pour les employer.

Ie sçay bien qu’il est presque impossible de resister aux premiers troubles que les nouueaux malheurs excitent en nous, & mesme que ce sont ordinairement les meilleurs esprits dont les passions sont plus violentes & agissent plus fort sur leurs cors ; mais il me semble que le lendemain, lors que le sommeil a calmé IV 237 l’émotion qui arriue dans le sang en telles rencontres, on peut commencer à se remettre l’esprit, & le rendre tranquile ; ce qui se fait en s’étudiant à considerer tous les auantages qu’on peut tirer de la chose qu’on auoit prise le iour precedent pour vn grand mal-heur, & à détourner son attention des maux qu’on y auoit imaginez.

I’ay tasché cy-deuant de persuader la nonchalance à vostre Altesse, pensant que les ocupations trop serieuses affoiblissent le cors, en fatiguant l’esprit ; mais ie ne luy voudrois pas pour cela dissuader les soins qui sont necessaires pour détourner sa pensée des obiets qui la peuuent attrister ; & ie ne doute point que les IV 238 diuertissemens d’étude, qui seroient fort penibles à d’autres, ne luy puissent quelquefois seruir de relasche.

Madame,

L’air a tousiours esté si inconstant, depuis que ie n’ay eu l’honneur de voir vostre Altesse, & il y a eu des iournées si froides pour la saison, que i’ay eu souuant de l’inquietude & de la crainte, que les eaux de Spa ne fussent pas si saines ny si vtiles, qu’elles auroient esté en vn tems plus serain ; & pour ce que vous m’auez fait l’honneur de tesmoigner que mes letres vous pourroient seruir de quelque diuertissement, pendant que les medecins vous recommendent de n’occuper vostre esprit a aucune chose qui le trauaille, ie serois mauuais mesnager de la faueur qu’il vous a pleu me faire en me permettant de vous escrire, si ie manquois d’en prendre les premieres occasions.

Ie m’imagine que la plus part des letres que vous receuez d’ailleurs, vous donnent de l’émotion, & qu’auant mesme que de les lire, vous apprehendez d’y IV 252 trouuer quelques nouuelles qui vous déplaisent, a cause que la malignité de la fortune vous a des long tems accoustumée a en receuoir souuent de telles ; mais pour celles qui vienent d’icy, vous estes au moins assurée que, si elles ne vous donnent aucun suiet de ioye, elles ne vous en donneront point aussy de tristesse, & que vous les pourrez ouurir a toutes heures, sans craindre qu’elles troublent la digestion des eaux que vous prenez.

L’vn de ces moyens, qui me semble des plus vtiles, est d’examiner ce que les anciens en ont escrit, & tascher a rencherir par dessus eux, en adioustant quelque chose a leurs preceptes ; car ainsy on peut rendre ces preceptes parfaitement siens, & se disposer a les metre en pratique.

Madame, de Vostre Altesse, le tres humble & tres obeissant seruiteur, Descartes. D’Egmond, le 21 de Iuillet 1645.

Madame,

Lorsque i’ay choisi le liure de Seneque de vita beata, pour le proposer a vostre Altesse comme vn entretien qui luy pourroit estre agreable, i’ay eu seulement egard a la reputation de l’auteur & a la dignité de la matiere, sans penser a la façon dont il la traite, laquelle ayant depuis considerée, ie ne la trouue pas assez exacte pour meriter d’estre suiuie. Mais, affin que vostre Altesse en puisse iuger plus aysement, ie tascheray icy d’expliquer en quelle sorte il me semble que cete matiere eust deu estre traitée par vn Philosophe tel que luy, qui, n’estant point esclairé de la foy, n’auoit que la raison naturelle pour guide.

Considerant, apres cela, ce que c’est quod beatam vitam efficiat, c’est a dire quelles sont les choses qui nous peuuent donner ce souuerain contentement, ie remarque qu’il y en a de deux sortes : a sçauoir, de celles qui dependent de nous, comme la vertu & la sagesse, & de celles qui n’en dependent point, comme les honneurs, les richesses & la santé. Car il est certain qu’vn homme bien né, qui n’est point malade, qui ne manque de rien, & qui auec cela est aussy sage & aussy vertueux qu’vn autre qui est pauure, mal sain & contrefait, peut iouir d’vn plus parfait contentement que luy.

Or il me semble qu’vn chascun se peut rendre content de soy mesme & sans rien attendre d’ailleurs, pourueu seulement qu’il obserue trois choses, ausquelles se raportent les trois règles de morale, que i’ay mises dans le discours de la Méthode.

La première est, qu’il tasche tousiours de se seruir, le mieux qu’il luy est possible, de son esprit, pour connoistre ce qu’il doit faire ou ne pas faire en toutes les occurrences de la vie.

La seconde, qu’il ait vne ferme & consiante resolution d’exécuter tout ce que la raison luy conseillera, sans que ses passions ou ses appétits l’en détournent ; & c’est la fermeté de cete resolution, que ie croy deuoir estre prise pour la vertu, bien que ie ne sçache point que personne l’ait iamais ainsy expliquée ; mais on l’a diuisée en plusieurs especes, ausquelles on a donné diuers noms, a cause des diuers obiets ausquels elle s’estend.

La troisiesme, qu’il considere que, pendant qu’il se conduit ainsy, autant qu’il peut, selon la raison, tous les biens qu’il ne possede point sont aussy entièrement hors de son pouuoir les vns que les autres, & IV 266 que, par ce moyen, il s’accoustume a ne les point desirer ; car il n’y a rien que le desir, & le regret ou le repentir, qui nous puissent empescher d’estre contens : mais si nous faisons tousiours tout ce que nous dicte nostre raison, nous n’aurons iamais aucun suiet de nous repentir, encore que les euenemens nous fissent voir, par apres, que nous nous sommes trompez, pour ce que ce n’est point par nostre faute.

Au reste, toute sorte de desirs ne sont pas incompatibles auec la beatitude ; il n’y a que ceux qui sont accompagnez d’impatience & de tristesse. Il n’est pas necessaire aussy que nostre raison ne se trompe point ; il suffit que nostre conscience nous tesmoigne que nous n’auons iamais manqué de resolution & de vertu, pour executer toutes les choses que nous auons iugé estre les meilleures, & ainsy la vertu seule est suffisante IV 267 pour nous rendre contens en cete vie.

En suite de quoy, il me semble que Seneque eust deu nous enseigner toutes les principales veritez, dont la connoissance est requise pour faciliter l’vsage de la vertu, & regler nos desirs & nos passions, & ainsy iouir de la beatitude naturelle ; ce qui auroit rendu son liure le meilleur & le plus vtile qu’vn Philosophe payen eust sceu escrire. Toutefois ce n’est icy que mon opinion, laquelle ie soumets au iugement de vostre Altesse ; & si elle me fait tant de faueur que de m’auertir en quoy ie manque, ie luy en IV 268 auray tres grande obligation & tesmoigneray, en me corrigeant, que ie suis,

Madame, de Vostre Altesse le tres humble & tres obeissant seruiteur, Descartes. D’Egmond, le 4 d’Aoust 1645.

ElisabethMonsieur Descartes,

I’ay trouué, en examinant le liure que vous m’auez recommandé, quantité de belles periodes & de sentences bien imaginées pour me donner suiet d’vne meditation agreable, mais non pas pour m’instruire de celuy dont il traite, puisqu’elles sont sans methode & que l’auteur ne IV 269 suit pas seulement celle qu’il s’estoit proposée. Car, au lieu de montrer le chemin le plus court vers la beatitude, il se contente de faire voir que ses richesses & son luxe ne l’en rendent point incapable. Ce que i’estois obligée de vous escrire, afin que vous ne croyiez pas que ie sois de vostre opinion par preiugé ou par paresse.

Et c’est ainsi que ie ne saurois encore me desembarrasser du doute, si on peut arriuer a la beatitude dont vous parlez, sans l’assistance de ce qui ne depend pas absolument de la volonté, puisqu’il y a des maladies qui ostent tout a fait le pouuoir de raisonner, & par consequent celuy de iouir d’vne satisfaction raisonnable, d’autres qui diminuent la force, & empeschent de suiure les maximes que le bon sens aura forgées, & qui rendent l’homme le plus moderé, suiet a se laisser emporter de ses passions, & moins capable a se demesler des accidents de la fortune, qui requierent vne resolution promte.

Mais ie m’asseure que vous m’eclaircirez de ces difficultés, & de quantité d’autres, dont ie ne m’auise point a cet’heure, quand vous m’enseignerez les verités qui doiuent estre connues, pour faciliter l’vsage de la vertu. Ne perdez donc point, ie vous prie, le dessein de m’obliger par vos preceptes, & croyez que ie les estime autant qu’ils le meritent.

Il y a huit iours que la mauuaise humeur d’vn frere malade m’empesche de vous faire cette requeste, en me retenant tousiours aupres de luy, pour l’obliger, par la complaisance qu’il a pour moy, a se soumettre aux regles des medecins, ou pour lui tesmoigner la mienne, en tachant de le diuertir, puisqu’il se persuade que i’en suis capable. Ie souhaite l’estre a vous asseurer que ie seray toute ma vie,

Monsieur Descartes, Vostre tres-affectionnée amie a vous seruir, Élisabeth. Ce 16/6 d’Aoust.

DescartesMadame,

Encore que ie ne sçache point si mes dernieres ont esté rendües a vostre Altesse, & que ie ne puisse rien escrire, touchant le suiet que i’auois pris pour auoir l’honneur de vous entretenir, que ie ne doiue penser que vous sçauez mieux que moi, ie ne laisse pas toute fois de continuër, sur la creance que i’ay que mes letres ne vous seront pas plus importunes que les liures qui sont en vostre biblioteque ; car d’autant qu’elles ne contienent aucunes nouuelles que vous ayez interest de sçauoir promptement, rien ne vous conuiera de les lire aux heures que vous aurez quelques affaires, & ie tiendray le temps que ie mets a les escrire tres bien employé, si vous leur donnez seulement celuy que vous aurez enuie de perdre.

I’ay dit cy deuant ce qu’il me sembloit que Seneque eust deü traiter en son liure ; i’examineray maintenant IV 272 ce qu’il y traite. Ie n’y remarque en general que trois choses la premiere est qu’il tasche d’expliquer ce que c’est que le souuerain bien, & qu’il en donne diuerses definitions ; la seconde, qu’il dispute contre l’opinion d’Epicure ; & la troisiesme, qu’il repond a ceux qui obiectent aux Philosophes qu’ils ne viuent pas selon les regles qu’ils prescriuent. Mais, affin de voir plus particulierement en quelle façon il traite ces choses, ie m’aresteroy vn peu sur chasque chapitre.

Au premier, il reprend ceux qui suiuent la coustume & l’exemple plutost que la raison. Nunquam de vita iudicatur, dit-il, semper creditur. Il approuue bien pourtant qu’on prene conseil de ceux qu’on croit estre les plus sages ; mais il veut qu’on vse aussy de son propre iugement, pour examiner leurs opinions.

Au second chapitre, il ne fait quasi que redire, en d’autres termes, ce qu’il a dit au premier ; & il adiouste seulement que ce qu’on estime communement estre bien, ne l’est pas.

Puis au troisiesme, apres auoir encore vsé de beaucoup de mots superflus, il dit enfin son opinion touchant le souuerain bien : a sçauoir que rerum naturæ assentitur, & que ad illius legem exemplumque formari sapientia est, & que beata vita est conueniens naturæ suæ.

Au quatre & cinquiesme chapitre, il donne quelques autres definitions du souuerain bien, qui ont toutes quelque raport auec le sens de la premiere, mais aucune desquelles ne l’explique suffisamment ; & elles font paroistre, par leur diuersité, que Seneque n’a pas clairement entendu ce qu’il vouloit dire ; car, d’autant qu’on conçoit mieux vne chose, d’autant est on plus determiné a ne l’exprimer qu’en vne seule façon. Celle ou il me semble auoir le mieux rencontré, est au 5e chap., ou il dit que beatus est qui nec cupit nec timet beneficio rationis, & que beata vita est in recto certoque iudicio stabilita.

Il commence, en ces mesmes chapitres, a disputer contre ceux qui metent la beatitude en la volupté, & il continue dans les suiuans. C’est pourquoy, auant que de les examiner, ie diray icy mon sentiment touchant cette question.

Ie remarque, premierement, qu’il y a de la difference entre la beatitude, le souuerain bien & la derniere fin ou le but auquel doiuent tendre nos actions car la beatitude n’est pas le souuerain bien ; mais elle le presuppose, & elle est le contentement ou la satisfaction d’esprit qui vient de ce qu’on le possede. Mais, par la fin de nos actions, on peut entendre l’vn & l’autre ; car le souuerain bien est sans doute la chose que nous nous deuons proposer pour but en toutes nos actions, & le contentement d’esprit qui en reuient, estant l’attrait qui fait que nous le recherchons, est aussy a bon droit nommé nostre fin.

Ie remarque, outre cela, que le mot volupté a esté pris en autre sens par Epicure que par ceux qui ont disputé contre luy. Car tous ses aduersaires ont restreint la signification de ce mot aux plaisirs des sens ;. & luy, au contraire, l’a estendüe a tous les contentemens de l’esprit, comme on peut aysement iuger de ce que Seneque & quelques autres ont escrit de luy.

Or il y a eu trois principales opinions, entre les Philosophes payens, touchant le souuerain bien & la fin de nos actions, a sçauoir celle d’Epicure, qui a dit que c’estoit la volupté ; celle de Zenon, qui a voulu que ce fust la vertu ; & celle d’Aristote, qui l’a composé de toutes les perfections, tant du cors que de l’esprit. Lesquelles 3 opinions peuuent, ce me semble, IV 276 estre receuës pour vrayes & accordées entre elles, pouruu qu’on les interprete fauorablement.

Car Aristote ayant consideré le souuerain bien de toute la nature humaine en general, c’est a dire celuy que peut auoir le plus accompli de tous les hommes, il a eu raison de le composer de toutes les perfections dont la nature humaine est capable ; mais cela ne sert point a nostre vsage.

Zenon, au contraire, a consideré celuy que chasque homme en son particulier peut posseder ; c’est pourquoy il a eu aussy tres bonne raison de dire qu’il ne consiste qu’en la vertu, pource qu’il n’y a qu’elle seule, entre les biens que nous pouuons auoir, qui depende entierement de nostre libre arbitre. Mais il a representé cete vertu si seuere & si ennemie de la volupté, en faisant tous les vices egaux, qu’il n’y a eu, ce me semble, que des melancholiques, ou des esprits entierement detachez du cors, qui ayent pû estre de ses sectateurs.

Enfin Epicure n’a pas eu tort, considerant en quoy consiste la beatitude, & quel est le motif, ou la fin a laquelle tendent nos actions, de dire que c’est la volupté en general, c’est a dire le contentement de l’esprit ; car, encore que la seule connoissance de nostre deuoir nous pourroit obliger a faire de bonnes actions, cela ne nous feroit toutefois iouir d’aucune beatitude, s’il ne nous en reuenoit aucun plaisir. Mais pource qu’on attribuë souuent le nom de volupté a IV 277 de faux plaisirs, qui sont accompagnez ou suiuis d’inquietude, d’ennuis & de repentirs, plusieurs ont creu que cete opinion d’Epicure enseignoit le vice ; &, en effect, elle n’enseigne pas la vertu.

C’est pourquoy ie croy pouuoir icy conclure que la beatitude ne consiste qu’au contentement de l’esprit, c’est a dire au contentement en general ; car bien qu’il y ait des contentemens qui dependent du cors, & des autres qui n’en dependent point, il n’y en a toutefois aucun que dans l’esprit : mais que, pour auoir vn contentement qui soit solide, il est besoin de suiure la vertu, c’est a dire d’auoir vne volunté ferme & constante d’executer tout ce que nous iugerons estre le meilleur, & d’employer toute la force de nostre entendement a en bien iuger.

Madame, de vostre Altesse le tres humble & tres obeissant seruiteur, Des Cartes. D’Egmond, le 18 d’Aoust 1645.

ElisabethMonsieur Descartes,

Ie crois que vous aurez desia veu, dans ma derniere du 16me, que la vostre du 4me m’a esté rendue. Et ie n’ay pas besoin d’y aiouter qu’elle m’a donné plus de lumiere, IV 279 au suiet qu’elle traite, que tout ce que i’en ay pu lire ou mediter. Vous cognoissez trop ce que vous faites, ce que puis, & auez trop bien examiné ce qu’ont fait des autres, pour en pouuoir douter, quoy que, par un exces de generosité, vous voulez vous rendre ignorant de l’extreme obligation que ie vous ay, de m’auoir donné vne occupation si vtile & si agreable, comme celle de lire & considerer vos lettres.

Vostre tres-affectionnée amie a vous seruir, Élisabeth.

DescartesMadame,

Estant dernierement incertain si vostre Altesse estoit a la Haye ou a Rhenen, i’adressay ma letre par Leyde, & celle que vous m’auiez fait l’honneur de m’escrire ne me fut rendue qu’apres que le messager, qui l’auoit portée a Alckmar, en fut parti. Ce qui m’a empesché de pouuoir tesmoigner plustost, combien ie suis glorieux de ce que le iugement que i’ay fait du liure que vous auez pris la peine de lire, n’est pas different du vostre, & que ma façon de raisonner vous paroist assez naturelle.

Pour les autres indispositions, qui ne troublent pas IV 283 tout a fait le sens, mais alterent seulement les humeurs, & font qu’on se trouue extraordinairement enclin a la tristesse, a la cholere, ou a quelque autre passion, elles donnent sans doute de la peine, mais elles peuuent estre surmontées, & mesme donnent matiere a l’ame d’vne satisfaction d’autant plus grande, qu’elles ont esté plus difficiles a vaincre. Et ie croy aussy le semblable de tous les empeschemens de dehors, comme de l’esclat d’vne grande naissance, des caioleries de la cour, des aduersitez de la fortune, & aussy de ses grandes prosperitez, lesquelles ordinairement empeschent plus qu’on ne puisse iouer le rolle de Philosophe, que ne sont ses disgraces.

Mais affin de sçauoir exactement combien chasque chose peut contribuer a nostre contentement, il faut considerer quelles sont les causes qui le produisent, & c’est aussy l’vne des principales connoissances qui peuuent seruir a faciliter l’vsage de la vertu ; car toutes les actions de nostre ame qui nous acquerent quelque perfection, sont vertueuses, & tout nostre IV 284 contentement ne consiste qu’au tesmoignage interieur que nous auons d’auoir quelque perfection. Ainsy nous ne sçaurions iamais pratiquer aucune vertu (c’est a dire faire ce que nostre raison nous persuade que nous deuons faire), que nous n’en receuions de la satisfaction & du plaisir.

Ainsy, par exemple, la cholere peut quelquefois exciter en nous des desirs de vengeance si violens qu’elle nous fera imaginer plus de plaisir a chastier nostre ennemi, qu’a conseruer nostre honneur ou nostre vie, & nous fera exposer imprudemment l’vn & l’autre pour ce suiet. Au lieu que, si la raison examine quel est le bien ou la perfection sur laquelle est fondé ce plaisir, qu’on tire de la vengeance, elle n’en trouuera aucune autre (au moins quand cete vengeance ne sert point pour empescher qu’on ne nous offence derechef), sinon que cela nous fait imaginer que nous auons quelque sorte de superiorité & quelque auantage au dessus de celuy dont nous nous vengeons.

Et le semblable arriue en toutes les autres passions ; car il n’y en a aucune qui ne nous represente le bien auquel elle tend, auec plus d’esclat qu’il n’en merite, & qui ne nous face imaginer des plaisirs beaucoup plus grands, auant que nous les possedions, que nous ne les trouuons par apres, quand nous les auons. Ce qui fait qu’on blasme communement la volupté, pour ce qu’on ne se sert de ce mot que pour signifier des IV 286 plaisirs qui nous trompent souuent par leur apparence, & nous en font negliger d’autres beaucoup plus solides, mais dont l’attente ne touche, pas tant, tels que sont ordinairement ceux de l’esprit seul.

Mais la principale difference qui est entre les plaisirs du cors & ceux de l’esprit, consiste en ce que, le cors estant suiet a vn changement perpetuel, & mesme sa conseruation & son bien estre dependant de ce changement, tous les plaisirs qui le regardent ne durent gueres ; car ils ne procedent que de l’acquisition de quelque chose qui est vtile au cors, au moment qu’on les reçoit ; & si tost qu’elle cesse de luy estre vtile, ils cessent aussy, au lieu que ceux de l’ame peuuent estre immortels comme elle, pouruû qu’ils ayent vn fondement si solide que ny la connoissance de la verité ny aucune fausse persuasion ne le destruisent.

Au reste, le vray vsage de nostre raison pour la conduite de la vie ne consiste qu’a examiner & considerer sans passion la valeur de toutes les perfections, tant du cors que de l’esprit, qui peuuent estre acquises par IV 287 nostre conduite, affin qu’estant ordinairement obligez de nous priuer de quelques vnes, pour auoir les autres, nous choisissions tousiours les meilleures. Et pour ce que celles du cors sont les moindres, on peut dire generalement que, sans elles, il y a moyen de se rendre hureux.

Madame, de Vostre Altesse le tres humble & tres obeissant seru(iteur), Descartes. D’Egmond, le premier de Sept. 1645.

ElisabethMonsieur Descartes,

Si ma conscience demeuroit satisfaite des pretextes que vous donnez a mon ignorance, comme des remedes, ie luy aurois beaucoup d’obligation, & serois exempte du repentir d’auoir si mal employé le tems auquel i’ay ioui de l’vsage de la raison, qui m’a esté d’autant plus long qu’a d’autres de mon age, que ma naissance & ma fortune me forcerent d’employer mon iugement de meilleure heure, pour la conduite d’vne vie assez penible & libre des prosperités qui me pouuoient empescher de songer a moy, comme de la suiection qui m’obligeroit a m’en fier a la prudence d’vne gouuernante.

Ce ne sont pas, toutesfois, ces prosperités, ni les flatteries qui les accompagnent, que ie crois absolument capables d’oster la fortitude d’esprit aux ames bien nées, & les empescher de receuoir le changement de fortune en philosophe. Mais ie me persuade que la multitude d’accidents, qui surprennent les personnes gouuernant le public, sans leur donner le tems d’examiner l’expedient le plus vtile, les porte souuent (quelque vertueux qu’ils soient) a faire des actions qui causent apres le repentir, que vous dites estre vn des principaux obstacles de la beatitude.

Ie vous voudrois encore voir definir les passions, pour les bien connoistre ; car ceux qui les nomment perturbations de l’ame, me persuaderoient que leur force ne consiste qu’a eblouir & soumettre la raison, si l’experience ne me IV 290 montroit qu’il y en a qui nous portent aux actions raisonnables. Mais ie m’asseure que vous m’y donnerez plus de lumiere, quand vous expliquerez comment la force des passions les rend d’autant plus vtiles, lorsqu’elles sont suiettes a la raison.

Ie receuray cette faueur a Riswyck, ou nous allons demeurer, iusqu’a ce que cette maison ici soit nettoyée, en celle du prince d’Orange ; mais vous n’auez point besoin de changer pour cela l’adresse de vos lettres a

Vostre tres-affectionnée amie a vous seruir, Élisabeth. Ce 3/13 7 bre. Monsieur Descartes.

DescartesMadame,

Vostre Altesse a si exactement remarqué toutes les causes qui ont empesché Seneque de nous exposer clairement son opinion touchant le souuerain bien. IV 291 & vous auez pris la peine de lire son liure auec tant de soin, que ie craindrois de me rendre importun, si ie continuois icy a examiner par ordre tous ses chapitres, & que cela me fist differer de respondre a la difficulté qu’il vous a pleu me proposer, touchant les moyens de se fortisier l’entendement pour discerner ce qui est le meilleur en toutes les actions de la vie. C’est pourquoy, sans m’arester maintenant a suiure Seneque, ie tascheray seulement d’expliquer mon opinion touchant cete matiere.

Il ne peut, ce me semble, y auoir que deux choses qui soyent requises pour estre tousiours disposé a bien iuger : l’vne est la connoissance de la verité, & l’autre l’habitude qui fait qu’on se souuient & qu’on acquiesce a cete connoissance, a toutes les fois que l’occasion le requert. Mais, pour ce qu’il n’y a que Dieu seul qui sçache parfaitement toutes choses, il est besoin que nous nous contentions de sçauoir celles qui sont le plus a nostre vsage.

Entre lesquelles la premiere & la principale est qu’il y a vn Dieu, de qui toutes choses dependent, dont les perfections sont infinies, dont le pouuoir est immense, dont les decrets sont infallibles car cela nous apprend a receuoir en bonne part toutes les choses qui nous arriuent., comme nous estant expressement enuoyées de Dieu ; & pour ce que le vray obiet de l’amour est la perfection, lorsque nous éleuons nostre esprit a IV 292 le considerer tel qu’il est, nous nous trouuons naturellement si enclins a l’aymer, que nous tirons mesme de la ioye de nos afflictions, en pensant que sa volonté s’execute en ce que nous les receuons.

La seconde chose, qu’il faut connoistre, est la nature de nostre ame, en tant qu’elle subsiste sans le cors, & est beaucoup plus noble que luy, & capable de iouir d’vne infinité de contentemens qui ne se trouuent point en cete vie : car cela nous empesche de craindre la mort, & detache tellement nostre affection des choses du monde, que nous ne regardons qu’auec mepris tout ce qui est au pouuoir de la fortune.

A quoy peut aussy beaucoup seruir qu’on iuge dignement des œuures de Dieu, & qu’on ait cete vaste idée de l’estendue de l’vniuers, que i’ay tasché de faire conceuoir au 3 liure de mes Principes car si on s’imagine qu’au dela des cieux il n’y a rien que des espaces imaginaires, & que tous ces cieux ne sont faits que pour le seruice de la terre, ny la terre que pour l’homme, cela fait qu’on est enclin a penser que cete terre est nostre principale demeure, & cete vie nostre meilleure ; & qu’au lieu de connoistre les perfections qui sont veritablement en nous, on attribue aux autres creatures des imperfections qu’elles n’ont pas, pour s’esleuer au dessus d’elles, & entrant en vne presomption impertinente, on veut estre du conseil de Dieu, & prendre auec luy la charge de conduire le monde, ce qui cause vne infinité de vaines inquietudes & fascheries.

Outre ces veritez, qui regardent en general toutes nos actions, il en faut aussy sçauoir plusieurs autres, qui se raportent plus particulierement a chascune d’elles. Dont les principales me semblent estre celles que i’ay remarquées en ma derniere letre : a sçauoir que toutes nos passions nous representent les biens, a IV 295 la recherche desquels elles nous incitent, beaucoup plus grans qu’ils ne sont veritablement ; & que les plaisirs du cors ne sont iamais si durables que ceux de l’ame, ny si grands, quand on les possede, qu’ils paroissent, quand on les espere.

A quoy ie ne puis adiouster autre chose, sinon qu’il faut aussy examiner en particulier toutes les mœurs des lieux ou nous viuons, pour sçauoir iusques ou elles doiuent estre suiuies. Et bien que nous ne puissions auoir des demonstrations certaines de tout, nous deuons neanmoins prendre parti, & embrasser les opinions qui nous paroissent les plus vraysemblables, touchant toutes les choses qui vienent en vsage, affin que, lorsqu’il est question d’agir, nous ne soyons iamais irresolus. Car il n’y a que la seule irresolution qui cause les regrets & les repentirs.

Au reste, i’ay dit cy dessus qu’outre la connoissance de la verité, l’habitude est aussy requise, pour estre tousiours disposé a bien iuger. Car, d’autant que nous ne pouuons estre continuellement attentifs a mesme chose, quelques claires & euidentes qu’ayent esté les raisons qui nous ont persuadé cy deuant quelque verité, nous pouuons, par apres, estre detournez de la croyre par de fausses apparences, si ce n’est que, par IV 296 vne longue & frequente meditation, nous l’ayons tellement imprimée en nostre esprit, qu’elle soit tournée en habitude.

Madame, de Vostre Altesse le tres humble & tres obeissant seruiteur de cartes.

Lorsque ie fermois cete letre, i’ay receu celle de V. A. du 13 ; mais i’y trouue tant de choses a considerer, que ie n’ose entreprendre d’y respondre sur le champ, & ie m’assure que V. A. aymera mieux que ie prene vn peu de tems pour y penser.

D’Egmont, 15 Sept. 1645.

ElisabethMonsieur Descartes,

Quoy que vos obseruations sur les sentiments que Seneque auoit du souuerain bien, m’en rendroient la lecture IV 302 plus profitable que ie ne la saurois trouuer de mon chef, ie ne suis point faschée de les changer pour des verités si necessaires que celles qui comprennent les moyens de fortisier l’entendement, pour discerner ce qui est le meilleur en toutes les actions de la vie, a condition que vous y aioutiez encore l’explication dont ma stupidité a besoin, touchant l’vtilité des connoissances que vous proposez.

Celle de l’exislence de Dieu & de ses attributs nous peut consoler des malheurs qui nous viennent du cours ordinaire de la nature & de l’ordre qu’il y a établi, comme de perdre le bien par l’orage, la santé par l’infection de l’air, les amis par la mort ; mais non pas de ceux qui nous sont imposés des hommes, dont l’arbitre nous paroist entierement libre, n’y ayant que la foi seule qui nous puisse persuader que Dieu prend le soin de regir les volontés, & qu’il a determiné la fortune de chaque personne auant la creation du monde.

L’immortalité de l’ame, & de sauoir qu’elle est de beaucoup plus noble que le corps, est capable de nous faire chercher la mort, aussi bien que la mespriser, puisqu’on ne sauroit douter que nous viurons plus heureusement, exemts des maladies & passions du corps. Et ie m’estonne que ceux qui se disoient persuadés de cette verité & viuoient sans la loi reuelée, prefereroient vne vie penible a vne mort auantageuse.

La grande estendue de l’vniuers, que vous auez IV 303 au troisiéme liure de vos principes, sert a detacher nos affections de ce que nous en voyons ; mais elle separe aussi cette prouidence particuliere, qui est le fondement de la theologie, de l’idée que nous auons de Dieu.

La consideration que nous sommes vne partie du tout, dont nous deuons chercher l’auantage, est bien la source de toutes les actions genereuses ; mais ie trouue beaucoup de difficultés aux conditions que vous leur prescriuez. Comment mesurer les maux qu’on se donne pour le public, contre le bien qui en arriuera, sans qu’ils nous paroissent plus grands, d’autant que leur idée est plus distincte ? Et quelle regle aurons nous pour la comparaison des choses qui ne nous sont point egalement connues, comme nostre merite propre & celuy de ceux auec qui nous viuons ? Vn naturel arrogant fera tousiours pancher la balance de son costé, & vn modeste s’estimera moins qu’il vaut.

Pour profiter des verités particulieres dont vous parlez, il faut connoistre exactement toutes ces passions & toutes ces preoccupations, dont la plupart sont insensibles. En obseruant les mœurs des pays ou nous sommes, nous en trouuons quelques fois de fort deraisonnables, qu’il est necessaire de suiure pour euiter de plus grands inconuenients.

Depuis que ie suis icy, i’en fais vne epreuue bien fascheuse ; car i’esperois profiter du seiour des champs, au tems que l’employerois a l’estude, & i’y rencontre, sans comparaison, moins de loisir que ie n’auois a la Haye, par les diuersions de ceux qui ne sauent que faire ; & quoy IV 304 qu’il soit tres-iniuste de me priuer de biens reels, pour leur en donner d’imaginaires, ie suis contrainte de ceder aux lois impertinentes de la ciuilité qui sont establies, pour ne m’acquerir point d’ennemis. Depuis que i’escris celle-cy, i’ay esté interrompue, plus de sept fois, par ces visites incommodes.

Votre tres-affectionnée a vous seruir, Élisabeth. Ce dernier de Septembre. Monsieur Descartes.

DescartesMadame,

Ie me suis quelquefois proposé vn doute : sçauoir s’il est mieux d’estre gay & content, en imaginant les IV 305 biens qu’on possede estre plus grands & plus estimables qu’ils ne sont, & ignorant ou ne s’arestant pas a considerer ceux qui manquent, que d’auoir plus de consideration & de sçauoir, pour connoistre la iuste valeur des vns & des autres, & qu’on deuiene plus triste. Si ie pensois que le souuerain bien fust la ioye. ie ne douterois point qu’on ne deust tascher de se rendre ioyeux, a quelque prix que ce pust estre, & i’approuuerois la brutalité de ceux qui noyent leurs deplaisirs dans le vin, ou les estourdissent auec du petun.

Mais lors qu’on peut auoir diuerses considerations egalement vrayes, dont les vnes portent a estre contens, & les autres, au contraire, nous en empeschent, il me semble que la prudence veut que nous nous arestions principalement a celles qui nous donnent de la satisfaction ; & mesme, a cause que presque toutes les choses du monde sont telles, qu’on les peut regarder de quelque costé qui les fait paroistre bonnes, & de quelque autre qui fait qu’on y remarque des defaux, ie croy que, si on doit vser de son adresse en quelque chose, c’est principalement a les sçauoir regarder du biais qui les fait paroistre le plus a nostre auantage, pouruu que ce soit sans nous tromper.

Ainsy, lorsque vostre Altesse remarque les causes pour lesquelles elle peut auoir eu plus de loysir, pour cultiuer sa raison, que beaucoup d’autres de son aage, s’il luy plaist aussy considerer combien elle a plus profité que ces autres, ie m’assure qu’elle aura de quoy se contenter. Et ie ne voy pas pourquoy elle ayme mieux se comparer a elles, en ce dont elle prend suiet de IV 307 se plaindre, qu’en ce qui luy pourroit donner de la satisfaction.

Il me semble aussy qu’on n’a point suiet de se repentir, lorsqu’on a fait ce qu’on a iugé estre le meilleur au tems qu’on a deu se resoudre a l’execution, encore que, par apres, y repensant auec plus de loysir, on iuge auoir failly. Mais on deuroit plutost se repentir, si on auoit fait quelque chose contre sa conscience, encore qu’on reconnust, par apres, auoir mieux fait qu’on n’auoit pensé : car nous n’auons a respondre que de nos pensées ; & la nature de l’homme n’est pas de tout sçauoir, ny de iuger tousiours si bien sur le champ, que lorsqu’on a beaucoup de temps a deliberer.

Au reste, encore que la vanité qui fait qu’on a meilleure opinion de soy qu’on ne doit, soit vn vice qui n’appartient qu’aux ames foibles & basses, ce n’est pas a dire que les plus fortes & genereuses se doiuent mespriser ; mais il se faut faire iustice a soy mesme, en reconnoissant ses perfections aussy bien que ses de IV 308 faux ; & si la bienseance empesche qu’on ne les publie, elle n’empesche pas pour cela qu’on ne les resente.

Enfin, encore qu’on n’ait pas vne science infinie, pour connoistre parfaitement tous les biens dont il arriue qu’on doit faire choix dans les diuerses rencontres de la vie, on doit, ce me semble, se contenter d’en auoir vne mediocre des choses plus necessaires, comme sont celles que i’ai denombrées en ma derniere letre.

En laquelle i’ay desia declaré mon opinion, touchant la difficulté que vostre Altesse propose : sçauoir, si ceux qui raportent tout a eux mesmes, ont plus de raison que ceux qui se tourmentent pour les autres. Car si nous ne pensions qu’a nous seuls, nous ne pourrions iouir que des biens qui nous sont particuliers ; au lieu que, si nous nous considerons comme parties de quelque autre cors, nous participons aussy aux biens qui luy sont communs, sans estre priuez pour cela d’aucun de ceux qui nous sont propres.

Et il est aysé a prouuer que le plaisir de l’ame auquel a consiste la beatitude, n’est pas inseparable de la gayeté & de l’ayse du cors, tant par l’exemple des tragedies, qui nous plaisent d’autant plus qu’elles excitent en nous plus de tristesse, que par celuy des exercices du cors, comme la chasse, le ieu de la paume & autres semblables, qui ne laissent pas d’estre agreables, encore qu’ils soient fort penibles ; & mesme on voit que souuent c’est la fatigue & la peine qui en augmente le plaisir.

Mais il faut que i’examine plus particulierement ces IV 310 passions, affin de les pouuoir definir ; ce qui me sera icy plus aysé, que si l’écriuois a quelque autre ; car vostre Altesse ayant pris la peine de lire le traité que i’ay autrefois esbauché, touchant la nature des animaux, vous sçauez desia comment ie conçoy que se forment diuerses impressions dans leur cerueau, les vnes par les obiets exterieurs qui meuuent les sens, les autres par les dispositions interieures du cors, ou par les vestiges des impressions precedentes qui sont demeurées en la memoire, ou par l’agitation des esprits qui vienent du cœur, ou aussy en l’homme par l’action de l’ame, laquelle a quelque force pour changer les impressions qui sont dans le cerueau, comme, reciproquement, ces impressions ont la force d’exciter en l’ame des pensées qui ne dependent point de sa volonté.

Il est vray que nous n’en auons quasi iamais aucunes qui ne dependent de plusieurs des causes que ie viens de distinguer ; mais on leur donne la denomination de celle qui est la principale, ou a laquelle IV 312 on a principalement egard : ce qui fait que plusieurs confondent le sentiment de la douleur auec la passion de la tristesse, & celuy du chatouillement auec la passion de la ioye, laquelle ils nomment aussy volupté ou plaisir, & ceux de la soif ou de la faim auec les desirs de boire ou de manger, qui sont des passions : car ordinairement les causes qui font la douleur, agitent aussy les esprits, en la façon qui est requise pour exciter la tristesse, & celles qui font sentir quelque chatouillement, les agitent en la façon qui est requise pour exciter la ioye, & ainsy des autres.

On confond aussy quelquefois les inclinations ou habitudes qui disposent a quelque passion, auec la passion mesme, ce qui est neanmoins facile a distinguer. Car, par exemple, lorsqu’on dit, dans vne ville, que les ennemis la vienent assieger, le premier iugement, que font les habitans, du mal qui leur en peut arriuer, est vne action de leur ame, non vne passion. Et bien que ce iugement se rencontre semblable en plusieurs, ils n’en sont pas toutefois egalement emeus, mais les vns plus, les autres moins, selon qu’ils ont plus ou moins d’habitude ou d’inclination a la crainte.

Voyla ce que ie pensois escrire, il y a 8 iours, a vostre Altesse, & mon dessein estoit d’y adiouster vne particuliere explication de toutes les passions ; mais ayant trouué de la difficulté a les denombrer, ie fus contraint de laisser partir le messager sans ma letre, & ayant receu cependant celle que V. A.

Il est vray aussy que la connoissance de l’immortalité de l’ame & des felicitez dont elle sera capable estant hors de cete vie, pourroit donner suiet d’en IV 315 sortir a ceux qui s’y ennuyent, s’ils estoient assurez qu’ils iouiroient, par apres, de toutes ces felicitez ; mais aucune raison ne les en assure, & il n’y a que la fausse Philosophie d’Hegesias, dont le liure fut defendu par Ptolomée, pource que plusieurs s’estoient tuez appres l’auoir leu, qui tasche a persuader que cete vie est mauuaise ; la vraye enseigne, tout au contraire, que, mesme parmi les plus tristes accidens & les plus pressantes douleurs, on y peut tousiours estre content, pouruû qu’on sçache vser de la raison.

Pour ce qui est de l’estenduë de l’vniuers, ie ne voy pas comment, en la considerant, on est conuié a separer la prouidence particuliere de l’idée que nous auons de Dieu car c’est tout autre chose de Dieu que des puissances finies, lesquelles pouuant estre espuisées, nous auons raison de iuger, en voyant qu’elles sont employées a plusieurs grands effects, qu’il n’est pas vraysemblable qu’elles s’estendent aussy iusques aux moindres ; mais d’autant que nous estimons les œuures de Dieu estre plus grands, d’autant mieux remarquons nous l’infinité de sa puissance ; & d’autant que cete infinité nous est mieux connue, d’autant sommes nous plus assurez qu’elle s’estend iusques a toutes les plus particulieres actions des hommes.

Ie ne croy pas aussy que, par cete prouidence particuliere de Dieu, que V. A. a dit estre le fondement IV 316 de la theologie, vous entendiez quelque changement qui arriue en ses decrets a l’occasion des actions qui dependent de nostre libre arbitre. Car la theologie n’admet point ce changement ; & lorsqu’elle nous oblige a prier Dieu, ce n’est pas affin que nous luy enseignions de quoy c’est que nous auons besoin, ny affin que nous taschions d’impetrer de luy qu’il change quelque chose en l’ordre establi de toute eternité par sa prouidence : l’un & l’autre seroit blasmable ; mais c’est seulement affin que nous obtenions ce qu’il a voulu de toute eternité estre obtenu par nos prieres.

I’auoüe qu’il est difficile de mesurer exactement iusques ou la raison ordonne que nous nous interessions pour le public ; mais aussy n’est ce pas vne chose en quoy il soit necessaire d’estre fort exact : il suffit de satisfaire a sa conscience, & on peut en cela donner beaucoup a son inclination. Car Dieu a tellement establi l’ordre des choses, & conioint les hommes ensemble d’vne si estroite societé, qu’encore que chascun raportast tout a soy mesme, & n’eust aucune charité pour les autres, il ne laisseroit pas de s’employer ordinairement pour eux en tout ce qui seroit de son pouuoir, pouruû qu’il vsast de prudence, principalement IV 317 s’il viuoit en vn siecle ou les mœurs ne fussent point corrompuës.

Madame, de Vostre Altesse le tres humble & tres obeissant seruiteur Des Cartes. D’Egmond, le 6 Octob. 1645.

ElisabethMonsieur Descartes,

Apres auoir donné de si bonnes raisons, pour montrer qu’il vaut mieux connoistre des verités a nostre desauantage, que se tromper agreablement, & qu’il n’y a que les choses qui admettent diuerses considerations egalement vrayes, qui nous doiuent obliger de nous arrester a celle qui nous apportera plus de contentement, ie m’estonne que vous voulez que ie me compare a ceux de mon age, plutost en chose qui m’est inconnue qu’en ce que ie ne saurois ignorer, encore que celle-la soit plus a mon auantage.

Mais cela ne suffit point, pour appuyer la doctrine contenue dans vne de vos precedentes, que les passions sont d’autant plus vtiles, qu’elles panchent plus vers l’exces, lorsqu’elles sont soumises a la raison, parce qu’il semble qu’elles ne peuuent point estre excessiues & soumises. Mais ie crois que vous eclaircirez ce doute, en prenant la peine de decrire comment cette agitation particuliere des esprits sert a former toutes les passions que nous experimentons, & de quelle fasson elle corromt le raisonnement. Ie n’oserois vous en prier, si ie ne sauois que vous ne laissez point d’œuure imparfaite, & qu’en entreprenant d’enseigner vne personne stupide, comme moy, vous vous estes preparé aux incommodités que cela vous apporte.

C’est ce qui me fait continuer a vous dire, que ie ne suis point persuadée, par les raisons qui prouuent l’existence de Dieu, & qu’il est la cause immuable de tous les effets qui ne dependent point du libre arbitre de l’homme, qu’il l’est IV 323 encore de ceux qui en dependent. De sa perfection souueraine il suit necessairement qu’il pourroit l’estre, c’est-a-dire qu’il pourroit n’auoir point donné de libre arbitre a l’homme ; mais, puisque nous sentons en auoir, il me semble qu’il repugne au sens commun de le croire dependant en ses operations, comme il l’est dans son estre.

Si on est bien persuadé de l’immortalité de l’ame, il est impossible de douter qu’elle ne sera plus heureuse apres la separation du corps (qui est l’origine de tous les deplaisirs de la vie, comme l’ame des plus grands contentements), sans l’opinion de M. Digby, par laquelle son precepteur (dont vous auez veu les escrits) luy a fait croire la necessité du purgatoire, en luy persuadant que les passions qui ont dominé sur la raison, durant la vie de l’homme, laissent encore quelques vestiges en l’ame, apres le deces du corps, qui la tourmentent d’autant plus qu’elles ne trouuent aucun moyen de se satisfaire dans vne substance si pure. Ie ne vois pas comment cela s’accorde a son immaterialité.

Par cette prouidence particuliere, qui est le fondement de la theologie, i’entends celle par laquelle Dieu a, de toute eternité, prescrit des moyens si estranges, comme son incarnation, pour vne partie du tout cree, si inconsiderable au prix du reste, comme vous nous representez ce globe IV 324 en vostre physique ; & cela, pour en estre glorifié, qui semble vne fin fort indigne du createur de ce grand vniuers. Mais ie vous presentois, en cecy, plutost l’obiection de nos theologiens que la mienne, l’ayant tousiours creu chose tres impertinente, pour des personnes finies, de iuger de la cause finale des actions d’vn estre infini.

Vous ne croyez pas qu’on a besoin d’vne cognoissance exacte, iusqu’ou la raison ordonne que nous nous interessions pour le public, a cause qu’encore qu’vn chacun raportast tout a soy, il trauailleroit aussi pour les autres, s’il se seruoit de prudence. Et cette prudence est le tout, dont ie ne vous demande qu’vne partie. Car, en la possedant, on ne sauroit manquer a faire iustice aux autres, comme a soy mesme, & c’est son defaut qui est cause qu’vn esprit franc perd quelquefois le moien de seruir sa patrie, en s’abandonnant trop legerement pour son interest, & qu’vn timide se perd auec elle, a faute de hazarder son bien & sa fortune pour sa conseruation.

I’ay tousiours esté en vne condition, qui rendoit ma vie tres inutile aux personnes que i’aime ; mais ie cherche sa conseruation auec beaucoup plus de soin, depuis que i’ay le bonheur de vous connoistre, parce que vous m’auez montré les moyens de viure plus heureusement que ie ne faisois. Il ne me manque que la satisfaction de vous pouuoir tesmoigner combien cette obligation est ressentie de

Vostre affectionnée amie a vous seruir, Élisabeth. De La Haye, ce 28 d’8bre. M. Descartes.

DescartesMadame,

Il m’arriue si peu souuent de rencontrer de bons raisonnemens, non seulement dans les discours de ceux que ie frequente en ce desert, mais aussy dans les liures que ie consulte, que ie ne puis lire ceux qui sont dans les letres de vostre Altesse, sans en auoir vn resentiment de ioye extraordinaire ; et ie les trouue si forts, que i’ayme mieux auouer d’en estre vaincu, que d’entreprendre de leur resister. Car, encore que la IV 331 comparaison que V. A.

Ie n’oserois aussy contredire a ce que V. A. escrit du repentir, vu que c’est vne vertu chrestiene, laquelle sert pour faire qu’on se corrige, non seulement des fautes commises volontairement, mais aussy de celles qu’on a faites par ignorance, lorsque quelque passion a empesché qu’on ne connust la verité.

Et i’auouë bien que la tristesse des tragedies ne plairoit pas, comme elle fait, si nous pouuions craindre qu’elle deuint si excessiue que nous en fussions incommodez. Mais, lorsque i’ay dit qu’il y a des passions qui sont d’autant plus vtiles qu’elles penchent plus vers l’exces, i’ay seulement voulu parler de celles qui sont toutes bonnes ; ce que i’ay tesmoigné, en adioustant qu’elles doiuent estre suietes a la raison. Car il y a deux sortes d’exces : l’vn qui, changeant la nature de la chose, & de bonne la rendant mauuaise, empesche qu’elle ne demeure soumise a la raison ; l’autre qui en augmente seulement la mesure, & ne fait que de bonne IV 332 la rendre meilleure.

I’ay pensé ces iours au nombre & a l’ordre de toutes ces passions, affin de pouuoir plus particulierement examiner leur nature ; mais ie n’ay pas encore assez digeré mes opinions, touchant ce suiet, pour les oser escrire a V. A., & ie ne manqueray de m’en acquiter de plustost qu’il me sera possible.

Pour ce qui est du libre arbitre, ie confesse qu’en ne pensant qu’a nous mesmes, nous ne pouuons ne le pas estimer independant ; mais lorsque nous pensons a la puissance infinie de Dieu, nous ne pouuons ne pas croyre que toutes choses dependent de luy, &, par consequent, que nostre libre arbitre n’en est pas exemt. Car il implique contradiction de dire que Dieu ait creé les hommes de telle nature, que les actions de leur volonté ne dependent point de la siene, pour ce que c’est le mesme que si on disoit que sa puissance est tout ensemble finie & infinie : finie, puisqu’il y a quelque chose qui n’en depend point ; & infinie, puisqu’il a pu creer cete chose independante.

Pour ce qui regarde l’estat de l’ame apres cete vie, i’en ay bien moins de connoissance que Mr d’Igby ; car, laissant a part ce que la foy nous en enseigne, ie confesse que, par la seule raison naturelle, nous pouuons bien faire beaucoup de coniectures a nostre auantage & auoir de belles esperances, mais non point aucune assurance. Et pour ce que la mesme raison naturelle nous apprent aussy que nous auons tousiours plus de biens que de maux en cete vie, & que nous ne deuons point laisser le certain pour l’incertain, elle me semble nous enseigner que nous ne deuons pas veritablement craindre la mort, mais que nous ne deuons aussy iamais la rechercher.

Ie n’ay pas besoin de respondre a l’obiection que peuuent faire les Theologiens, touchant la vaste estendue que i’ay attribuée a l’vniuers, pour ce que V. A. y a desia respondu pour moy. I’adiouste seulement que, si cete estenduë pouuoit rendre les mysteres de nostre religion moins croyables, celle que les astronomes ont attribuée de tout tems aux cieux, auroit pu faire le mesme, pour ce qu’ils les ont considerez si grans IV 334 que la terre n’est, a leur comparaison, que comme vn point ; & toutefois cela ne leur est point obiecté.

Au reste, si la prudence estoit maitresse des euenemens, ie ne doute point que V. A. ne vint a bout de tout ce qu’elle voudroit entreprendre ; mais il faudroit que tous les hommes fussent parfaitement sages, affin que, sçachant ce qu’ils doiuent faire, on pust estre assuré de ce qu’ils seront. Ou bien il faudroit connoistre particulierement l’humeur de tous ceux auec lesquels on a quelque chose a demesler ; & encore ne seroit-ce pas assez, a cause qu’ils ont, outre cela, leur libre arbitre, dont les mouuemens ne sont connus que de Dieu seul.

Madame, De vostre Altesse le tres humble & tres obeissant seruiteur, Des Cartes. D’Egmond, le 3 Nou. 1645.

ElisabethMonsieur Descartes,

Vous aurez suiet de vous estonner, qu’apres m’auoir tesmoigné que mon raisonnement ne vous paroissoit pas tout a fait ridicule, ie demeure si longtemps sans en tirer l’auantage que vos responses me donnent. Et c’est auec honte que ie vous en auoue la cause, puisqu’elle a renuersé tout ce que vos lessons sembloient auoir establi dans mon esprit. Ie croyois qu’vne forte resolution de ne chercher la beatitude qu’aux choses qui dependent de ma volonté, me rendroit moins sensible a celles qui me viennent d’ailleurs, auant que la folie d’vn de mes freres m’ait fait connoistre ma foiblesse. Car elle m’a plus troublée la santé du corps & la tranquillité de l’ame, que tous les malheurs qui me sont encore arriués.

Ie vous auoüe de mesme, qu’encore que ie ne comprenne pas que l’independance du libre arbitre ne repugne pas moins a l’idée que nous auons de Dieu, que sa dependance a sa liberté, il m’est impossible de les aiuster, estant autant impossible, pour la volonté, d’estre en mesme temps libre & attachée aux decrets de la Prouidence, que, pour le pouuoir diuin, d’estre infini & limité tout ensemble. Ie ne vois point leur compatibilité, dont vous parlez, ni comment cette dependance de la volonté peut estre d’autre nature que sa liberté, si vous ne prenez la peine de me l’enseigner.

Au regard du contentement, ie confesse que la possession presente est de beaucoup plus asseurée que l’attente du futur, sur quelque bonne raison qu’elle soit fondée. Mais i’ay de la peine a me persuader que nous auons tousiours IV 337 plus de biens, dans la vie, que de maux, puisqu’il faut plus pour composer ceux la que ceux ci ; que l’homme a plus d’endroits, pour receuoir du deplaisir, que du plaisir ; qu’il y a vn nombre infini d’erreurs, pour vne verité ; tant de moiens de se fouruoyer, pour vn qui mene le droit chemin ; quantité de personnes en dessein & en pouuoir de nuire, pour peu qui ayent l’vn & l’autre a seruir.

Pour la prudence, en ce qui concerne la societé humaine, ie n’en attens point de regle infaillible, mais ie serois bien aise de voir celles que vous voudriez donner a celui qui, en viuant seulement pour soy, en quelque profession qu’il aye, ne lairroit pas de trauailler encore pour autruy, si i’osois vous demander plus de lumiere, apres auoir si mal employé celle que vous auez desia donné a

Vostre tres affectionnée amie a vous seruir, Élisabeth. Monsieur Descartes.

Monsieur Descartes,

Le fils du feu professeur Schooten m’a rendu aujourd’hui la lettre que vous m’escriuiez en la consideration, pour m’empescher que ie ne m’engage a fauoriser son concurrant. Et comme ie lui tesmoignay que ie n’estois pas seulement sans dessein de lui nuire, mais obligée de le seruir, autant que ie le pourray, depuis que vous me mandez de l’aimer & de lui estre redeuable, il me pria ensuite de le recommander aux Curateurs. N’y ayant que deux de ma cognoissance, MM.

Monsieur Descartes, Vostre tres-affectionnée a vous seruir, Élisabeth. Ce 27e de 10bre

I’ay peur que vous n’auez pas receu ma derniere du 30me du passé, parce que vous n’en faites point mention. Ie serois fachée qu’elle venoit entre les mains de quelqu’vn de ces critiques, qui condamnent pour heresies tous les doutes qu’on fait des opinions receues.

DescartesMadame,

Ie ne puis nier que ie n’aye esté surpris d’apprendre que vostre Altesse ait eu de la fascherie, iusqu’à en estre incommodée en sa santé, pour vne chose que la plus grande part du monde trouuera bonne, & que plusieurs fortes raisons peuuent rendre excusable enuers les autres.

Pour ce qui regarde la prudence du siecle, il est vray que ceux qui ont la fortune chez eux, ont raison de demeurer tous autour d’elle, & de ioindre leurs forces ensemble pour empescher qu’elle n’échape ; mais ceux de la maison desquels elle est fugitiue, ne sont, ce me semble, point mal de s’accorder à suiure diuers chemins, afin que, s’ils ne la peuuent trouuer tous, il y en ait au moins quelqu’vn qui la rencontre. Et cependant, pource qu’on croit que chacun d’eux a plusieurs resources, ayant des amis en diuers partis, cela les rend plus considerables, que s’ils estoient tous engagez dans vn seul.

Il est besoin aussi que ie distingue deux sortes de biens, pour accorder ce que i’ay cy deuant écrit (à sçauoir qu’en cette vie nous auons tousiours plus de biens que de maux) auec ce que V. Altesse m’obiecte touchant toutes les incommoditez de la vie. Quand on considere l’idée du bien pour seruir de regle à nos actions, on le prend pour toute la perfection qui peut estre en la chose qu’on nomme bonne, & on la compare à la ligne droite, qui est vnique entre vne infinité de courbes ausquelles on compare les maux. C’est en ce sens que les Philosophes ont coutume de dire que bonum est ex integrâ causâ, malum ex quouis defectu.

La raison qui me fait croire que ceux qui ne font rien que pour leur vtilité particuliere, doiuent aussi bien que les autres trauailler pour autruy, & tascher de faire plaisir à vn chacun, autant qu’il est en leur pouuoir, s’ils veulent vser de prudence, est qu’on voit ordinairement arriuer que ceux qui sont estimez officieux & prompts à faire plaisir, reçoiuent aussi quantité de bons offices des autres, mesme de ceux qu’ils n’ont iamais obligez, lesquels ils ne receuroient pas, si on les croyoit d’autre humeur, & que les peines qu’ils ont à faire plaisir, ne sont point si grandes que les commoditez que leur donne l’amitié de ceux qui les connoissent.

ElisabethMonsieur Descartes,

Le traité que mon frere Philippe a conclu auec la Republique de Venise m’a fait auoir, tout depuis vostre depart, vne occupation beaucoup moins agreable que celle que vous m’auiez laissée, touchant vne matiere qui passe ma science, a laquelle ie n’estois appelée que pour suppleer a l’impatience du ieune homme a qui elle s’adressoit.

Mais puisque sa partie physique n’est pas si claire aux ignorants, ie ne vois point comment on peut sauoir les diuers mouuements du sang, qui causent les cinq passions primitiues, puisqu’elles ne sont iamais seules. Par exemple, l’amour est touiours accompagnée de desir & de ioye, ou de desir & de tristesse, & a mesure qu’il se fortifie, les autres croissent aussi,… au contraire. Comment est-il donc possible de remarquer la difference du battement de poulx, de la digestion des viandes, & autres changements du corps, qui seruent a decouurir la nature de ces mouuements ?

Lorsque vous parlez des signes exterieurs de ces passions, vous dites que l’admiration, iointe a la ioye, fait enfler le poumon a diuerses secousses, pour causer le rire. A quoy ie vous supplie d’aiouter de quelle fasson l’admiration (qui, selon vostre description, semble n’operer que sur le cerueau) peut ouurir si promtement les orifices du cœur, pour faire cet effet.

Ces passions, que vous notez pour cause des soupirs, ne semblent pas touiours l’estre, puisque la coutume & la repletion de l’estomac les produisent aussi.

Mais ie trouue encore moins de difficulté a entendre tout ce que vous dites des passions, qu’a pratiquer les remedes que vous ordonnez contre leurs excés. Car comment preuoir tous les accidents qui peuuent suruenir en la vie, qu’il est impossible de nombrer ? Et comment nous empescher de desirer auec ardeur les choses qui tendent necessairement a la conseruation de l’homme (comme la santé & les moyens pour viure), qui neantmoins ne dependent point de son arbitre ?

Puisque vous m’auez desia dit les principales, touchant IV 406 la vie particuliere, ie me contenterois de sauoir encore vos maximes touchant la vie ciuile, quoy que celle-la nous rende dependants de personnes si peu raisonnables, que iusqu’icy ie me suis touiours mieux trouuée de me seruir de l’experience que de la raison, aux choses qui la concernent.

I’ay esté si souuent interrompue, en vous escriuant, que ie suis contrainte de vous enuoyer mon brouillon, & de me seruir du messager d’Alcmar, ayant oublié le nom de l’ami, a qui vous vouliez que i’adresse mes lettres ; pour cela ie n’ose vous renuoyer vostre traitté, iusqu’a ce que ie le sache, ne pouuant me resoudre de hazarder entre les mains d’vn iurogne vne piece de si grand prix, qui a donné tant de satisfaction a

Vostre tres-affectionnée amie a vous seruir, Élisabeth. Monsieur Descartes. Ce 15/25 Auril.

DescartesMadame,

Ie reconnois, par experience, que i’ay eu raison de mettre la gloire au nombre des passions ; car ie ne puis m’empescher d’en estre touché, en voyant le fauorable iugement que fait vostre Altesse du petit traité que i’en ay écrit. Et ie ne suis nullement surpris de ce qu’elle y remarque aussi des defauts, pource que ie n’ay point douté qu’il n’y en eust en grand nombre, estant vne matiere que ie n’auois iamais cy-deuant étudiée, & dont ie n’ay fait que tirer le premier crayon, sans adiouter les couleurs & les ornemens qui seroient requis pour la faire paroistre à des yeux moins clair-voyans que ceux de vostre Altesse.

Ie n’y ay pas mis aussi tous les principes de Physique dont ie me suis seruy pour déchifrer quels sont les mouuemens du sang qui accompagnent chaque passion, pource que ie ne les sçaurois bien deduire sans expliquer la formation de toutes les parties du corps humain ; & c’est vne chose si difficile que ie ne l’oserois encore entreprendre, bien que ie me sois à peu prés satisfait moy-mesme touchant la verité des principes que i’ay supposez en cét écrit.

Ie croy bien que la tristesse oste l’apetit à plusieurs ; mais, pource que i’ay tousiours éprouué en moy qu’elle l’augmente, ie m’estois reglé là dessus. Et i’estime que la difference qui arriue en cela, vient de ce que le premier suiet de tristesse que quelques-vns ont eu au commencement de leur vie, a esté qu’ils ne receuoient pas assez de nourriture, & que celuy des autres a esté que celle qu’ils receuoient leur estoit nuisible. Et en ceux-cy le mouuement des esprits qui oste l’apetit est tousiours depuis demeuré ioint auec la passion de la tristesse. Nous voyons aussi que les mouuemens qui accompagnent les autres passions ne sont pas entierement semblables en tous les hommes, ce qui peut estre attribué à pareille cause.

Pour l’admiration, encore qu’elle ait son origine dans le cerueau, & ainsi que le seul temperament du sang ne la puisse causer, comme il peut souuent causer la ioye ou la tristesse, toutesfois elle peut, par le moyen de l’impression qu’elle fait dans le cerueau, agir sur le corps autant qu’aucune des autres passions, ou mesme plus en quelque façon, à cause que la surprise qu’elle contient cause les mouuemens les plus promts de tous.

Les mesmes signes exterieurs, qui ont coutume d’accompagner les passions, peuuent bien aussi quelquefois estre produits par d’autres causes. Ainsi la rougeur du visage ne vient pas tousiours de la honte ; mais elle peut aussi venir de la chaleur du feu, ou bien de ce qu’on fait de l’exercice. Et le ris qu’on nomme sardonien, n’est autre chose qu’vne conuulsion des nerfs du visage. Et ainsi on peut soupirer quelquefois par coutume, ou par maladie, mais cela n’empesche pas que les soupirs ne soient des signes exterieurs de la tristesse & du desir, lors que ce sont ces passions qui les causent.

Pour les remedes contre les excez des passions, i’auoüe bien qu’ils sont difficiles à pratiquer, & mesme qu’ils ne peuuent suffire pour empescher les desordres qui arriuent dans le corps, mais seulement pour faire que l’ame ne soit point troublée, & qu’elle puisse retenir son iugement libre. A quoy ie ne iuge pas qu’il soit besoin d’auoir vne connoissance exacte de la verité de chaque chose, ny mesme d’auoir preueu en particulier tous les accidens qui peuuent suruenir, ce qui seroit sans doute impossible ; mais c’est assez d’en auoir imaginé en general de plus fascheux que ne sont ceux qui arriuent, & de s’estre preparé à les souffrir.

le mene vne vie si retirée, & l’ay tousiours esté si IV 412 éloigné du maniment des affaires, que ie ne serois pas moins impertinent que ce Philosophe qui vouloit enseigner le deuoir d’vn Capitaine en la presence d’Hannibal, si i’entreprenois d’écrire icy les maximes qu’on doit obseruer en la vie ciuile.

Madame,

L’occasion que i’ay de donner cette lettre à Monsieur de Beclin, qui m’est tres-intime amy, & à qui ie me fie autant qu’à moy-mesme, est cause que ie prens la liberté de m’y confesser d’vne faute tres-signalée que i’ay commise dans le Traité des passions, en ce que, pour flater ma negligence, i’y ay mis, au nombre des émotions de l’ame qui sont excusables, vne ie ne sçay quelle langueur qui nous empesche quelquefois de mettre en execution les choses qui ont esté approuuées par nostre iugement.

ElisabethMonsieur Descartes,

Puisque vostre voyage est arresté pour le 3me/13 de ce mois, il faut que ie vous represente la promesse que vous m’auez faite de quitter vostre agreable solitude, pour me donner le bonheur de vous voir, auant que mon partement d’icy m’en fasse perdre l’esperance pour 6 ou 7 mois, qui est le terme le plus esloigné que le congé de la Reine ma mere, de M. mon frere, & le sentiment des amis de nostre maison ont prescrit a mon absence.

Vostre tres affectionnée amie a vous seruir, Élisabeth. M. Descartes,

Ie suis obligée d’enuoyer celle cy par le messager, parce que sa promtitude m’est plus necessaire, a cette heure, que sa seureté.

C’est au regard de tels Princes qu’il a pû dire, au chapitre 3 : Qu’ils ne sçauroient manquer d’estre haïs de plusieurs ; & qu’ils ont souuent plus d’auantage à faire beaucoup de mal qu’à en faire moins, pource que les legeres offenses sufisent pour donner la volonté de se vanger, & que les grandes en ostent le pouuoir. Puis, au chapitre 15 : Que, s’ils vouloient estre gens de bien, il seroit impossible qu’ils ne se ruinassent parmy le grand nombre de méchans qu’on trouue par tout. Et au chapitre 19 : IV 487 Qu’on peut estre hay pour de bonnes actions aussi bien que pour de mauuaises.

Sur lesquels fondemens il appuye des preceptes tres tyranniques, comme de vouloir qu’on ruine tout vn païs, afin d’en demeurer le maistre ; qu’on exerce de grandes cruautez, pouruû que ce soit promtement & tout à la fois ; qu’on tasche de paroistre homme de bien, mais qu’on ne le soit pas veritablement ; qu’on ne tienne sa parole qu’aussi long-temps qu’elle sera vtile ; qu’on dissimule, qu’on trahisse ; & enfin que, pour regner, on se dépoüille de toute humanité, & qu’on deuienne le plus farouche de tous les animaux

Mais c’est vn tres mauuais suiet pour faire des liures, que d’entreprendre d’y donner de tels preceptes, qui, au bout du conte, ne sçauroient assurer ceux ausquels il les donne ; car, comme il auoüe luy-mesme, ils ne se peuuent garder du premier qui voudra negliger sa vie pour se vanger d’eux.

On doit aussi distinguer entre les suiets, les amis IV 488 ou alliez, & les ennemis. Car, au regard de ces derniers, on a quasi permission de tout faire, pouruû qu’on en tire quelque auantage pour soy ou pour ses suiets ; & ie ne desaprouue pas, en cette occasion, qu’on acouple le renard auec le lion, & qu’on ioigne l’artifice à la force. Mesme ie comprens, sous le nom d’ennemis, tous ceux qui ne sont point amis ou alliez, pource qu’on a droit de leur faire la guerre, quand on y trouue son auantage, & que, commençans à deuenir suspects & redoutables, on a lieu de s’en défier.

Pour ce qui regarde les alliez, vn Prince leur doit tenir exactement sa parole, mesme lors que cela luy est preiudiciable ; car il ne le sçauroit estre tant, que la reputation de ne manquer point à faire ce qu’il a promis, luy est vtile, & il ne peut acquerir cette reputation que par de telles occasions, où il y va pour luy de quelque perte ; mais en celles qui le ruineroient tout à fait, le droit des gens le dispense de sa promesse. Il doit aussi vser de beaucoup de circonspection, auant que de promettre, afin de pouuoir tousiours garder sa IV 489 foy.

Pour ce qui est des suiets, il y en a de deux sortes : à sçauoir les grands & le peuple. Ie comprens, sous le nom de grands, tous ceux qui peuuent former des partis contre le Prince, de la fidelité desquels il doit estre tres assuré ; ou, s’il ne l’est pas, tous les politiques sont d’accord qu’il doit employer tous ses soins à les abaisser, & qu’en tant qu’ils sont enclins à broüiller l’Estat, il ne les doit considerer que comme ennemis.

Ainsi ie desaprouue la maxime du chapitre 15 : Que, le monde estant fort corrompu, il est impossible qu’on ne se ruine, si l’on veut estre tousiours homme de bien ; & qu’vn Prince, pour se maintenir, doit apprendre à estre méchant, lors que l’occasion le requiert ; si ce n’est peut-estre que, par vn homme de bien, il entende vn homme superstitieux & simple, qui n’ose donner bataille au iour du Sabath, & dont la conscience ne puisse estre en repos, s’il ne change la religion de son peuple. Mais, pensant qu’vn homme de bien est celuy qui fait tout ce que luy dicte la vraye raison, il est certain que le meilleur est de tascher à l’estre tousiours.

le ne croy pas aussi ce qui est au chapitre 19 : Qu’on peut autant estre hay pour les bonnes actions, que pour les mauuaises, sinon en tant que l’enuie est vne espece de haine ; mais cela n’est pas le sens de l’Auteur.

Au reste, ie ne suis pas aussi de l’opinion de cét Auteur, en ce qu’il dit en sa Preface : Que, comme il faut estre dans la plaine, pour mieux voir la figure des montagnes, lors qu’on en veut tirer le crayon, ainsi on doit estre de condition priuée, pour bien connoistre l’office d’vn Prince. Car le crayon ne represente que les choses qui se voyent de loin ; mais les principaux motifs des actions des Princes sont souuent des circonstances si particulieres, que, si ce n’est qu’on soit Prince soy-mesme, ou bien qu’on ait esté fort longtemps participant de leurs secrets, on ne les sçauroit imaginer.

C’est pourquoy ie meriterois d’estre mocqué, si ie pensois pouuoir enseigner quelque chose à vostre Altesse en cette matiere ; aussi n’est-ce pas mon dessein, mais seulement de faire que mes lettres luy donnent quelque sorte de diuertissement, qui soit different de ceux que ie m’imagine qu’elle a en son voyage, lequel ie luy souhaite parfaitement heureux : comme sans doute il le sera, si vostre Altesse se resout de pratiquer ces maximes qui enseignent que la felicité d’vn chacun depend de luy-mesme, & qu’il faut tellement se tenir hors de l’empire de la fortune, que, bien qu’on ne perde pas les occasions de retenir les auantages qu’elle peut donner, on ne pense pas toutesfois estre malheureux, lors qu’elle les refuse ; & pource qu’en toutes les affaires du monde il y a quantité de raisons pour & contre, qu’on s’arreste principalement à considerer celles qui seruent à faire qu’on approuue les choses qu’on voit arriuer.

ElisabethMonsieur Descartes.

Vous auez raison de croire que le diuertissement que vos lettres m’aportent, est different de celuy que i’ay eu au voyage, puisqu’il me donne vne satisfaction plus grande & plus durable ; encore que i’aye trouuée en celuy cy toute celle que me peuuent donner l’amitié & les caresses de mes proches, ie les considere comme choses qui pourroient changer, au lieu que les verités que celle la m’apprend IV 520 , laissent des impressions en mon esprit, qui contribueront touiours au contentement de ma vie.

I’ay mille regrets de n’auoir point amené le liure, que vous auez pris la peine d’examiner pour m’en dire vostre Sentiment, par terre, me laissant persuader que le bagage que i’enuoirois par mer a Hambourg, seroit icy plutost que nous ; & il n’y est pas encore, quoy que nous y sommes arriués le 7/17 Septembre du passé. C’est pourquoy ie ne me saurois representer des maximes de cet auteur qu’autant qu’vne tres mauuaise memoire me peut fournir d’vn liure que ie n’ay point regardé de 6 ans.

Il me semble aussi que, pour enseigner le gouuernement d’vn Estat, il se propose l’Estat le plus difficile a gouuerner, où le prince est vn nouuel vsurpateur, au moins en l’opinion du peuple ; & en ce cas, l’opinion qu’il aura luy mesme de la iustice de sa cause, pourroit seruir au repos de sa conscience, mais non a celuy de ses affaires, où les loix contrarient son autorité, où les grands la contreminent & où le peuple la maudit.

Il me semble qu’il y aioute encore, ou bien l’enseigne, par l’exemple du neueu du pape Alexandre, qu’il propose comme vn politique parfait, que le Prince doit employer a ces grandes cruautés quelque Ministre qu’il puisse par apres sacrifier a la haine du peuple ; & quoy qu’il paroisse iniuste au Prince de faire perir vn homme qui luy auroit obei, ie trouue que des personnes si barbares & desnaturés, qui se veulent employer a seruir de bourreau a tout vn peuple, pour quelque consideration que ce soit, ne meritent point de meilleur traitement ; & pour moy, ie prefererois la condition du plus pauure paisan d’Hollande, a celle du Ministre qui voudroit obeir a pareils ordres, ou a celle du Prince qui seroit contraint de les donner.

Lorsque le mesme auteur parle des alliez, il les suppose, pareillement, aussi mechans qu’ils peuuent estre, & les affaires en telle extremité, qu’il faut perdre toute vne republique, ou rompre sa parole a ceux qui ne la gardent qu’aussi long tems qu’elle leur est vtile.

Mais, s’il a tort de faire des maximes generales de ce qui ne se doit pratiquer qu’en fort peu d’occasions, il pesche en cela esgalement auec presque tous les Sts Peres & les anciens philosophes, qui en font de mesme ; & ie crois que cela vient du plaisir qu’ils prennent a dire des paradoxes, qu’ils peuuent apres expliquer a leurs escoliers.

Ie trouue que la regle, que vous obseruez en sa preface, est fausse, parce qu’il n’a point cognu de personne clairuoyante en tout ce qu’elle se propose, comme vous estes, par consequent qui, de priuée & retirée hors de l’embarras du monde, seroit neanmoins capable d’enseigner aux princes comme ils doiuent gouuerner, comme il paroist a ce que vous en escrites.

Pour moy, qui n’en ay que le titre, ie n’estudie qu’a me seruir de la regle que vous mettez a la fin de vostre lettre, en taschant de me rendre les choses presentes les plus agreables que ie puis. Icy ie n’y rencontre point beaucoup de difficulté, estant en vne maison où i’ay esté cherie depuis mon enfance & où tout le monde conspire a me faire des caresses. Encore que ceux la me detournent quelques fois d’occupations plus vtiles, ie supporte aisement cette incommodité, par le plaisir qu’il y a d’estre IV 523 aimé de ses proches.

Ie n’en ay esté qu’vne petite lieue esloignée, a Cheuningen, où nous auons rencontré toute la famille de ceans qui en venoit. M. l’Electeur m’y vouloit mener pour la voir ; mais puisque le reste de nostre compagnie opinoit pour vn autre diuertissement, ie n’osois point leur contredire, & me satisfaisois d’en voir & gouter l’eau, dont il a diuerses sources de different goust ; mais on ne se sert principalement que de deux, dont la premiere est claire, salée, & vne forte purge ; l’autre, vn peu blanchastre, gouste comme de l’eau meslée auec du lait, & est, a ce qu’on dit, rafraischissante. On parle de quantité de guerisons miraculeuses qu’elles font ; mais ie n’en ay pu apprendre de personne digne de foy.

I’ay examiné le chiffre que vous m’auez enuoyé, & le trouue fort bon, mais trop prolixe pour escrire tout vn sens ; & si on n’escrit que peu de paroles, on les trouueroit par la quantité des lettres. Il vaudroit mieux faire vne clef des paroles par l’alphabet, & puis marquer quelque distinction entre les nombres qui signifient des lettres & celles qui signifient des paroles.

I’ai icy si peu de loisir a escrire, que ie suis contrainte de vous enuoyer ce brouillon, où vous pouvez remarquer, a la difference de la plume, toutes les fois que i’ay esté interrompue. Mais i’aime mieux paroistre deuant vous auec toutes mes fautes, que de vous donner suiet de croire que i’ay vn vice si esloigné de mon naturel, comme celuy doublier mes amis en l’absence, principalement vne personne que ie ne saurois cesser d’affectionner, sans cesser aussi d’estre raisonnable, comme vous, Monsieur, a qui ie seray toute ma vie,

Vostre tres affectionnée amie a vous seruir, Élisabeth. Monsieur Descartes, De Berlin, ce 30me de Septembre.

DescartesMadame,

I’ay receu vne tres-grande faueur de vostre Altesse, en ce qu’elle a voulu que i’aprisse par ses lettres le succez de son voyage, & qu’elle est arriuée heureusement en vn lieu où, estant grandement estimée & cherie de ses proches, il me semble qu’elle a autant de biens qu’on en peut souhaiter auec raison en cette vie. Car, sçachant la condition des choses humaines, ce seroit trop importuner la fortune, que d’attendre d’elle tant de graces, qu’on ne pust pas, mesme en imaginant, trouuer aucun suiet de fascherie. Lors qu’il n’y a point d’obiets presens qui offensent les IV 529 sens, ny aucune indisposition dans le corps qui l’incommode, vn esprit qui suit la vraye raison peut facilement se contenter.

Et mesme aussi i’ose croire que la ioye interieure a quelque secrette force pour se rendre la fortune plus fauorable. Ie ne voudrois pas écrire cecy à des personnes qui auroient l’esprit foible, de peur de les induire à quelque superstition ; mais, au regard de vostre Altesse, i’ay seulement peur qu’elle se moque de me voir deuenir trop credule. Toutesfois i’ay vne infinité d’experiences, & auec cela l’autorité de Socrate, pour confirmer mon opinion.

Ainsi i’ose icy exhorter vostre Altesse, puis qu’elle se rencontre en vn lieu où les obiets presens ne luy donnent que de la satisfaction, qu’il luy plaise aussi contribuer du sien, pour tascher à se rendre contente ; ce qu’elle peut, ce me semble, aisement, en n’arrestant son esprit qu’aux choses presentes, & ne pensant iamais aux affaires, qu’aux heures où le courier est prest de partir.

Vostre Altesse a parfaitement bien remarqué les fautes, & les miennes ; car il est vray que c’est le dessein qu’il a eu de louer Cesar Borgia, qui luy a fait établir des maximes generales, pour iustifier des actions particulieres qui peuuent difficilement estre excusées ; & i’ay lù depuis ses discours sur Tite-Liue, où ie n’ay rien remarqué de mauuais. Et son principal precepte, qui est d’extirper entierement ses ennemis, ou bien de se les rendre amis, sans suiure iamais la voye du milieu, est sans doute tousiours le plus sur ; mais, lors qu’on n’a aucun suiet de craindre, ce n’est pas le plus genereux.

Vostre Altesse a aussi fort bien remarqué le secret de la fontaine miraculeuse, en ce qu’il y a plusieurs pauures qui en publient les vertus, & qui sont peut-estre gagez par ceux qui en esperent du profit. Car il est certain qu’il n’y a point de remede qui puisse seruir à tous les maux ; mais, plusieurs ayant vsé de celuy-là, ceux qui s’en sont bien trouuez, en disent IV 532 du bien, & on ne parle point des autres.

Car vostre Altesse me permettra, s’il luy plaist, de finir cette lettre par où ie l’ay commencée, & de luy souhaiter principalement de la satisfaction d’esprit & de la ioye, comme estant non seulement le fruit qu’on attend de tous les autres biens, mais aussi souuent vn moyen qui augmente les graces qu’on a pour les acquerir ; & bien que ie ne sois pas capable de contribuer à aucune chose qui regarde vostre seruice, sinon seulement par mes souhaits, i’ose pourtant assurer que ie suis plus parfaitement qu’aucun autre qui soit au monde, &c.

ElisabethMonsieur Descartes,

Ie ne suis pas tant accoutumée aux faueurs de la fortune, pour en attendre d’extraordinaire ; il me suffit, lors qu’elle ne m’enuoye pas bien souuent des accidens, qui donneroient suiet de tristesse au plus grand philosophe du monde.

Mais, si i’auois suiet de disposer de ma personne, ie ne me reposerois pas si facilement en vn estat hazardeux, estant en vn lieu où i’ay trouué suiet de contentement, que dans celuy d’où ie viens. Et pour les interests de nostre maison, il y a longtems que ie les abandonne à la destinée, voyant que la prudence mesme., si elle n est secourue d’autres moyens qui nous restent, y perdroit sa peine. Il faudroit vn genie plus fort que celuy de Socrate, pour y travailler auec succes ; car, puisqu’il ne luy a fait éuiter l’emprisonnement ni la mort, il n’a pas suiet de s’en vanter beaucoup.

I’ay eu toutes les peines du monde à m’exemter les mains des medecins, pour ne patir de leur ignorance, sans auoir esté malade, seulement que le changement d’air & de diete m’a donné, au lieu de la galle, quelques apostemes aux doits. D’où ces messieurs iugerent, qu’il y auoit encore de la mauuaise matiere cachée, qui estoit trop grossiere pour s’euacuer par la, à laquelle il falloit opposer des purges & la saignée ; mais me sentant, autrement, si bien disposée, que i’engraisse à veue d’œil, i’ay fait valoir l’opiniastreté, où la raison m’estoit inutile, & n’ay rien pris iusqu’à cette heure.

Ceux qui ont recherché les ingrediens de la fonteine de Hornhausen, croient que la source salée ne contient que du sel ordinaire ; & pour l’autre, ils ne s’y accordent point. Ils attribuent aussi (principalement les lutteriens) leur effet plus au miracle qu’à la composition de l’eau. Pour moi, ie prendray le parti le plus seur, selon vostre auis, & ne m’en seruiray point.

I’espere aussi n’estre iamais en estat de suiure les preceptes du docteur des princes, puisque la violence & le soupson sont choses contraires à mon naturel. Quoy que ie ne blasme aux tirans que le premier dessein d’vsurper vn pays & la premiere entreprise ; car apres, la voye qui sert a les establir, quelque rude qu’elle soit, fait touiours moins de mal au public qu’vne souueraineté contestée parles armes.

Cette estude aussi ne m’occupe point assez pour me donner du chagrin, puisque i’emploie le peu de tems qui me reste des lettres que i’ay à escrire, & des complaisances qu’il me faut auoir pour mes proches, à relire vos œuures, où ie profite plus en vne heure, pour cultiuer ma raison, que ie ne ferois toute ma vie aux autres lectures. Mais il n’y a personne icy d’assez raisonnable pour les comprendre, quoy que ie sois engagée de promesse à ce vieux duc de Brunswick, qui est à Wolfenbuttel, de les luy IV 581 faire auoir, pour orner sa bibliotheque. Ie ne crois point qu’ils luy seruiront pour orner sa ceruelle catherreuse, desia toute occupée du pedantisme.

Vostre tres affectionnée amie à vous seruir, Élisabeth. Ce 29/19 Nouembre. M. Descartes.

DescartesMadame,

Ie n’ay iamais trouué de si bonnes nouuelles en aucune des lettres que l’ay eu cy-deuant l’honneur de receuoir de vostre Altesse, que i’ay fait en ces dernieres du vingt-neufuiéme Nouembre. Car elles me font iuger que vous auez maintenant plus de santé & plus de ioye, que ie ne vous en ay veu auparauant ; & ie croy qu’aprés la vertu, laquelle ne vous a iamais manqué, ce sont les deux principaux biens qu’on puisse auoir en cette vie.

Il en est quasi de mesme de la Science, entre les mains de ceux qui la veulent debiter sans la bien sçauoir ; car, en pensant corriger ou adiouter quelque chose à ce qu’ils ont appris, ils la conuertissent en erreur. Il me semble que i’en voy la preuue dans le liure de Regius, qui est enfin venu au iour. I’en marquerois icy quelques points, si ie pensois qu’il l’eust enuoyé à vostre Altesse ; mais il y a si loin d’icy à B(erlin), que ie iuge qu’il aura attendu vostre retour pour vous l’offrir ; & ie l’attendray aussi, pour vous en dire mon sentiment.

Ie ne m’étonne pas de ce que vostre Altesse ne IV 591 trouue aucuns doctes au païs où elle est, qui ne soient entierement preoccupez des opinions de l’Ecole ; car ie voy que, dans Paris mesme & en tout le reste de l’Europe, il y en a si peu d’autres, que, si ie l’eusse sceu auparauant, ie n’eusse peut-estre iamais rien fait imprimer.

Ie mets au nombre des obligations que i’ay à vostre Altesse, la promesse qu’elle a faite à Monsieur le Duc de B(runswick), qui est à Wolfenbuttel, de luy faire auoir mes écrits : car ie m’assure qu’auant que vous eussiez esté en ces quartiers-là, ie n’auois point l’honneur d’y estre connu. Il est vray que ie n’affecte pas fort de l’estre de plusieurs, mais ma principale ambition est de pouuoir témoigner que ie suis auec vne entiere deuotion, &c.

ElisabethMonsieur Descartes,

I’estime la ioye & la santé autant que vous le faites, quoy que i’y prefere vostre amitié aussi bien que la vertu, puisque c’est principalement de celle-là que ie tiens l’vne & l’autre, ioint à la satisfaction d’esprit qui surpasse encore la ioye, m’ayant enseigné le moyen d’en auoir. Ie ne pouuois non plus manquer en la resolution que l’auois prise de n’vser point de remede pour la petite incommodité qui me restoit, puisqu’elle a rencontré vostre approbation.

Ma sœur Henriette a eslé si malade que nous l’auons pensé perdre. C’est ce qui m’a empesché de respondre plutost à votre derniere, m’obligeant d’estre tousiours aupres d’elle. Depuis qu’elle se porte mieux, nous auons esté obligés de suiure la Reine Mere de Suede, tous les iours en IV 619 trainau, & les soirs aux festins & aux bals, qui sont des diuertissements tres-incommodes a ceux qui s’en peuuent donner de meilleurs, mais qui incommodent moins, lorsqu’on le fait pour & auec des personnes desquels on n’a point suiet de se méfier. C’est pourquoy i’ay plus de complaisance icy que ie n’auois à La Haye.

Ie serois toutefois plus aise de pouuoir employer mon tems à la lecture du liure de Regius & de vos sentiments là-dessus. Si ie ne retourne à La Haye l’esté qui vient, comme ie n’en puis respondre, quoy que ie n’ay point change de resolution, parce que cela depend en partie de la volonté d’autruy & des affaires publiques, ie tascheray de me faire venir celuy-là par les vaisseaux qui vont d’Amsterdam a Hambourg, & espere que vous me ferez la faueur de m’enuoyer ceux ci par l’ordinaire.

I’ay rencontré depuis peu icy vn seul homme qui en auoit veu quelque chose. C’est vn docteur en medecine, nommé Weis, fort sauant aussi. Il m’a dit que Bacon luy a premierement rendu suspecte la philosophie d’Aristote, & que vostre methode la luy a fait entierement reietter, & l’a conuaincu de la circulation du sang, qui détruit tous les anciens principes de leur medecine ; c’est pourquoy il auoüe d’y auoir consenti à regret.

Vostre tres-affectionnée amie à vous seruir, Élisabeth. Monsieur Descartes.

DescartesMadame,

La satisfaction que l’aprens que vostre Altesse reçoit au lieu où elle est, fait que ie n’ose souhaiter son retour, bien que i’aye beaucoup de peine à m’en empescher, principalement à cette heure que ie me trouue à la Haye. Et pour ce que ie remarque, par vostre lettre du 21 Feurier, qu’on ne vous doit point attendre icy auant la fin de l’esté, ie me propose de faire vn voyage en France pour mes affaires particulieres, auec dessein de reuenir vers l’hyuer ; & ie ne partiray point de deux mois, afin que ie puisse auparauant auoir l’honneur de receuoir les commandemens de vostre Altesse, lesquels auront tousiours plus de pouuoir sur moy qu’aucune autre chose qui soit au monde.

Ie louë Dieu de ce que vous auez maintenant vne IV 625 parfaite santé ; mais ie vous supplie de me pardonner, si i’ose contredire à vostre opinion, touchant ce qui est de ne point vser de remedes, pour ce que le mal que vous auiez aux mains est passé ; car il est à craindre, aussi bien pour vostre Altesse que pour Madame vostre sœur, que les humeurs qui se purgeoient en cette façon ayent esté arrestées par le froid de la saison, & qu’au printemps elles ne ramenent le mesme mal, ou vous mettent en danger de quelqu’autre maladie, si vous n’y remediez par vne bonne diete, n’vsant que de viandes & de breuuages qui rafraichissent le sang, & qui purgent sans aucun effort.

Ie ne sçay ce que ie puis auoir écrit à vostre Altesse, touchant le liure de Regius, qui vous donne occasion de vouloir sçauoir ce que i’y ay obserué ; peut-estre que ie n’en ay pas dit mon opinion, afin de ne pas preuenir vostre iugement, en cas que vous eussiez déia le liure ; mais, puis que l’aprens que vous ne l’auez point encore, ie vous diray icy ingenuëment, que ie n’estime pas qu’il merite que vostre Altesse se donne la peine de le lire.

Ie ne lairray pas de porter demain à Mademoiselle la P. S. vn exemplaire de son liure, dont le titre est Henrici Regij fundamenta Physices, auec vn autre petit liure de mon bon amy Monsieur de Hogelande, qui a fait tout le contraire de Regius, en ce que Regius n’a rien écrit qui ne soit pris de moy, & qui ne soit auec cela contre moy, au lieu que l’autre n’a rien écrit qui soit proprement de moy (car ie ne croy pas mesme qu’il ait iamais bien lû mes écrits), & toutesfois il n’a rien qui ne soit pour moy, en ce qu’il a suiuy les IV 628 mesmes principes. Ie prieray Mad. L.

ElisabethMonsieur Descartes,

Ie n’ay point regretté mon absence de La Haye, que depuis que vous me mandez y auoir esté, & que ie me sens priuée de la satisfaction que ie soulois auoir en vostre conuersation, pendant le seiour que vous y faisiez ; il me sembloit que i’en partois toutes les fois plus raisonnable, & encore que le repos que ie trouue icy, parmy des personnes qui m’affectionnent & m’estiment beaucoup plus que ie ne IV 629 le merite, surpasse tous les biens que ie puisse auoir ailleurs, il n’approche point de celuy-là, que ie ne me saurois neantmoins promettre en quelques mois, ni en predire le nombre, puisque ie ne vois point que Madame l’Electrice, ma Tante, soit en humeur de permettre mon retour, & que ie n’ay point suiet de l’en presser, auant que M.

Apres Pasques, nous irons à Crossen, qui est le domaine de Madame ma Tante, sur les frontieres de Silesie, pour y demeurer trois semaines ou vn mois, où la solitude IV 630 me donnera plus de loisir pour la lecture, & ie l’employeray tout aux liures que vous auez eu la bonté de m’enuoyer, pour lesquels ie vous prie de receuoir icy mes remercimens. I’ay eu plus d’enuie de voir le liure de Regius, pour ce que ie say qu’il y a mis du vostre, que pour ce qui y est du sien.

Monsieur Hogelant aura asseurement bien reussi en ce qu’il a fait imprimer, puisqu’il y a suiui vos principes, que ie ne saurois icy faire entendre a pas vn des doctes de Berlin, tant ils sont preoccupés de l’escole. Et celuy que ie nommois en ma derniere ne m’a point veu, depuis que ie luy ay presté vostre physique, qui est vn signe asseuré que tout le monde se porte fort bien icy, puisqu’il est vn des medecins de la maison.

Lorsque ie vous disois ne me point vouloir seruir de remedes pour les apostemes que i’ay eu en l’automne, ientendois de ceux qui viennent de l’apotiquaire, puisque les herbes rafraichissantes & qui purgent le sang me seruent d’aliment au printems, n’ayant d’ordinaire d’appetit en IV 631 cette saison pour autre chose. Ie pretens aussi me faire seigner en peu de iours, puisque i’en ay pris vne mauuaise coutume, que ie ne saurois changer a cette heure sans en estre incommodée du mal de teste. I’aurois peur de vous en donner par ce fascheux recit de moy mesme, si vostre soin de ma santé ne m’y auoit porté.

Vostre tres-affectionnée amie à vous seruir, Élisabeth. De Berlin, le 11/1 d’Auril.

DescartesEncore que ie pourray trouuer des occasions qui me conuieront à demeurer en France, lors que i’y seray, il n’y en aura toutesfois aucune qui ait la force de m’empescher que ie ne reuienne auant l’hyuer, pouruû que la vie & la santé me demeurent, puis que la lettre que i’ay eu l’honneur de receuoir de vostre Altesse me fait esperer que vous retournerez à la Haye vers la fin de l’esté.

La preuue de cecy est que, depuis trois ou quatre mois, vn certain Regent du College des Théologiens de Leyde, nommé Reuius, a fait disputer quatre diuerses Theses contre moy, pour peruertir le sens de mes Meditations, & faire croire que i’y ay mis des choses fort absurdes, & contraires à la gloire de Dieu : comme, qu’il faut douter qu’il y ait vn Dieu ; & mesme, que ie veux qu’on nie absolument pour quelque temps qu’il y en ait vn, & choses semblables.

Ie ne prendrois pas la liberté d’entretenir vostre V 18 Altesse de ces petites choses, si la faueur qu’elle me fait de vouloir lire les liures de Monsieur Hoguelande & de Regius, à cause de ce qu’ils ont mis qui me regarde, ne me faisoit croire que vous n’aurez pas des-agreable de sçauoir de moy-mesme ce qui me touche ; outre que l’obeïssance & le respect, que ie vous dois, m’oblige à vous rendre conte de mes actions.

Ie loüe Dieu de ce que ce Docteur, à qui vostre Altesse a presté le liure de mes Principes. a esté longtemps sans vous retourner voir, puis que c’est vne marque qu’il n’y a point du tout de malades à la cour de Madame l’Electrice, & il semble qu’on a vn degré de santé plus parfait, quand elle est generale au lieu où l’on demeure, que lors qu’on est enuironné de malades. Ce medecin aura eu d’autant plus de loisir de lire le liure qu’il a plù à vostre Altesse de luy prester, & vous en aura pù mieux dire depuis son iugement.

Pendant que i’écris cecy, ie reçois des lettres de la Haye & de Leyde, qui m’aprennent que l’assemblée des Curateurs a esté differée, en sorte qu’on ne leur a point encore donné mes lettres ; & ie voy qu’on fait d’vne broüillerie vne grande affaire. On dit que les Theologiens en veulent estre iuges, c’est à dire me mettre icy en vne inquisition plus seuere que ne fut iamais celle d’Espagne, & me rendre l’aduersaire de leur Religion. Sur quoy on voudroit que l’employasse V 19 le credit de Monsieur l’Ambassadeur de France, & l’autorité de Monsieur le Prince d’Orange, non pas pour obtenir iustice, mais pour interceder & empescher que mes ennemis ne passent outre.

ElisabethMonsieur Descartes,

Il y a trois semaines qu’on m’a enuoyé le corollaire impertinent du professeur Triglandius, y aioutant que ceux qui ont disputé pour vous ne furent point vaincus par raison, mais contraints de se taire par le tumulte qui s’excita en l’Academie, & que le professeur Stuard (homme de grande lecture, mais d’vn iugement fort mediocre),, faisoit dessein de refuter vos Meditations Metaphysiques.

Le douaire de Madame l’Electrice est en vne situation qui ne reuient pas mal à ma complexion, de deux degre plus proche du soleil que Berlin, entouré de la riuiere de l’Oder. & la terre y est extremement fertile. Le peuple s’y est desia mieux remis de la guerre que celui-cy, encore que les armées y ayent esté plus longtemps & fait plus de dommage par le feu. Il y a maintenant en quelques villages vne si grande quantité de ces mouches qu’on nomme cousins, que plusieurs hommes & animaux en sont étouffés ou deuenus sourds & aueugles. Ils y viennent en forme de nue & s’en vont de mesme.

I’ay receu, passé deux iours, les liures de M. Hogeland & de Roy ; mais les depesches m’ont empesché d’y lire autre chose que le commencement du premier, où i’estimerois fort les preuues de l’exislence de Dieu, si vous ne m’auiez accoutumée de les demander des principes de nostre connoissance.

Mon frere Philippe, qui m’a fait tenir les dits liures, me mande qu’il y en a deux autres en chemin ; & puisque ie n’en ay point fait venir, ie crois que ce seront vos Meditations & vos Principes de philosophie en françois. I’ay principalement de l’impatience pour le dernier, puisque vous y auez aiouté quelque chose qui n’est point au latin, ce que ie pense sera au 4me liure, puisque les trois autres paroissent aussi clairs qu’il est possible de les rendre.

Le medecin dont ie vous ay parlé autrefois, m’a dit qu’il auoit quelques obiections touchant les mineraux, mais qu’il n’oseroit vous les enuoyer, auant qu’auoir encore vne fois examiné vos principes. Mais la pratique l’empesche beaucoup. Le peuple d’icy a vne croyance extraordinaire en sa profession ; & n’estoit la grande saleté de la commune & de la noblesse, ie crois qu’il en auroit moins besoin que peuple du monde, puisque l’air y est fort pur. I’y ay aussi plus de santé que ie n’auois en Hollande. Mais ie ne voudrois pas y auoir tousiours esté, puisqu’il n’y a rien que mes liures pour m’empescher de deuenir stupide au dernier point.

Vostre tres affectionnée amie à vous seruir, Élisabeth. Monsieur Descartes.

DescartesMadame,

Passant par la Haye pour aller en France, puis que ie ne puis y auoir l’honneur de receuoir vos commandemens, & vous faire la reuerence, il me semble que ie suis obligé de tracer ces lignes, afin d’assurer vostre Altesse que mon zele & ma deuotion ne changeront point, encore que ie change de terre. I’ay receu depuis deux iours vne lettre de Suede de Monsieur le Resident de France qui est là, où il me propose vne question de la part de la Reyne, à laquelle il m’a fait connoistre en luy monstrant ma réponse à vne autre lettre qu’il m’auoit cy-deuant enuoyée.

On a fait taire les Theologiens qui me vouloient nuire, mais en les flatant, & en se gardant de les offenser le plus qu’on a pû, ce qu’on attribuë maintenant au tems ; mais i’ay peur que ce tems durera tousiours, & qu’on leur lairra prendre tant de pouuoir, qu’ils seront insupportables.

On acheue l’impression de mes Principes en François ; & pource que c’est l’Epistre qu’on imprimera la derniere, i’en enuoye icy la copie à vostre Altesse, afin que, s’il y a quelque chose qui ne lui agrée pas, & qu’elle iuge deuoir estre mis autrement, il luy plaise me faire la faueur d’en auertir celuy qui sera toute sa vie, &c.

Madame,

Puisque l’ay déia pris la liberté d’auertir vostre Altesse de la correspondance que i’ay commencé d’auoir en Suede, ie pense estre obligé de continuer, & de luy dire que i’ay receu depuis peu des lettres de l’amy que i’ay en ce païs-là, par lesquelles il m’aprend que, la Reine ayant esté à Vpsale, où est l’Academie du païs, elle auoit voulu entendre vne harangue du Professeur en l’eloquence, qu’il estime pour le plus habile & le plus raisonnable de cette Academie, & qu’elle luy auoit donné pour son suiet à discourir du Souuerain Bien de cette vie ; mais qu’apres auoir ouy cette harangue, elle auoit dit que ces gens-là ne faisoient qu’efleurer les matieres, & qu’il en faudroit sçauoir mon opinion.

I’ay crû ne deuoir pas negliger cette occasion, & considerant que, lors qu’il m’a écrit cela, il ne pouuoit encore auoir receu la lettre où ie parlois de celles que i’ay eu l’honneur d’écrire à vostre Altesse touchant la mesme matiere, i’ay pensé que le dessein que i auois eu en cela estoit failly, & qu’il le falloit prendre d’vn autre biais ; c’est pourquoy i’ay écrit vne lettre à la Reyne, où, apres auoir mis briéuement mon opinion, l’adioute que l’obmets beaucoup de choses, parce que, me representant le nombre des affaires qui se rencontrent en la conduite d’vn grand Royaume, & dont sa Maiesté prend elle-mesme les soins, ie n’ose luy demander plus longue audiance ; mais que l’enuoye à Monsieur Chanut quelques écrits, où i’ay mis mes sentimens plus au long touchant la mesme matiere, afin que, s’il luy plaist de les voir, il puisse les luy presenter.

Ces écrits que i’enuoye à Monsieur Chanut, sont les lettres que i’ay eu l’honneur d’écrire à vostre Altesse touchant le liure de Seneque de vita beata, iusques à V 91 la moitié de la sixiéme, où, apres auoir definy les Passions en general, ie mets que ie trouue de la difficulté à les dénombrer.

Ie n’ay pas iugé à propos d’y mettre rien de plus de vostre Altesse, ny mesme d’en exprimer le nom, lequel toutesfois il ne pourra ignorer à cause de mes lettres precedentes. Mais considerant que, nonobstant qu’il soit homme tres-vertueux & grand estimateur des personnes de merite, en sorte que ie ne doute point qu’il n’honore vostre Altesse autant qu’il doit, il ne m’en a toutesfois parlé que rarement en ses lettres, V 92 bien que ie luy en aye écrit quelque chose en toutes les miennes, i’ay pensé qu’il faisoit peut-estre scrupule d’en parler à la Reyne, pource qu’il ne sçait pas si cela plairoit ou déplairoit à ceux qui l’ont enuoyé.

ElisabethMonsieur Descartes,

Puisque i’ay receu, il y a quelques iours, la traduction françoise de vos Meditations Metaphysiques, que vous m’auez enuoyé, ie suis obligé de vous en rendre grace par ces lignes, encore ie ne saurois exprimer mon sentiment de reconnoissance de vos bontés, sans en demander vne nouuelle pour excuser l’incommodité que ie vous donne a lire & répondre mes lettres qui vous détournent si souuent de meditations vtiles, pour des suiets qui, sans la partialité d’amy, ne vous sauroient estre considerables ; mais i’ay receu tant de preuues de celle que vous auez pour moi, que i’y presume assez pour ne faire difficulté de vous dire auec quelle satisfaction i’ay leu la traduction susdite, puisqu’elle rend vos pensées d’autant plus miennes V 97 que ie les vois bien exprimées en vne langue dont ie me sers ordinairement, encore que ie crois les auoir comprises auparauant.

Cela vous montre combien le monde a besoin du Traité de l’Erudition, que vous auez autrefois voulu faire. Ie say que vous estes trop charitable pour refuser vne chose si vtile au public, & que, pour cela, ie n’ay pas besoin de vous faire souuenir de la parole que vous en auez donnée à

Vostre tres-affectionnée amye à vous seruir, Élisabeth. Ce 5/25 de 10/9bre. Monsieur Descartes.

DescartesMadame,

I’ay receu les lettres de vostre Altesse du 23 Décembre presque aussi-tost que les précédentes, & i’auoüe que ie suis en peine touchant ce que ie dois répondre à ces précédentes, à cause que vostre Altesse y témoigne vouloir que i’écriue le Traité de l’Erudition, dont i’ay eu autrefois l’honneur de luy parler. Et il n’y a rien que ie souhaite auec plus de zèle, que d’obéir à vos commandemens ; mais ie diray icy les raisons qui sont cause que i’auois laissé le dessein de V 112 ce Traité, & si elles ne satisfont à vostre Altesse, ie ne manqueray pas de le reprendre.

La première est que ie n’y sçaurois mettre toutes les veritez qui y deuroient estre, sans animer trop contre moy les gens de l’Escole, & que ie ne me trouue point en telle condition que ie puisse entièrement mépriser leur haine. La seconde est que i’ay déjà touché quelque chose de ce que i’auois enuie d’y mettre, dans vne Préface qui est au-deuant de la traduction Françoise de mes Principes, laquelle ie pense que vostre Altesse a maintenant receuë. La troisiéme est que i’ay maintenant vn autre écrit entre les mains, que i’espere pouuoir estre plus agréable à vostre Altesse : c’est la description des fonctions de l’animal & de l’homme.

Au reste, ie considere ce qui me reste de cet hyuer, comme le temps le plus tranquille que i’auray peut-estre V 113 de ma vie ; ce qui est cause que i’ayme mieux l’employer à cette étude, qu’à vne autre qui ne requert pas tant d’attention. La raison qui me fait craindre d’auoir cy-apres moins de loisir, est que ie suis obligé de retourner en France l’esté prochain, & d’y passer l’hyuer qui vient ; mes affaires domestiques & plusieurs raisons m’y contraignent. On m’y a fait aussi l’honneur de m’y offrir pension de la part du Roy, sans que ie l’aye demandée ; ce qui ne sera point capable de m’attacher, mais il peut arriuer en vn an beaucoup de choses.

Ie n’atens encore de long-temps réponse à la lettre touchant le Souuerain Bien, pour ce quelle a demeuré prés d’vn mois à Amsterdam, par la faute de celuy à qui ie l’auois enuoyée pour l’adresser ; mais, si-tost que i’en auray quelques nouuelles, ie ne manqueray pas de le faire sçauoir à vostre Altesse. Elle ne contenoit aucune chose de nouueau qui meritast de vous estre enuoyée. I’ay receu, depuis, quelques lettres de ce pays-la, par lesquelles on me mande que les miennes V 114 sont attenduës, & selon qu’on m’écrit de cette Princesse, elle doit estre extrêmement portée à la vertu, & capable de bien iuger des choses.

I’enuoye auec cette lettre vn liuret de peu d’importance, & ie ne l’enferme pas en mesme paquet, à cause qu’il ne vaut pas le port ; ce sont les insultes de Monsieur Reg(ius) qui m’ont contraint de l’écrire, & il a esté plutost imprimé que ie ne l’ay sceu ; mesme on y a ioint des vers & vne Préface que ie desaprouue, quoy que les vers soient de Monsieur Hey(danus), mais qui n’a osé y mettre son nom, comme aussi ne le deuoit-il pas. Ie suis, &c.

ElisabethMonsieur Descartes,

L’enflure que i’ay eu au bras droit, par la faute d’vn chirurgien qui m’a coupé partie d’vn nerf en me seignant, m’a empesché de respondre plutost à vostre lettre du 7 de may, qui me represente vn nouuel effet de vostre parfaite generosité, au regret que vous auez de quitter l’Hollande pour y pouuoir esperer de m’y faire iouir de l’vtilité de vostre conuersation, qui veritablement est le plus grand bien que i’y attendois & l’vnique suiet qui m’a fait songer aux moyens d’y retourner, à quoy l’accommodement des affaires d’Angleterre m’auroit autant serui que le desespoir d’en voir en celles d’Allemagne.

Cependant on parle du voyage que vous auez proposé autrefois, & la Mere de la personne à qui vostre ami a donné vos lettres, a reçu ordre de le faire reussir sans qu’on sache en son pais que cela vient de plus loin que de son propre mouuement. On a mal choisi la bonne femme pour menager vn secret, elle qui n’en eut iamais.

Ie ne vous ai pas encore rendu conte de ma lecture de la version françoise de vos Principes de philosophie. Combien qu’il y ait quelque chose dans la preface, sur quoy i’ay besoin de votre explication, ie ne l’aioute pas icy, parce que cela engrossiroit trop ma lettre. Mais ie pretens vous en entretenir vne autre fois, & me promets qu’en changeant de demeure, vous conseruerez tousiours la mesme charité pour

Vostre tres affectionnée amie à vous seruir, Élisabeth. M. Descartes. De Crossen, ce 20me/30 de iuin.

DescartesMadame,

Encore que ie sçache bien que le lieu & la condition où ie suis ne me sçauroient donner aucune occasion V 198 d’estre vtile au seruice de vostre Altesse, ie ne satisferois pas à mon deuoir, ny à mon zele, si, apres estre arriué en vne nouuelle demeure, ie manquois à vous renouueller les offres de ma tres-humble obeïssance. Ie me suis rencontré icy en vne conioncture d’affaires, que toute la prudence humaine n’eust sçeu preuoir.

ElisabethMonsieur Descartes,

Vous ne sauriez estre en lieu du monde où la peine que vous prendrez de me mander de vos nouuelles ne soit vtile pour ma satisfaction. Car ie me persuade qu’elles seront tousiours à vostre auantage, & que Dieu est trop iuste pour vous enuoyer de malheurs si grands que vostre prudence n’en sauroit tirer, comme des desordres inopinés en France, qui conseruent vostre liberté en vous obligeant de retourner en Hollande, puisque sans cela la Cour vous l’auroit rauie, quelque soin que vous eussiez pu prendre de vous y opposer ; & pour moy, i’en reçois V 210 le plaisir de pouuoir esperer le bonheur de vous reuoir en Hollande ou ailleurs.

Ie crois que vous aurez reçu la lettre où on vous parle d’vn autre voyage, qui se deuoit faire, si les amis I’approuuoient, le croyant pour leur seruice en cette conioncture ; & depuis ils l’ont demandé, en fournissant les depenses qu’il y falloit. Neantmoins ceux qui sont où cela se doit commencer, ont empeschés de iour en iour les apprets qui y estoient necessaires, émeus à cela par des raisons si foibles qu’eux mesmes ne les oseroient auouer. Cependant on donne à cette heure si peu de tems pour cela, que la personne de question ne pourra point estre preste.

Vostre tres affectionnée amie à vous seruir, Élisabeth.

Monsieur Descartes,

Ie vous parlois, en ma derniere, d’vne personne qui, sans auoir failly, estoit en danger de perdre la bonne opinion & peut estre la bienueillance de la plupart de ses amis. Maintenant elle s’en trouue deliuré d’vne fasson assez extraordinaire, puisque cett’autre, à qui elle auoit mandé le tems qu’il lui falloit pour se rendre auprès d’elle, luy répond qu’elle l’auroit bien attendue, si sa fille n’eut changé de resolution, iugeant qu’on trouueroit mauuais qu’elle seroit approchée de si près par gens de differente religion.

Quant à moy, ie pretens demeurer encore icy iusqu’à ce que i’apprenne l’issue des affaires d’Allemagne & d’Angleterre, qui semblent estre maintenant en vne crise. Nous y auons eu vne plaisante rencontre depuis trois iours, toutefois tres-incommode. En nous promenant sous vn bois de chêne, Mme l’Electrice auec ceux de sa suite, il nous est venu en vn instant comme vne sorte de rougeolle par tout corps, hors au visage, sans fieure ni autre mal qu’vne demangeaison insupportable. Les superstitieux se croyoient ensorcelés ; mais les paisans nous disoient qu’il y auoit parfois vne certaine rosée venimeuse sur les arbres, qui, descendant en poussiere, infecte ainsi les passans.

le suis parfaitement, M. Descartes, Vostre tres affectionnée amie à vous seruir, Élisabeth. De Krossen, ce 23/13 d’Aoust.

DescartesMadame,

I’ay eu enfin le bonheur de receuoir les trois lettres que vostre Altesse m’a fait l’honneur de m’écrire, & elles n’ont point passé en de mauuaises mains. Mais la premiere, du 30 Iuin, ayant esté portée à Paris, pendant que i’estois desia en chemin pour reuenir en ce païs, ceux qui l’ont receuë pour moy ont attendu des nouuelles de mon arriuée auant que de me l’enuoyer, & ainsi ie ne l’ay pû auoir qu’auiourd’huy, que i’ay aussi receu la derniere du 23 Aoust, par laquelle i̇’aprens vn procedé iniurieux que i’admire ; & ie veux croire, auec vostre Altesse, qu’il ne vient pas de la personne à qui on l’attribuë.

Ie n’ay receu aucunes lettres, depuis cinq mois, de l’amy dont i’auois écrit cy-deuant à vostre Altesse. Et pour ce qu’en sa derniere il me mandoit fort ponctuellement les raisons qui auoient empesché la personne à laquelle il auoit donné mes lettres, de me faire réponse, ie iuge que son silence ne vient que de ce qu’il attend encore cette réponse, ou bien peut-estre qu’il a quelque honte de n’en auoir point à m’enuoyer, ainsi qu’il s’estoit imaginé.

Madame,

Entre plusieurs fascheuses nouuelles que i’ay receuës de diuers endroits en mesme temps, celle qui m’a le plus viuement touché, a esté la maladie de vostre Altesse. Et bien que i’en aye aussi appris la guerison, il ne laisse pas d’en rester encore des marques de tristesse en mon esprit, qui n’en pourront estre si-tost effacées. L’inclination à faire des vers, que vostre Altesse auoit pendant son mal, me fait souuenir de Socrate, que Platon dit auoir eu vne pareille enuie, pendant qu’il estoit en prison.

Si ie ne connoissois le vostre pour tel, ie craindrois que vous ne fussiez extraordinairement affligée d’aprendre V 282 la funeste conclusion des Tragedies d’Angleterre ; mais ie me promets que vostre Altesse, estant acoutumée aux disgraces de la Fortune, & s’estant veuë soy-mesme depuis peu en grand peril de sa vie, ne sera pas si surprise, ny si troublée, d’aprendre la mort d’vn de ses proches, que si elle n’auoit point receu auparauant d’autres afflictions.

Pendant que i’écris ces lignes, ie reçois des lettres d’vn lieu d’où ie n’en auois point eu depuis sept ou huit mois ; & vne entr’autres, que la personne à qui i’auois enuoyé le traité des Passions, il y a vn an, a écrite de sa main pour m’en remercier. Puisqu’elle se souuient, aprés tant de temps, d’vn homme si peu considerable comme ie suis, il est à croire qu’elle n’oubliera pas de répondre aux lettres de vostre Altesse, bien qu’elle ait tardé quatre mois à le faire.

I’ay tousiours esté en peine, depuis la conclusion de cette paix, de n’aprendre point que Monsieur l’Electeur vostre frere l’eust acceptée, & i’aurois pris la liberté d’en écrire plutost mon sentiment à vostre Altesse, si i’auois pû m’imaginer qu’il mist cela en delibération. Mais, pour ce que ie ne sçay point les raisons particulieres qui le peuuent mouuoir, ce seroit temerité à moy d’en faire aucun iugement.

Madame,

Il y a enuiron vn mois que i’ay eu l’honneur d’écrire à vostre Altesse, & de luy mander que i’auois receu quelques lettres de Suede. Je viens d’en receuoir derechef, par lesquelles ie suis conuié, de la part de la Reyne, d’y faire vn voyage à ce printemps, afin de pouuoir reuenir auant l’hyuer. Mais i’ay répondu de telle sorte que, bien que ie ne refuse pas d’y aller, ie croy neantmoins que ie ne partiray point d’icy que vers le milieu de l’esté. I’ay demandé ce delay pour plusieurs considerations, & particulierement afin que ie puisse auoir l’honneur de receuoir les commandemens de V. A. auant que de partir.

Madame,

Puisque vostre Altesse desire sçauoir quelle a est ma resolution touchant le voyage de Suede, ie luy diray que ie persiste dans le dessein d’y aller, en cas que la Reine continuë à témoigner qu’elle veut que i’y aille, V 360 & M. Chanut, nostre Resident) en ce païs-là, estant passé icy, il y a huit iours, pour aller en France, m’a parlé si auantageusement de cette merueilleuse Reine, que le chemin ne me semble plus si long ny si fascheux qu’il faisoit auparauant ; mais ie ne partiray point que ie n’aye receu encore vne fois des nouuelles de ce païs-là, & ie tascheray d’attendre le retour de M.

Madame,

Estant arriué depuis quatre ou cinq iours à Stocholm, l’vne des premieres choses que i’estime appartenir à mon deuoir est de renouueller les offres de mon tres-humble seruice à vostre Altesse, afin qu’elle puisse connoistre que le changement d’air & de païs ne peut rien changer ny diminuer de ma deuotion & de mon zele. Ie n’ay encore eu l’honneur de voir la Reine que deux fois ; mais il me semble la connoistre déia assez, pour oser dire qu’elle n’a pas moins de merite & a plus de vertu que la renommée luy en attribuë.

ElisabethMonsieur Descartes,

Vostre lettre du (29sept.)/(30oct.) s’est promenée par Cleue ; mais toute vieille elle ne laisse pas d’estre tres-agreable & vne preuue fort obligeante de la continuation de vostre bonté pour moy, qui m’asseure aussi de l’heureux succés de vostre voyage, puisque le suiet en merite la peine & que vous trouuez encore plus de merueilles en la Reine de Suede que sa reputation n’en fait éclater. Mais il faut auouer que vous estes plus capable de les connoistre que ceux qui se sont meslés iusqu’icy de les proclamer. Et il me semble en sauoir plus, par ce peu que vous en dites, que par tout ce que i’en ay appris d’ailleurs.

Vostre tres-affectionnée à vous seruir, Élisabeth. M. Descartes. Ce 24/4 9bre/10bre. Ma derniere estoit du 10/20 nou.